దేశ‌వాళీ క్రికెట్‌లోకి హార్దిక్​ - మ‌ళ్లీ ఆ జెర్సీ వేసుకునేందుకు ప్లాన్​! - Hardik Pandya Test Cricket

Hardhik Pandya Test Cricket : టీ20 వ‌ర‌ల్డ్ క‌ప్ హీరో హార్దిక్ పాండ్యా టెస్టులకు దూరమైన సంగతి తెలిసిందే. అయితే ఇప్పుడతడు పున‌రాగ‌మ‌నం కోసం ఎదురుచూస్తున్నాడు. పూర్తి వివరాలు స్టోరీలో.

Hardhik Pandya Test Cricket : టీ20 వ‌ర‌ల్డ్ క‌ప్ హీరో, భారత స్టార్ ఆల్​ రౌండర్ హార్దిక్ పాండ్యా టెస్టులకు దూరమైన సంగతి తెలిసిందే. వన్డేలు, టీ20ల్లో అదరగొట్టేస్తున్న అతడు సుదీర్ఘ ఫార్మాట్‌లో మాత్రం ఆడటం లేదు. అయితే ఇప్పుడతడు పున‌రాగ‌మ‌నం కోసం ఎదురు చూస్తున్నాడని తెలుస్తోంది. ఈ మధ్య అతడికి సంబంధించి సోషల్ మీడియాలో వైరల్‌గా మారిన వీడియోలే ఈ విషయాన్ని చెబుతున్నాయి.

ప్రస్తుతం బంగ్లాదేశ్​తో జరుగుతున్న టెస్ట్​​​ సిరీస్​కు ఎంపికవ్వని హార్దిక్​ పాండ్య రెడ్ బాల్ క్రికెట్‌పై ఫోకస్ పెట్టినట్లు క్రికెట్ వర్గాలు కూడా అంటున్నాయి. 2018లో చివరి సారిగా టెస్టు ఆడాడు హార్దిక్​. అయితే అతడు​ మ‌ళ్లీ తెలుపు జెర్సీ వేసుకోవాల‌ని భావిస్తున్నాడట.

ఆ మధ్య ఇంగ్లాండ్​లో ఉన్న పాండ్య ఎర్ర బంతితో ప్రాక్టీస్ కూడా చేశాడు. అయితే ఇప్పుడీ ఆల్​ రౌండర్​ బ‌రోడా జ‌ట్టు త‌ర‌ఫున దేశ‌వాళీ క్రికెట్ ఆడేందుకు సన్నద్ధమవుతున్నాడని తెలిసింది. తాజాగా అత‌డు నెట్స్‌లో బ్యాటింగ్, బౌలింగ్ సాధ‌న చేస్తూ క‌నిపించాడు. కాగా, చివరిసారిగా 2018లో బ‌రోడాకు ఆడిన పాండ్యా దాదాపు ఐదేళ్ల గ్యాప్ త‌ర్వాత మ‌ళ్లీ ఆ జ‌ట్టుతో క‌లుస్తాడ‌ని క్రికెట్ వర్గాలు అంటున్నాయి. ఇప్పటి వరకు హార్దిక్ పాండ్య 11 టెస్టుల్లో 523 పరుగులు చేసి 17 వికెట్లు పడగొట్టాడు.

దేశవాళీలో ఆడాల్సిందే - టెస్టు జ‌ట్టులోకి రావాలంటే ఫిట్‌నెస్ నిరూపించుకోవాలి. కాబట్టి దేశవాళీలో మ్యాచ్‌లు ఆడాల్సిందేన‌ని ఈ ఏడాది ఆటగాళ్లకు బీసీసీఐ ఆదేశాలు జారీ చేసింది. పైగా బంగ్లాదేశ్‌తో రెండు టెస్ట్​ మ్యాచుల సిరీస్ ముగియగానే టీమ్​ఇండియా స్వ‌దేశంలోనే న్యూజిలాండ్‌తో మూడు టెస్టుల సిరీస్​ ఆడ‌నుంది. అనంతరం న‌వంబ‌ర్‌లో బోర్డ‌ర్​ – గవాస్క‌ర్ ట్రోఫీ కోసం ఆస్ట్రేలియా వెళ్ల‌నుంది. అక్క‌డ ఐదు టెస్టు మ్యాచ్‌ల సిరీస్‌లో ఆస్ట్రేలియాతో తలపడనుంది. ఈ రెండు సిరీస్‌ల‌కు అందుబాటులో ఉండడం కోసం హార్దిక్​, బరోడా త‌ర‌ఫున దేశ‌వాళీ మ్యాచ్‌లు ఆడాల‌ని నిర్ణ‌యించుకున్నాడట. అందుకే హార్దిక్​ టెస్టు జ‌ట్టులో చోటు కోసం దేశ‌వాళీ క్రికెట్‌ను ఆడనున్నాడు.