Weekly Horoscope From November 3rd To November 9th : 2024 నవంబర్ 3వ తేదీ నుంచి నవంబర్ 9వ తేదీ వరకు మీ రాశి ఫలం ఎలా ఉందంటే ?
మేషం (Aries) : మేషరాశి వారికి ఈ వారం మిశ్రమ ఫలితాలు ఉంటాయి. వృత్తి వ్యాపారాలలో పని ఒత్తిడి అధికంగా ఉంటుంది. చేపట్టిన పనుల్లో విజయం సాధించాలంటే వృత్తి పట్ల అంకితభావం, చిత్తశుద్ధి అవసరం. వర్కింగ్ ఉమెన్స్కు ఇంటా బయట సవాళ్లు ఎదురయినా కుటుంబ సభ్యుల మద్దతుతో అధిగమిస్తారు. వ్యాపారంలో టెక్నికల్ సమస్యలు అధికంగా ఉండడం వల్ల లాభాల ఆర్జించడం కత్తిమీద సాములా మారుతుంది. విదేశాలలో కెరీర్ లేదా వ్యాపారాన్ని ప్రారంభించే వారికి కొన్ని అడ్డంకులు ఎదురవుతాయి. కుటుంబంలో సంతోషం నెలకొనాలంటే జీవిత భాగస్వామి అవసరాలకు ప్రాధాన్యత ఇవ్వడం చాలా ముఖ్యం. తరచూ అనారోగ్య సమస్యలు వేధిస్తాయి. నిరుద్యోగులు మెరుగైన ఉద్యోగం సాధించడానికి తీవ్రమైన కృషి అవసరం. కనకధారాస్తోత్రం పారాయణ చేస్తే శుభ ఫలితాలు ఉంటాయి.
వృషభం (Taurus) : వృషభరాశి వారికి ఈ వారం సామాన్యంగా ఉంటుంది. ఈ వారం వృత్తి పరంగా ఈ రాశి వారికి కొన్ని ఊహించని సవాళ్లు ఎదురవుతాయి. వ్యాపార కార్యకలాపాలలో కూడా చేసే ప్రయత్నాలలో ఒడిదుడుకులను ఎదుర్కొంటారు. ఊహించని ప్రయాణాలు ఉండే అవకాశముంది. తొందరపాటు లేకుండా జాగ్రత్తగా నిదానంగా ఆలోచిస్తే సమస్యలకు పరిష్కారం లభిస్తుంది. ఉద్యోగులు కెరీర్లో ముందుకు వెళ్లడానికి అంకితభావం, అదనపు కృషి అవసరం. పదోన్నతుల లక్ష్యాలను చేరుకోవడానికి సహచరులు, ఉన్నతాధికారులతో సన్నిహితంగా మెలగవలసి ఉంటుంది. గ్రహసంచారం అనుకూలంగా లేదు కాబట్టి మీ ఆస్తుల భద్రతపై దృష్టి సారించండి. పోటీ పరీక్షలకు సన్నద్ధమవుతున్న విద్యార్థులు విజయం సాధించడానికి గణనీయమైన కృషి చేయాలి. జీవితభాగస్వామితో విభేదాలు సమసిపోతాయి. ఆరోగ్యం పట్ల శ్రద్ధ అవసరం. శివారాధన శ్రేయస్కరం.
మిథునం (Gemini) : మిథున రాశి వారికి ఈ వారం మిశ్రమ ఫలితాలు ఉంటాయి. వారం ప్రారంభంలో రాజకీయంగా, సామాజికంగా పలుకుబడి ఉన్న వ్యక్తుల సహాయంతో వృత్తి వ్యాపారాలలో గణనీయమైన పురోగతి సాధిస్తారు. వృత్తి పరంగా ఎదగడానికి సంపూర్ణ సహాయం అందుకుంటారు. అసూయపరుల నుంచి ఆపదలు ఉండవచ్చు కాబట్టి జాగ్రత్త వహించండి. ఆస్తి, గృహ నిర్మాణాలకు సంబంధించిన వివాదాలు సామరస్యంగా పరిష్కారం అవుతాయి. వ్యాపారులు వ్యాపారంలో రాణించాలంటే ముందుగా ఆర్థిక సమస్యలను పరిష్కరించుకుని ముందుకు సాగడం మంచిది. పెట్టుబడులు పెట్టేముందు అనుభవజ్ఞుల సలహా తీసుకోండి. విద్యార్థులు పోటీ పరీక్షలలో విజయం సాధిస్తారు. ప్రేమ వ్యవహారాలు పెళ్లి పీటలెక్కుతాయి. జీవిత భాగస్వామితో మంచి సమయాన్ని గడుపుతారు. విహారయాత్రలకు వెళతారు. ఆరోగ్యం సహకరిస్తుంది. ఇష్ట దేవతారాధన శుభకరం.
