Vastu Tips For Home : ఇంట్లో సిరిసంపదలకు లోటు ఉండకూడదంటే.. ఆ ఇంటిపై లక్ష్మీదేవి చల్లని చూపు ఉండాలి. అందుకే మెజార్టీ జనాలు ఎప్పుడూ ఇంటిని, ఇంటి పరిసరాలను శుభ్రంగా ఉండేలా చూసుకుంటారు. కానీ.. ఇంటి మేడపైన మాత్రం పాత వస్తువులు, విరిగిన కుర్చీలు వంటివి పెడుతుంటారు. అయితే.. వాస్తు ప్రకారం మేడపై కొన్ని వస్తువులను పెట్టడం వల్ల లక్ష్మీదేవికి కోపం వస్తుందని వాస్తు పండితులంటున్నారు. దీనివల్ల వారి ఇంట్లో ఎప్పుడూ ఆర్థిక ఇబ్బందులు వస్తాయని చెబుతున్నారు. కాబట్టి.. ఇంటిని శుభ్రంగా ఉంచుకున్న విధంగానే టెర్రస్‌ను కూడా క్లీన్‌గా ఉంచుకోవాలని సూచిస్తున్నారు. మరి వాస్తు ప్రకారం ఇంటిమేడపై పెట్టకూడని వస్తువులు ఏంటో మీకు తెలుసా? ఇప్పుడు చూద్దాం.
ఇంటిమేడపై వాస్తు ప్రకారం ఉండకూడని వస్తువులు :
వెదురు కర్రలు :
చాలా మంది ఇంటిని నిర్మించేటప్పుడు, అలాగే రిపేర్‌ చేయించేటప్పుడు వెదురు కర్రలను ఉపయోగిస్తుంటారు. ఇంటిపని మొత్తం పూర్తయిన తర్వాత వాటిని కింద పెట్టడం ఎందుకని, మేడపైన పెడుతుంటారు. అయితే.. వాస్తు ప్రకారం ఇంటి మేడపైన వెదురు కర్రలు ఉండకూడదట. వీటివల్ల ఇంట్లో గొడవలు జరిగి కుటుంబ సభ్యులకు మానసిక ప్రశాంతత దూరమవుతుందని తెలియజేస్తున్నారు.
విరిగిన ఫర్నిచర్ :
వాస్తు నియమాల ప్రకారం.. మేడపైన విరిగిన కుర్చీలు, టేబుళ్ల వంటివి ఉండకూడదట. వీటివల్ల ఇంటిపై ప్రతికూల ప్రభావం పడుతుందని వాస్తు నిపుణులు చెబుతున్నారు. అలాగే ఇంట్లో ఆర్థిక సమస్యలు కూడా వస్తాయని అంటున్నారు.
పగిలిన కుండలు :
మేడపైన ఎప్పుడూ పగిలిన కుండలను పెట్టకూడదట. కొంత మంది ఈ పగిలిన కుండలలో వివిధ రకాల పూల మొక్కలను కూడా పెంచుతుంటారు. అయితే, ఇలా అస్సలు చేయకూడదని పండితులంటున్నారు. టెర్రస్‌పైన పగిలిన కుండలు ఉండటం వల్ల ఇంట్లో అశాంతులు కలుగుతాయని చెబుతున్నారు.
చీపురుకట్ట :
ఇంటిమేడపై చీపురుకట్ట ఉండకూడదు. దీనిని ఉంచడం వల్ల లక్ష్మీదేవికి కోపం వస్తుందని పండితులు చెబుతున్నారు. కాబట్టి, మేడపైన క్లీన్ చేసిన తర్వాత దానిని కింద పెట్టండి.
ఎండిన ఆకులు :
కొంత మంది మేడపైన కుండీలలో వివిధ రకాల పూలమొక్కలు, చెట్లను పెంచుతుంటారు. మేడపైన రాలిన ఎండిన ఆకులను ఎప్పుటికప్పుడు శుభ్రం చేయాలని వాస్తు నిపుణులంటున్నారు. లేకపోతే ఎండిన ఆకుల వల్ల ఇంటిపై నెగటివ్‌ ఎనర్జీ ప్రభావం ఉంటుందని పేర్కొన్నారు.
తుప్పు పట్టే లోహాలు :
సాధారణంగా చాలా మంది జనాలు ఇంట్లో పాడైపోయిన ఇనుప వస్తువులు, వైర్లు, పనిముట్ల వంటి వాటిని మేడపైన పెడుతుంటారు. వాస్తు ప్రకారం ఇలా తుప్పు పట్టే వస్తువులను టెర్రస్‌పైన పెట్టకూడదని పండితులు సూచిస్తున్నారు.
ముళ్లు ఉండే మొక్కలు :
వాస్తు ప్రకారం.. టెర్రస్‌పైన కుండీలలో ముళ్లు ఉండే మొక్కలను పెంచకూడదని వాస్తు పండితులు చెబుతున్నారు. ఎందుకంటే.. వీటివల్ల కుటుంబ సభ్యులు అనారోగ్య సమస్యలను ఎదుర్కొంటారని అంటున్నారు. కాబట్టి, ముళ్లు లేకుండా ఉండే మొక్కలను పెంచుకోవాలని సూచిస్తున్నారు.
Note : పైన తెలిపిన వివరాలు కొందరు జ్యోతిష్యశాస్త్ర నిపుణులు, జ్యోతిష్య శాస్త్రంలో పేర్కొన్న అంశాల ఆధారంగా అందించినవి మాత్రమే. అంతేకానీ, వీటిలో ఎలాంటి శాస్త్రీయ ఆధారాలు లేవనే విషయాన్ని పాఠకులు గమనించాలి. దీన్ని ఎంతవరకూ విశ్వసించాలి అనేది పూర్తిగా మీ వ్యక్తిగత విషయం.
