Utpanna Ekadashi Puja Vidhi In Telugu : తెలుగు పంచాంగం ప్రకారం ఒక ఏడాదిలో 24 ఏకాదశులు ఉంటాయి. ప్రతినెలా శుక్లపక్షంలో, కృష్ణపక్షంలో రెండు ఏకాదశులు వస్తాయి. ప్రతి ఏకాదశికి ఒక విశిష్టత ఉంటుంది. కార్తిక బహుళ ఏకాదశిని ఉత్పన్న ఏకాదశిగా జరుపుకోనున్న సందర్భంగా ఉత్పన్న ఏకాదశి విశిష్టతను తెలుసుకుందాం.
కార్తిక ఏకాదశి విశిష్టత
వ్యాస మహర్షి రచించిన స్కాంద పురాణం ప్రకారం ఒక్క కార్తిక ఏకాదశి వ్రతంతో 1000 అశ్వమేధ యాగాలు, 100 రాజసూయ యాగాల పుణ్యం లభిస్తుందని తెలుస్తోంది. ఈ రోజు ఏ చిన్న పుణ్యకార్యం చేసినా అది అశ్వమేధయాగానికి సమానమైన పుణ్య ఫలితం ఇస్తుందని, ఈ ఏకాదశి వ్రతం చేసినవారికి సాధించలేనివి ఏమి ఉండవని సాక్షాత్తు బ్రహ్మదేవుడు వివరించినట్లుగా తెలుస్తోంది.
ఉత్పన్న ఏకాదశి ఎప్పుడు?
తెలుగు పంచాంగం ప్రకారం ఉత్పన్న ఏకాదశి నవంబర్ 26వ తేదీ తెల్లవారుజామున 1:01 గంటలకు ప్రారంభమై నవంబర్ 27వ తేదీ తెల్లవారుజామున 3:47 గంటలకు ముగుస్తుంది. ఉదయ తిథి ప్రకారం, ఉత్పన్న ఏకాదశి నవంబర్ 26న జరుపుకుంటారు. ఈ రోజు ఉదయం 6 గంటల నుంచి 9 గంటల వరకు పూజకు శుభ సమయం.
ఉత్పన్న ఏకాదశి పూజావిధానం
ఉత్పన్న ఏకాదశి వ్రతం ఆచరించే వారు ఈ రోజు సూర్యోదయంతో నిద్రలేచి నదీ స్నానం చేయడం ఉత్తమం. వీలుకాని పక్షంలో స్నానం చేసే నీటిలో సమస్త పుణ్య తీర్ధాలను ఆవాహన చేసుకుని స్నానం చేయవచ్చు. ఈ రోజంతా పూర్తిగా ఉపవాసం ఉండాలి. పూజామందిరంలో ఆవునేతితో దీపారాధన చేయాలి. శ్రీ లక్ష్మీ నారాయణుల విగ్రహాలను పంచామృతాలతో అభిషేకించాలి.
శ్రీ లక్ష్మీనారాయణులను గంధ పుష్పాక్షతలో అర్చించాలి. శ్రీ విష్ణు సహస్రనామ పారాయణ చేయాలి. అనంతరం స్వామికి పులిహోర, చక్రపొంగలి నైవేద్యంగా సమర్పించాలి. ఈ ప్రసాదాన్ని అందరికి పంచిపెట్టాలి. కర్పూర నీరాజనంతో మంగళ హారతులు ఇవ్వాలి.
ఆలయాల్లో ఇలా!
సాయంత్రం తిరిగి స్నానం చేసి శుచియై సమీపంలోని విష్ణువు ఆలయానికి వెళ్లి స్వామిని దర్శించుకోవాలి. ఆలయాలలో జరిగే భజనలు, పురాణం ప్రవచనాలు వినడం ఈ రోజు అత్యంత శుభప్రదం. రాత్రంతా భగవంతుని కీర్తనలు, పురాణ శ్రవణంతో కాలక్షేపం చేస్తూ జాగారం చేయాలి.
ఈ దానాలు శ్రేష్టం
ఉత్పన్న ఏకాదశి రోజు చేసే అన్నదానం విశేషమైన ఫలాన్ని ఇస్తుందని శాస్త్రవచనం. ఈ రోజు బ్రాహ్మణులకు గోదానం చేయడం ద్వారా నరక బాధల నుంచి విముక్తి పొందవచ్చు.
ద్వాదశి పారణ
మరుసటి రోజు ఉదయాన్నే స్నానం చేసి పూజాదికాలు పూర్తి చేసుకొని ఒక సద్బ్రాహ్మణునికి భోజనం పెట్టి వస్త్రాలు, తాంబూలం ఇచ్చి నమస్కరించుకోవాలి. అప్పుడు భోజనం చేసి ఉపవాసాన్ని విరమించాలి. ఎవరైతే భక్తిశ్రద్ధలతో ఉత్పన్న ఏకాదశి వ్రతాన్ని ఆచరిస్తారో వారికి సకల సంపదలు, ఆయురారోగ్యాలు చేకూరుతాయని విశ్వాసం. ఓం నమో భగవతే వాసుదేవాయ!
ముఖ్య గమనిక : పైన తెలిపిన వివరాలు కొందరు నిపుణులు, వివిధ శాస్త్రాల్లో పేర్కొన్న అంశాల ఆధారంగా అందించినవి మాత్రమే. అంతే కానీ, వీటిలో ఎలాంటి శాస్త్రీయ ఆధారాలు లేవనే విషయాన్ని పాఠకులు గమనించాలి. దీన్ని ఎంతవరకు విశ్వసించాలనేది పూర్తిగా మీ వ్యక్తిగత విషయం.
