లఖ్​నవూ కెప్టెన్సీ - కీలక కామెంట్స్ చేసిన సంజీవ్ గోయెంకా!

రిషభ్ పంత్ తమ జట్టుతో రాబోయే 10-12 సంవత్సరాలు ఉంటాడని ఆశిస్తున్నట్లు పేర్కొన్న లఖ్‌నవూ యజమాని సంజీవ్ గొయెంకా.

IPL 2025 Rishabh Pant Captaincy : లఖ్​నవూ సూపర్ జెయింట్స్ జట్టు కూర్పుపై ఆ ఫ్రాంచైజీ సహ యజమాని, వ్యాపారవేత్త సంజీవ్ గోయెంకా కీలక వ్యాఖ్యలు చేశారు. తమ జట్టులో రిషభ్ పంత్, పూరన్, మార్ క్రమ్, మిచెల్ మార్ష్ అనే నలుగురు నాయకులు ఉన్నారని వ్యాఖ్యానించారు. బలమైన మిడిల్ ఆర్డర్​ను నిర్మించడమే లఖ్​నవూ లక్ష్యమని తెలిపారు. లఖ్​నవూ టీమ్ చాలా బలంగా ఉందని అభిప్రాయపడ్డారు.

'అది ప్రణాళికలో భాగమే' - "లఖ్​నవూ క్యాంపులో నలుగురు నాయకులు ఉన్నారు. ఐపీఎల్ మెగావేలంలో దక్కించుకున్న ప్లేయర్ల విషయంలో సంతోషంగా ఉన్నాం. వేలంలో భారత పేసర్లను ఎక్కువగా తీసుకోవడం ఫ్రాంచైజీ ప్రణాళికలో భాగమే. మెగావేలాన్ని అద్భుతంగా మలుచుకున్నాం. మిడిలార్డర్, ఫినిషర్లతో జట్టును పటిష్ఠం చేయడంపై దృష్టి సారిస్తాం. నెంబర్ 3 నుంచి నంబర్ 8 వరకు మా టీమ్ చాలా స్ట్రాంగ్​గా ఉంది. అంతర్జాతీయ పేస్​కు బదులుగా పూర్తిగా భారత పేస్, విధ్వంసరకర విదేశీ బ్యాటర్లతో జట్టును కూర్పు చేశాం." అని ఆకాశ్ చోప్రా యూట్యూబ్ ఛానెల్​కు ఇచ్చిన ఇంటర్వ్యూలో సంజీవ్ గోయెంకా వ్యాఖ్యానించారు.

'వారిది అదే మనస్తత్వం' - రిషభ్, పూరన్, మార్ క్రమ్, మిచెల్ మార్ష్ వంటి బలమైన నాయకత్వంలో లఖ్ నవూ జట్టు నిండి ఉందని గోయెంకా వ్యాఖ్యానించారు. వీరందరూ గెలవాలనే మనస్తత్వంతో ఉన్న ఆటగాళ్లని కొనియాడారు. అందుకే లఖ్​నవూ టీమ్ పట్ల సంతోషంగా ఉన్నామని పేర్కొన్నారు. అయితే ఏ జట్టుకు పదికి 10 మంది సరైన ఆటగాళ్లు కుదురరని అభిప్రాయపడ్డారు. రిషభ్ పంత్ వచ్చే 10-12 ఏళ్ల లఖ్ నవూ సూపర్ జెయింట్స్ తరఫున ఆడతాడని ఆశిస్తున్నానని సంజీవ్ గోయెంకా వ్యాఖ్యానించారు.

లఖ్ నవూ సూపర్ జెయింట్స్ జట్టు - వేలంలో దక్కించుకున్న ఆటగాళ్లు - రిషభ్‌ పంత్ (రూ.27 కోట్లు), అవేశ్‌ ఖాన్ (రూ.9.75 కోట్లు), ఆకాశ్ దీప్‌ (రూ.8 కోట్లు), డేవిడ్ మిల్లర్ (రూ.7.50 కోట్లు), అబ్దుల్ సమద్ (రూ.4.20 కోట్లు), మిచెల్ మార్ష్‌ (3.40 కోట్లు), షాబాజ్‌ అహ్మద్‌ (రూ.2.40 కోట్లు), ఐడెన్ మార్‌క్రమ్ (రూ.2 కోట్లు), మ్యాధ్యూ బ్రీట్జ్‌(రూ.75లక్షలు), షామార్ జోసెఫ్‌ (రూ.75 లక్షలు), యం. సిద్ధార్థ్‌ (రూ.75 లక్షలు), అర్షిన్‌ కులకర్ణి(రూ.30లక్షలు), రాజ్‌వర్ధన్‌(రూ.30లక్షలు), యువరాజ్ చౌదరి (రూ. 30 లక్షలు), ప్రిన్స్‌ యాదవ్ (రూ.30 లక్షలు), ఆకాశ్ సింగ్ (రూ.30 లక్షలు), దిగ్వేష్ సింగ్ (రూ.30 లక్షలు), హిమ్మత్ సింగ్ (రూ.30 లక్షలు), ఆర్యన్ జుయల్ (రూ.30 లక్షలు)

రిటైన్ ప్లేయర్స్ - నికోలస్ పూరన్ (రూ.21 కోట్లు), రవి బిష్ణోయ్ (రూ.11 కోట్లు), మయాంక్ యాదవ్ (రూ.11 కోట్లు), మోసిన్ ఖాన్ (రూ.4 కోట్లు), ఆయుష్‌ బదోని (రూ.4 కోట్లు)