IPL 2024 Kolkata Knight Riders vs Rajasthan Royals : ఐపీఎల్ 2024లో భాగంగా తాజాగా జరిగిన ఉత్కంఠ మ్యాచ్లో కోల్కతాపై రాజస్థాన్ రాయల్స్ 2 వికెట్ల తేడాతో గెలిచింది. 224 పరుగుల లక్ష్యంతో బరిలోకి దిగిన రాజస్థాన్ చివరి బంతికి ఒక పరుగు అవసరమైన సమయంలో లక్ష్యాన్ని ఛేదించింది. మొదటి నుంచి చివరి వరకు క్రీజులో ఉన్న బట్లర్(107 నాటౌట్) సెంచరీతో చెలరేగి జట్టుకు విజయాన్ని అందించాడు. అతడే టాప్ స్కోరర్గా నిలిచాడు. యశస్వి జైశ్వాల్(19), సంజు శాంసన్(12), రియాన్ పరాగ్(34), ధ్రువ్ జురెల్(2), రవిచంద్రన్ అశ్విన్(2), రోమన్ పోవెల్(26) పరుగులు చేశారు. హర్షిత్ రానా, సునీల్ నైరన్, వరుణ్ చక్రవర్తి తలో రెండు వికెట్లు తీయగా వైభవ్ అరోరా ఓ వికెట్ దక్కించుకున్నాడు.
అంతకుముందు మొదట బ్యాటింగ్ చేసిన కోల్కతా నైట్ రైడర్స్ భారీ స్కోరు చేసింది. నిర్ణీత 20 ఓవర్లలో 6 వికెట్ల నష్టానికి 223 పరుగులు సాధించింది. కోల్కతా బ్యాటర్లలో సునీల్ నరైన్ సెంచరీతో మెరిశాడు. చివరలో రింకూ సింగ్ (20) కూడా మెరిశాడు. కేవలం 9 బంతుల్లోనే 20 పరుగులు సాధించాడు. ఫిల్ స్టాల్ (10), శ్రేయస్ అయ్యర్ (11), రస్సెల్ (13), వెంకటేశ్ అయ్యర్ (8) పరుగులు చేశారు. రాజస్థాన్ బౌలర్లలో అవేశ్ ఖాన్, కుల్దీప్ సేన్ తలో 2 వికెట్లు తీయగా, ట్రెంట్ బౌల్ట్, చాహల్ తలో వికెట్ దక్కించుకున్నారు.
రాజస్థాన్ బౌలర్లకు చుక్కలు(Sunil Narine IPL Century) - ఈ మ్యాచ్లో ఓపెనర్ సునీల్ నరైన్ అద్భుతమైన సెంచరీతో మెరిశాడు. తన ధనాధన్ ఇన్నింగ్స్తో రాజస్థాన్ బౌలర్లకు చుక్కలు చూపించాడు. కేవలం 49 బంతుల్లో 11 ఫోర్లు, 6 సిక్స్‌ల సాయంతో సెంచరీ మార్క్‌ను అందుకున్నాడు. మొత్తంగా ఈ మ్యాచ్లో 56 బంతులు ఎదుర్కొన్న అతడు 13 ఫోర్లు, 6 సిక్స్‌ల సాయంతో 109 పరుగులు ఖాతాలో వేసుకున్నాడు. నరైన్‌కు ఇదే ఫస్ట్ ఐపీఎల్ సెంచరీ కావడం విశేషం.
ఈ ప్రదర్శనతో ఐపీఎల్లో సెంచరీ బాదిన మూడో కేకేఆర్‌ ప్లేయర్గానూ నిలిచాడు. ఐపీఎల్లో అత్యధిక వ్యక్తిగత స్కోర్‌ సాధించిన రెండో ఆటగాడిగాను (109) నిలిచాడు. ఈ లిస్ట్లో న్యూజిలాండ్‌ క్రికెట్‌ దిగ్గజం బ్రెండన్‌ మెక్‌కల్లమ్‌(158) అగ్ర స్ధానంలో కొనసాగుతున్నాడు.