కర్కాటకం (Cancer) : కర్కాటక రాశి వారికి ఈ వారం అనుకూలంగా ఉంటుంది. అన్ని రంగాల వారు వృత్తి వ్యాపారాలలో వారం ప్రారంభంలో గణనీయమైన పురోగతిని చూడవచ్చు. మితిమీరిన ఆత్మవిశ్వాసం పనికిరాదు. హై-రిస్క్ ఇన్వెస్ట్‌మెంట్‌ల కు దూరంగా లేకుంటే మీ ఆర్థిక పరిస్థితి దిగజారవచ్చు. ఉద్యోగంలో పదోన్నతులు, కోరుకున్న చోటికి బదిలీ కోరుకునేవారు కలలు నిజమవుతాయి. మీ పనితీరుకు ఉన్నతాధికారుల ప్రశంసలు లభిస్తాయి. స్థిరాస్తుల కొనుగోలు, అమ్మకాలు లాభదాయకంగా ఉంటాయి. కుటుంబంలో ముఖ్యమైన నిర్ణయాలు తీసుకునే విషయంలో కుటుంబ సభ్యుల మద్దతు ఉంటుంది. విదేశాలలో కెరీర్ కొనసాగించడానికి, వ్యాపార విస్తరణకు ఉన్న అడ్డంకులు తొలగిపోతాయి. వారం చివరలో స్నేహితులు, కుటుంబ సభ్యులతో విహారయాత్రలకు వెళతారు. వైవాహిక జీవితం ఆనందంగా ఉంటుంది. అనారోగ్య సమస్యలు ఉండవచ్చు. సూర్య ఆరాధన శ్రేయస్కరం.
సింహం (Leo) :సింహరాశి వారికి ఈ వారం సామాన్యంగా ఉంటుంది. ఈ రాశి వారికి ఈ వారం అనారోగ్య సమస్యల కారణంగా వృత్తి పరంగా ఆటంకాలు ఏర్పడతాయి. ఒక ముఖ్యమైన అవకాశాన్ని కూడా కోల్పోయే ప్రమాదముంది. ఆరోగ్యం పట్ల శ్రద్ధ వహించండి. గ్రహసంచారం ప్రతికూలంగా ఉన్నందున అనుకూల శత్రువుల భయం ఎక్కువగా ఉంటుంది. నమ్మించి మోసం చేసేవారి పట్ల జాగ్రత్తగా ఉండటం కూడా చాలా ముఖ్యం. ఆస్తి, భూవివాదాలు సంబంధించిన సవాళ్లను ఎదుర్కోవచ్చు. ఉద్యోగులు పనిపట్ల శ్రద్ధతో లేకపోతే ప్రమాదం. జాగ్రత్తగా ఉండాలి. జీవిత భాగస్వామి అభిప్రాయాలకు విరుద్ధంగా వెళ్తే వివాదాలు ఏర్పడవచ్చు. సొంత నిర్ణయాలు కాకుండా సమష్టి నిర్ణయాలకు ప్రాధాన్యత ఇస్తే మంచిది. ఆదిత్య హృదయం పారాయణ చేస్తే ప్రతికూలతలు తొలగిపోతాయి.
కన్య (Virgo) : కన్యారాశి వారికి ఈ వారంలో శుభఫలితాలు ఉంటాయి. అన్ని రంగాల వారికి ఈ వారం వృత్తి పరంగా, వ్యక్తిగతంగా శుభ ప్రారంభాలు, అనుకూల ఫలితాలు ఉంటాయి. వారం ప్రారంభంలో గత విజయాలకు గుర్తింపు పొందవచ్చు. వృత్తి పరంగా ముఖ్యమైన బాధ్యతలు స్వీకరిస్తారు. షేర్ మార్కెట్లో పెట్టుబడులు పెట్టినవారు మార్కెట్ పెరుగుదలతో ప్రయోజనం పొందే అవకాశం ఉంటుంది. ఆదాయం వృద్ధి చెందుతుంది. సామాజికంగా మీ కీర్తి పెరుగుతుంది. వ్యాపారులకు ఈ వారం బ్రహ్మాండంగా ఉంది. ఊహించని లాభాలను అందుకుంటారు. వ్యాపారాన్ని విస్తరించాలని కోరుకునే వారి కోరిక నెరవేరవచ్చు. కెరీర్ లో మార్పు కోరుకునే వారు వారం చివరలో ప్రతిష్టాత్మక కంపెనీ నుంచి జాబ్ ఆఫర్‌ను అందుకోవచ్చు. ఇంటి అలంకరణ కోసం విలాసవంతమైన వస్తువులను కొనుగోలు చేస్తారు. జీవిత భాగస్వామితో ఆనందంగా గడుపుతారు. కుటుంబంలో సుఖశాంతులు నెలకొంటాయి. శివపార్వతుల ఆలయ సందర్శన శుభప్రదం.
