సొంత రికార్డ్​ బ్రేక్ చేసే ఛాన్స్- ఆ ఫీట్​కు అతి చేరువలో విరాట్ కోహ్లీ - IPL 2024

Virat Kohli IPL Records: : ఐపీఎల్ 2024లో 14 మ్యాచ్‌లలో 708 పరుగులు చేసిన కోహ్లీ ఆరెంజ్ క్యాప్‌తో అత్యధిక పరుగులు చేసిన ప్లేయర్​గా కొనసాగుతున్నాడు. ఈ సీజన్‌లో దూకుడుగా సాగిపోతున్న విరాట్​ను పలు రికార్డులు ఊరిస్తున్నాయి.

Virat Kohli IPL Records: ఇండియన్ ప్రీమియర్ లీగ్ (ఐపీఎల్)లో రాయల్ ఛాలెంజర్స్ బెంగళూరు మంచి కమ్​బ్యాక్ ఇచ్చింది. ఉత్కంఠ భరితంగా సాగిన లీగ్ దశను దాటుకుని ప్లేఆఫ్స్​లోకి అడుగుపెట్టింది. తొలి 8 మ్యాచ్‌లలో ఒక్కటే గెలిచినా, ఆ తర్వాత జరిగిన ఆరు మ్యాచ్‌లలో వరుస విజయాలు నమోదు చేసి, ఐపీఎల్ పాయింట్ల పట్టికలో టాప్ 4 స్థానం దక్కించుకుంది. విరాట్ కోహ్లీ అద్భుతమైన ఫామ్ జట్టును ఈ స్థాయికి చేర్చిందనడంలో సందేహం లేదు.

ఐపీఎల్ 2024లో 14 మ్యాచ్‌లలో 708 పరుగులు చేసిన కోహ్లీ ఆరెంజ్ క్యాప్‌తో అత్యధిక పరుగులు చేసిన ప్లేయర్​గా నిలిచాడు. అందులో ఐదు హాఫ్ సెంచరీలు, ఒక సెంచరీ కూడా ఉన్నాయి. వీటిని బట్టే తెలుస్తుంది కదా విరాట్ బెంగళూరు బ్యాటింగ్ విభాగానికి వెన్నెముక లాంటోడని, ప్రతి మ్యాచ్‌లో నిలకడైన బ్యాటింగ్ తీరు ఆర్సీబీకి కలిసొస్తుంది.

ఈ సీజన్‌లో దూకుడుగా సాగిపోతున్న విరాట్​ను ఓ అరుదైన ఘనత ఊరిస్తోంది. తన రికార్డ్ తానే బ్రేక్ చేసుకునే ఛాన్స్ ఉంది. ఐపీఎల్​లో ఓ సీజన్​లో అత్యధిక పరుగులు బాదిన ప్లేయర్​గా విరాట్ కొనసాగుతున్నాడు. 2016లో విరాట్ 973 పరుగుల చేశాడు. ఐపీఎల్ చరిత్రలో సింగిల్ సీజన్​లో ఓ బ్యాటర్ బాదిన అత్యధిక పరుగులు ఇవే.

కాగా, ప్రస్తుత సీజన్​లో కోహ్లీ ఇప్పటివరకు 708 పరుగుల చేశాడు. తన సొంత రికార్డ్ బ్రేక్ చేయాలంటే మరో 266 పరుగులు సాధించాల్సి ఉంది. అయితే ఆర్సీబీ టైటిల్ నెగ్గాలంటే వరుసగా మూడు మ్యాచ్​ల్లో విజయం సాధించాలి. మరి చూడాలి విరాట్ తన సొంత రికార్డ్​ను బ్రేక్ చేస్తాడా? లేదా? మరోవైపు ఐపీఎల్​లో 8 వేల పరుగులు పూర్తి చేయడానికి 29 రన్స్​ అవసరం. బుధవారం రాజస్థాన్​తో ఎలిమినేటర్ మ్యాచ్​లోనే ఈ ఫీట్ సాధించే అవకాశం ఉంది.

ఈ పరుగుల యంత్రం ప్రభంజనంతో ప్లేఆఫ్స్‌లో మంచి స్కోరు లభిస్తుందని ఆర్సీబీ భావిస్తోంది. రాజస్థాన్ రాయల్స్ తో జరిగే మ్యాచ్‌తో ప్లే ఆఫ్స్‌ను ఆరంభించనున్నారు. ప్రస్తుత సీజన్ లో కోహ్లీ నమోదు చేసిన ఏకైక సెంచరీ ఈ జట్టు మీదే. ఇంకొక విషయమేంటంటే, వరుస మ్యాచ్‌లు గెలుస్తూ ప్లేఆఫ్స్‌లోకి అడుగుపెట్టిన బెంగళూరు ఒకవైపు, నాలుగు పరాజయాలను చవిచూసి ప్లేఆఫ్స్ లోకి చేరిన రాజస్థాన్ మరోవైపు తలపడనున్నాయి. ఈ మ్యాచ్ మే22న నరేంద్ర మోదీ స్టేడియం వేదికగా జరగనుంది.

ఈ మ్యాచ్ లో విజయం సాధించాలంటే కోహ్లీ ఫామ్ చాలా కీలకం. అన్ని విభాగాల్లో రాణించి ఎలిమినేటర్ మ్యాచ్ గెలిస్తే క్వాలిఫైయర్ 2లోకి అడుగుపెట్టగలరు. క్వాలిఫైయర్ 1లో ఓటమికి గురైన సన్ రైజర్స్ హైదరాబాద్‌తో క్వాలిఫైయర్ 2లో పోరాడి గెలిస్తే ఫైనల్స్‌కు చేరుకుని కోల్‌కతాతో తలపడే అవకాశం ఉంది. ఇప్పటివరకూ ఆర్సీబీ ఒక్క ఐపీఎల్ టైటిల్ కూడా గెలుచుకోకపోవడంతో ఈ సారైనా సాధిస్తుందని, 'కప్ నమ్‌దే' అంటూ అభిమానులు ఆశగా ఎదురుచూస్తున్నారు