'ముంబయి' ఆల్​రౌండ్ షో- రఫ్పాడించిన బుమ్రా- 2024లో తొలి విజయం - MI vs DC IPL 2024

MI vs DC IPL 2024: 2024 ఐపీఎల్​లో ముంబయి తొలి విజయం నమోదు చేసింది. దిల్లీపై 29 పరుగుల తేడాతో నెగ్గింది. కాగా, దిల్లీ నాలుగో ఓటమిని మూటగట్టుకుంది.

MI vs DC IPL 2024: 2024 ఐపీఎల్​లో ముంబయి తొలి విజయం నమోదు చేసింది. ఆదివారం వాంఖడే వేదికగా దిల్లీ క్యాపిటల్స్​పై 29 పరుగుల తేడాతో నెగ్గి ఈ సీజన్​లో గెలుపు రుచి చూసింది. ముంబయి నిర్దేశించిన 235 భారీ లక్ష్య ఛేదనలో దిల్లీ 205-8 పరుగులకే పరిమితమైంది. ట్రిస్టన్ స్టబ్స్ (71 పరుగులు, 25 బంతుల్లో; 3x4, 7x6), పృథ్వీ షా (66 పరుగులు, 40 బంతుల్లో; 8x4, 3x6) రాణించినా దిల్లీకి ఓటమి తప్పలేదు. ఇక ముంబయి బౌలర్లలో గెరాల్డ్ కాట్జీ 4, జస్​ప్రీత్ బుమ్రా 2, రొమారియో షెపర్డ్ 1 వికెట్ దక్కించుకున్నారు.

దిల్లీ పోరాడినా: భారీ లక్ష్య ఛేదనలో దిల్లీకి ఆరంభంలోనే ఎదురుదెబ్బ తగిలింది. ఓపెనర్ డేవిడ్ వార్నర్ (10) స్వల్ప స్కోర్​కే వెనుదిరిగాడు. అయినప్పటికీ పృథ్వీ షా, వన్​డౌన్​లో వచ్చిన అభిషేక్ పోరెల్ అదరగొట్టారు. ముంబయి బౌలర్లను ధీటుగా ఎదుర్కొంటు దిల్లీని విజయం దిశగా నడిపించారు. ఈ క్రమంలో పృథ్వీ అర్ధ శతరం పూర్తి చేసుకున్నాడు. ఈ సమయంలో బుమ్రా ముంబయికి బ్రేక్ ఇచ్చాడు. అద్భుత యార్కర్​తో షా ను క్లీన్ బౌల్డ్ చేశాడు. ఆ తర్వాత అభిషేక్, కెప్టెన్ రిషబ్ పంత్ (1) కూడా స్వల్ప వ్యవధిలో ఔటయ్యారు.

రెచ్చిపోయిన స్టబ్స్: దిల్లీ ఘనమైన ఆరంభాన్ని స్టబ్స్ కొనసాగించాడు. ఓ ఎండ్​లో వికెట్లు పడుతున్నా ఏ మాత్రం బెదరకుండా బౌండరీలతో విరుచుకుపడ్డాడు. బుమ్రా మినహా ముంబయి బౌలర్లను ఒక్కొక్కరిని లక్ష్యంగా చేసుకొని మెరుపు వేగంతో పరుగులు చేశాడు. ఒక రకంగా చెప్పాలంటే స్టబ్స్ ఆడుతున్నంతసేపు దిల్లీ గెలుస్తుందనుకున్నారంతా. అటు దిల్లీ ఇన్నింగ్స్​లోనూ స్టబ్స్ ఆటే హైలైట్. ఇక చివర్లో క్రమం తప్పకుండా వికెట్లు పడడం, కావాల్సిన రన్​రేట్ పెరగడం వల్ల దిల్లీ ఒత్తిడికి గురైంది. ఆఖరి ఓవర్లో 34 పరుగులు కావాల్సిన దశలో గెరాల్డ్ 4 పరుగులిచ్చి మూడు వికెట్లు తీసి ముంబయికి విజయాన్ని అందించాడు.

అంతకుముందు బ్యాటింగ్ చేసిన ముంబయి నిర్ణీత 20 ఓవర్లలో 5 వికెట్ల నష్టానికి 234 పరుగుల భారీ స్కోర్ నమోదు చేసింది. ముంబయి బ్యాటర్లు దిల్లీ బౌలర్లపై దండయాత్ర చేశారు. రోహిత్ శర్మ (49 పరుగులు 27 బంతుల్లో ; 6x4, 3x6), ఇషాన్ కిషన్ (42 పరుగులు, 23 బంతుల్లో ; 4x4, 2x6) అదరగొట్టగా, టిమ్ డేవిడ్ (45 పరుగులు), రొమారియో షెపర్డ్ (39 పరుగులు, 10 బంతుల్లో) దిల్లీ బౌలర్లకు చుక్కలు చూపించారు. వీరిద్దరూ చివరి 30 బంతుల్లో 96 పరుగులు పిండుకున్నారు. దిల్లీ బౌలర్లలో నోకియా 2, అక్షర్ పటేల్ 2, ఖలీల్ అహ్మద్ 1 వికెట్ దక్కించుకున్నారు.

• 𝐁𝐎𝐎𝐌 💥 𝗢𝗡 𝗧𝗔𝗥𝗚𝗘𝗧 🎯
  
  Just Bumrah doing Bumrah things 🤷‍♂️
  
  Watch the match LIVE on @starsportsindia and @JioCinema 💻📱#TATAIPL | #MIvDC pic.twitter.com/rO1Hnqd3Od

  — IndianPremierLeague (@IPL) April 7, 2024