తుల (Libra) : తులారాశి వారికి ఈ వారం మిశ్రమ ఫలితాలు ఉంటాయి. అన్ని రంగాల వారికి వృత్తి వ్యాపారాలలో పనిభారం ఎక్కువగా ఉంటుంది. తీరికలేని పనులతో విశ్రాంతి లోపిస్తుంది. ప్రతికూల ఆలోచనలు వీడి ప్రశాంతంగా ఉండటం ముఖ్యం. ఒక చట్టపరమైన సమస్యలో చిక్కుకునే అవకాశముంది. జాగ్రత్తగా ఉండండి. తోబుట్టువులతో విభేదాల కారణంగా ఒత్తిడికి లోనవుతారు. కుటుంబ సమస్యలకు సంబంధించిన చర్చలలో సంయమనం పాటించడం అవసరం. వారం చివరలో వృత్తి పరంగా ప్రయాణాలు చేయాల్సి ఉంటుంది. ఆదాయాలు ఆశించిన మేరకు ఉండకపోవచ్చు. ఖర్చులు అదుపు తప్పుతాయి. ప్రేమ, పెళ్లి వ్యవహారాలలో తొందరపాటు పనికిరాదు. ఆరోగ్యం సామాన్యంగా ఉంటుంది. శివాష్టకం పఠిస్తే మెరుగైన ఫలితాలు ఉంటాయి.
వృశ్చికం (Scorpio) : వృశ్చికరాశి వారికి ఈ వారం అనుకూలంగా ఉంటుంది. వారం ప్రారంభంలో అన్ని రంగాలవారికి వృత్తి పరంగా శుభ ఫలితాలు ఉంటాయి. వృత్తి పట్ల మీరు చూపే అంకిత భావానికి ప్రశంసలు అందుకుంటారు. ఇన్ని రోజుల మీ కష్టానికి ప్రతిఫలం దక్కుతుంది. కెరీర్, వ్యాపారం అభివృద్ధి పథంలో దూసుకెళ్తాయి. ప్రియమైన వారి నుంచి విలువైన కానుకలు అందుకుంటారు. ఉద్యోగులు మీ పురోగతిని అడ్డుకునే ప్రత్యర్థుల పట్ల జాగ్రత్తగా ఉండాలి. విద్యార్థులు చదువుపై అధిక శ్రద్ధ పెట్టాలి. ప్రేమ వ్యవహారాలలో ఇతరుల జోక్యం కూడదు. వారం చివరలో జీవిత భాగస్వామితో తీర్థయాత్రలకు వెళ్తారు. ఆరోగ్యం పట్ల శ్రద్ధ అవసరం. శ్రీ విష్ణు సహస్రనామ పారాయణ శుభకరం.
ధనుస్సు (Sagittarius) : ధనుస్సురాశి వారికి ఈ వారం ఫలవంతంగా ఉంటుంది. మీ తెలివితేటలు, శక్తిసామర్థ్యాలను మొత్తం వెచ్చించి తిరుగులేని విజయాలను సాధిస్తారు. ఆర్థికంగా ఉన్నత స్థాయికి చేరుకుంటారు. సమాజంలో ప్రభావవంతమైన వ్యక్తుల పరిచయం వృత్తి పరంగా ఎదగడానికి ఉపయోగపడుతుంది. నూతన అవకాశాలను అందుకుంటారు. అదనపు ఆదాయ వనరులు ఏర్పడతాయి. అవివాహితులకు వివాహం నిశ్చయమవుతుంది. ఆరోగ్యంపై శ్రద్ధ అవసరం. వాహన ప్రమాదాలు జరిగే అవకాశముంది కాబట్టి జాగ్రత్తగా ఉండండి. శనిస్తోత్రం పారాయణ చేస్తే ఆపదల నుంచి గట్టెక్కుతారు.
