కాన్పూర్ స్టేడియం సేఫ్ కాదట - మనోళ్లు సిక్స్ బాదితే ఆ స్టాండ్ కూలే ప్రమాదం? - Ind vs Ban 2nd Test

Ind vs Ban Kanpur Test 2024 : భారత్ - బంగ్లాదేశ్ మధ్య మరో రెండు రోజుల్లో కాన్పూర్ వేదికగా రెండో టెస్టు ప్రారంభం కానుంది. అయితే ప్రస్తుతం ఓ విషయం క్రికెట్ ఫ్యాన్స్​ను కంగారు పెడుతోంది.

Ind vs Ban Kanpur Test 2024 : బంగ్లాపై తొలి టెస్టులో భారీ విజయం సాధించి జోరుమీదున్న భారత్ రెండో మ్యాచ్​లోనూ నెగ్గి సిరీస్‌ను క్లీన్‌స్వీప్‌ చేయాలని భావిస్తోంది. ఈ టెస్టు సెప్టెంబర్ 27న ప్రారంభం కానుంది. దీనికి కాన్పుర్ క్రికెట్ స్టేడియం ఆతిథ్యమివ్వనుంది. ఈ నేపథ్యంలో ఓ విషయం క్రికెట్ ఫ్యాన్స్​ను కలవరపెడుతోంది. కాన్పూర్​ స్టేడియంలోని ఒక స్టాండ్‌ బలహీనంగా ఉందట. ఆ స్టాండ్​లో ప్రేక్షకులు పూర్తి స్థాయిలో నిండినట్లైతే అది కూలే ప్రమాదం ఉన్నట్లు తెలుస్తోంది.

కాన్పూర్‌ స్టేడియంలో చివరిసారిగా 2021లో టెస్టు మ్యాచ్ జరిగింది. ఆ తర్వాత భారత్- బంగ్లాదే తొలి టెస్టు మ్యాచ్. అయితే ఈ స్టేడియంలోని ఒక స్టాండ్‌ బలహీనంగా ఉన్నట్లు ఉత్తర్‌ప్రదేశ్‌ పబ్లిక్‌ వర్క్స్‌ డిపార్ట్‌మెంట్‌ (Public Works Department) వెల్లడించిందని ఒక జాతీయ మీడియా తన కథనంలో పేర్కొంది. ఆ స్టాండ్​లో క్రౌడ్ ఫుల్​గా నిండితే అది కూలిపోయే ప్రమాదముందని అధికారులు తెలిపినట్లు ఆ మీడియా వెల్లడించింది. అందుకే ఆ స్టాండ్‌లో 50శాతం కంటే తక్కువగా టికెట్లు అమ్ముతున్నట్లు పేర్కొంది.

'బాల్కనీ C స్టాండ్‌పై పీడబ్ల్యూడీ కొన్ని సమస్యలు లేవనెత్తింది. మేం కూడా వాటితో అంగీకరించాం. అందులో సగానికంటే ఎక్కువ టికెట్లు విక్రయించం. ఈ స్టాండ్‌ కెపాసిటీ 4,800 కాగా, అందులో 1700 టికెట్లు మాత్రమే అమ్మాలని మాకు చెప్పారు. మరమ్మతు పనులు రెండు రోజుల పాటు కొనసాగుతాయి' అని యూపీ క్రికెట్‌ అసోసియేషన్‌ సీఈవో అంకిత్‌ ఛటర్జీ చెప్పినట్లు తెలుస్తోంది.

బాల్కనీ C పరిస్థితి ఆందోళనకరంగా ఉందని ఇంజినీర్ల బృందం అక్కడ చాలా సేపు పరిశీలించిందట. అలాగే మ్యాచ్‌ జరిగే సమయంలో దానిని మూసివేయాలని యూపీ క్రికెట్‌ అసోసియేషన్‌ను పీడబ్లూడీ ఇంజినీర్‌ హెచ్చరించినట్లు సమాచారం తెలుస్తోంది. 'ఒకవేళ రిషభ్‌ పంత్‌ సహా మన బ్యాటర్లు సిక్స్‌ కొడినప్పడు ఫ్యాన్స్​ ఎగిరి గంతేస్తే, 50 మంది ప్రేక్షకుల బరువును కూడా ఈ స్టాండ్‌ మోయలేదు. వెంటనే మరమ్మతులు చేయాలి' అని ఓ ఇంజినీర్‌ చెప్పినట్లు ఆ మీడియా తన కథనంలో ఉంది.

కాగా, ఈ టెస్టుకు ఎలాంటి జట్టులో మార్పుల్లేకుండా టీమ్ఇండియా బరిలో దిగేే ఛాన్స్ ఉంది. కెప్టెన్ రోహిత్ శర్మ, విరాట్ కోహ్లీ ఈ మ్యాచ్​లోనైనా ఫామ్ అందుకుంటే టీమ్ఇండియాకు భారీ స్కోర్ ఖాయం. ఇక యంగ్ బ్యాటర్లు శుభ్​మన్ గిల్, యశస్వీ జైస్వాల్, రిషభ్ పంత్ తమ ఫామ్ కొనసాగిస్తే బంగ్లా బౌలర్లకు కష్టాలు తప్పవు.