గోల్డ్ మెడలిస్ట్​తో లక్ష్యసేన్ పోటీ- టైట్ ఫైట్ తప్పేలా లేదు! - Paris Olympics

Lakshya Sen Semi Final: భారత స్టార్ షట్లర్ లక్ష్యసేన్ పారిస్ ఒలింపిక్స్‌ 2024లో జోరుమీదున్నాడు. సూపర్ ఫామ్​తో ఇప్పటికే సెమీ ఫైనల్ బెర్త్ ఖరారు చేసుకున్నాడు. మరి ఈ కీలక పోరులో లక్ష్య ఎవరితో తలపడనున్నాడంటే?

Lakshya Sen Semi Final: 2024 పారిస్ ఒలింపిక్స్​లో భారత స్టార్ షట్లర్ లక్ష్యసేన్ సూపర్ ఫామ్​తో సెమీఫైనల్​కు దూసుకెళ్లాడు. ఈ క్రమంలో విశ్వ క్రీడల్లో పురుషుల బ్యాడ్మింటన్ సింగిల్స్​ ఈవెంట్లో సెమీస్ ఫైనల్​కు అర్హత సాధించిన తొలి భారత​ షట్లర్​గా లక్ష్యసేన్ చరిత్ర సృష్టించాడు. శుక్రవారం జరిగిన క్వార్టర్ ఫైనల్ మ్యాచ్​లో చో చెన్‌ (తైవాన్)పై 19-21, 21-15, 21-12 నెగ్గి పతకానికి అడుగు దూరంలో నిలిచాడు. ఇక రాబోయే మ్యాచ్​ల్లో కూడా ఇలాగే అదరగొట్టి పతకాన్ని పట్టేయాలని భారత్ ఫ్యాన్స్ ఆశిస్తున్నారు. మరి సెమీస్​లో లక్ష్యసేన్ ఎవరిని ఢీ కొట్టనున్నాడో తెలుసా?

కీలమైన సెమీస్​ పోరులో లక్ష్యసేన్ డెన్మార్క్ షట్లర్ విక్టర్ ఆక్సెల్సెన్ (Viktor Axelsen)తో తలపడనున్నాడు. ఆక్సెల్సెన్​ కూడా ఈ ఒలింపిక్స్​లో అజేయంగా లేకుండా సెమీస్​కు దూసుకొచ్చాడు. అతడు గ్రూప్ స్టేజ్​లో నేపాల్, ఇజ్రాయెల్, ఐర్లాండ్ ప్లేయర్లపై నెగ్గాడు. కాగా, క్వార్టర్ ఫైనల్​లో సింగపుర్ షట్లర్ కే వై లోక్​పై 21-9, 21-17 తేడాతో విజయం సాధించి జోరుమీదున్నాడు. అంతేకాకుండా 2020 ఒలింపిక్స్ పరుషుల బ్యాట్మింటన్ సింగిల్స్​లో విక్టర్ ఆక్సెల్సెన్ స్వర్ణ పతకం దక్కించుకున్నాడు. దీంతో సెమీఫైనల్​లో లక్ష్యసేన్​కు ప్రత్యర్థి నుంచి గట్టి పోటీ ఎదురయ్యే ఛాన్స్ ఉంది.

Lakshya Sen will take on reigning Olympic Champion Viktor Axelsen in Semis on Sunday.

Bring it on ⚡️⚡️⚡️ #Badminton #Paris2024 #Paris2024withIAS pic.twitter.com/ZP98mZijAq

— India_AllSports (@India_AllSports) August 2, 2024

వీరిద్దరి మధ్య సెమీస్ పోరు ఆదివారం (ఆగస్టు 04) మధ్యాహ్నం 12 గంటలకు జరగనుంది. సెమీస్​లో లక్ష్యసేన్ విజయం సాధిస్తే పతకం ఖరారవుతుంది. అతడు ఫైనల్​ పోరులో స్వర్ణ పతకం కోసం పోటీపడాల్సి ఉంటుది. ఒకవేళ సెమీ ఫైనల్​లో లక్ష్య ఓడితే కాంస్యం కోసం ఆడాల్సి ఉంటుంది.

కాగా, ఈ ఒలింపిక్స్‌లో భారత స్టార్ ప్లేయర్లు పీవీ సింధు, సాత్విక్ సాయిరాజ్- చిరాగ్ శెట్టి జోడీ నిరాశపర్చారు. ప్రీ క్వార్టర్స్‌లో సింధు ఓడగా, క్వార్టర్స్‌లో సాత్విక్- చిరాగ్ శెట్టి జోడీ నిష్క్రమించింది. దీంతో భారతీయుల అంచనాలన్నీ ఆశలన్నీ లక్ష్యసేన్‌పైనే నెలకొన్నాయి. అంచనాలకు తగ్గట్లుగా లక్ష్యసేన్ సెమీస్‌కు చేరాడు. ఇక ప్రీ క్వార్టర్స్‌లో భారత్‌కే చెందిన హెచ్‌ఎస్‌ ప్రణయ్‌ను 21-12, 21-6తో లక్ష్య ఓడించి క్వార్టర్స్‌కు దూసుకెళ్లాడు.