మకరం (Capricorn) : మకరరాశి వారికి ఈ వారం మిశ్రమ ఫలితాలు ఉంటాయి. వృత్తి వ్యాపారాలలో ఆశించిన పురోగతి ఉంటుంది. ఉద్యోగులు తీవ్రమైన కృషితో పదోన్నతులు పొందుతారు. కొత్త ప్రాజెక్టులు మొదలు పెట్టడానికి ఈ వారం అనుకూలంగా ఉంది. వ్యాపారులు భాగస్వాముల సహకారంతో వ్యాపారాన్ని విస్తరిస్తారు. వ్యాపారంలో ఊహించని సవాళ్లు ఎదురవుతాయి. అనుకోని ఖర్చులు కారణంగా ఆర్థిక పరిస్థితి దిగజారుతుంది. నిరుద్యోగులు కోరుకున్న ఉద్యోగాన్ని పొందడానికి మరికొంతకాలం వేచి చూడాలి. జీవిత భాగస్వామితో విభేదాలు వివాదాలకు దారితీయకుండా చూసుకోండి. కుటుంబ సమస్యలు పరిష్కారానికి చొరవ చూపించండి. ఇంట్లో పెద్దవారి ఆరోగ్యం ఆందోళన కలిగిస్తుంది. శివారాధన శ్రేయస్కరం.
కుంభం (Aquarius) : కుంభరాశి వారికి ఈ వారం సామాన్యంగా ఉంటుంది. ఈ రాశి వారు ఈ వారం మాటలను అదుపులో ఉంచుకోవడం అవసరం. పనిపట్ల చిత్తశుద్ధి, శ్రద్ధ ఉండాలి. పనులను వాయిదా వేయడం మంచిది కాదు. ఎప్పటి పనులు అప్పుడే పూర్తి చేసుకోవడం వలన సమయం డబ్బు రెండు ఆదా అవుతాయి. భూమి స్థిరాస్తి వివాదాలను చట్టపరంగా కాకుండా శాంతియుత చర్చల ద్వారా పరిష్కరించుకోవడం ఉత్తమం. వ్యాపార సంబంధిత కార్యకలాపాలకు ఈ వారం అంత అనుకూలంగా కాదు. వ్యాపారంలో పోటీ సవాళ్లు ఎదురవుతాయి. గ్రహ సంచారం అనుకూలంగా లేనందున ఆర్థిక వ్యవహారాల్లో అప్రమత్తంగా ఉండటం ముఖ్యం. భవిష్యత్తు ఆర్థిక అవసరాల కోసం తెలివిగా పెట్టుబడులు పెట్టడం కీలకం. ప్రయాణంలో అప్రమత్తంగా ఉండాలి. ఆరోగ్యంపై శ్రద్ధ వహించండి. జీవిత భాగస్వామి అభిప్రాయాలకు విలువ ఇవ్వడం ద్వారా కుటుంబంలో సంతోషం నెలకొంటుంది. ఇష్ట దేవతారాధన మేలు చేస్తుంది.
మీనం (Pisces) : మీనరాశి వారికి ఈ వారం విజయవంతంగా ఉంటుంది. అన్ని రంగాలవారికి ఈ వారం కార్యసిద్ధి, ఆర్థికవృద్ధి ఉంటాయి. అదృష్టం వరించి చేపట్టిన ప్రతి పనిలోనూ విజయం చేకూరుతుంది. వ్యాపారంలో ఎదురయ్యే సవాళ్లను అధిగమిస్తే విజయం మీ సొంతం. ఉద్యోగులు స్వబుద్ధితో, సొంత నిర్ణయాలతో పనిచేస్తే శుభఫలితాలు ఉంటాయి. ఉన్నతాధికారులతో సత్సంబంధాలు పెంచుకుంటే మంచిది. జీతం పెరుగుదల ద్వారా అదనపు ఆదాయానికి అవకాశం ఉంది. వ్యాపారవేత్తలకు ఆశించిన ఆర్థిక లాభాలు ఉంటాయి. ప్రేమికులు వివాహ బంధంతో ఒక్కటవుతారు. కుటుంబంలో సుఖశాంతులు నెలకొంటాయి. శివాలయం దర్శనం శుభకరం.
