'వారందరి ట్వీట్స్​ చూశాక నేను చాలా బాధపడ్డా - కేటీఆర్​ విషయంలో మాత్రం తగ్గేదే లే' - Konda Surekha Latest news on ktr

Minister Konda Surekha Latest Comments : కేటీఆర్​ విషయంలో తగ్గేదే లేదని, ఆయన క్షమాపణ చెప్పాల్సిందేనని మంత్రి కొండా సురేఖ పేర్కొన్నారు. కేటీఆర్​ చేసిందంతా చేసి, దొంగే దొంగ అని అరిచినట్లు ఉందన్నారు. తన నుంచి అనుకోకుండా ఒక కుటుంబం పేరు వచ్చిందని, తాను పడిన బాధ, ఇంకొకరు పడకూడదనే తన వ్యాఖ్యలను వెనక్కి తీసుకున్నట్లు వివరణ ఇచ్చారు.

Minister Konda Surekha Explanation Comments on KTR : తనపై రెచ్చగొట్టే వ్యాఖ్యల వల్లే అలా విమర్శించాల్సి వచ్చిందని మంత్రి కొండా సురేఖ వివరణ ఇచ్చారు. తనకు ఎవరిపై వ్యక్తిగత ద్వేషం, కోపం లేదని అన్నారు. తన నుంచి అనుకోకుండా ఒక కుటుంబం (అక్కినేని కుటుంబం) పేరు వచ్చిందన్నారు. ఆ కుటుంబం ట్వీట్​ చూశాక తాను చాలా బాధపడ్డానని తెలిపారు. తాను బాధపడుతున్నట్లు ఇంకొకరు బాధపడొద్దనే వ్యాఖ్యలు వెనక్కి తీసుకున్నానని స్పష్టం చేశారు. హనుమకొండలోని ఆమె నివాసంలో మంత్రి మీడియాకు వివరాలు వెల్లడించారు.

ఈ సందర్భంగా మంత్రి కొండా సురేఖ మాట్లాడుతూ, 'నేను పడిన బాధ, అవమానం ఇంకొకరిపై పడకూడదనే నేను చేసిన వ్యాఖ్యలను వెనక్కి తీసుకుంటున్నాను. కేటీఆర్​ విషయంలో తగ్గేది లేదు, ఆయన నాకు క్షమాపణ చెప్పాల్సిందే. కేటీఆర్​ చేసిందంతా చేసి, దొంగే దొంగ అని అరిచినట్లు ఉంది. కేటీఆర్​ లీగల్​ నోటీసుపై న్యాయపరంగా ముందుకెళ్తాం.' అని ఆమె స్పష్టం చేశారు.

"కేటీఆర్​ క్యారెక్టర్​ గురించి, గతంలో వారు చేసిన కార్యక్రమాలు, మహిళల మీద ఆయనకు ఉన్న చులకన భావన గురించి మాట్లాడాను. కేటీఆర్​ నన్ను రెచ్చగొట్టే విధంగా మాట్లాడినప్పుడు నేను భావోద్వేగానికి లోనై ఆయన మీద విమర్శలు చేయాల్సిన అవసరం వచ్చింది. ఆ సందర్భంలో వేరొకరి మీద వ్యక్తిగత ద్వేషం కానీ, కోపం కానీ లేదు. ఒక కుటుంబం మాట తీయడమనేది నా నోటి నుంచి అనుకోకుండా వచ్చింది. ఆ తర్వాత వారి ట్వీట్స్​​ చూసి నేను చాలా బాధపడ్డాను. నేను ఏ విషయంలో అయితే బాధపడుతూ ఉన్నానో అదే విషయంలో వేరే కుటుంబాన్ని నొప్పించానని తెలిసి రాత్రి వెంటనే ఆ మాటలను వెనక్కి తీసుకుంటూ ట్వీట్​ చేశాను. నేను పడిన బాధ వేరే ఇంకొకరు పడకూడదు. అందుకే బేషరతుగా వెనక్కి తీసుకున్నాను. కానీ కేటీఆర్​ విషయంలో మాత్రం తగ్గేదే లేదు. ఆయన క్షమాపణ చెప్పాల్సిందే." - కొండా సురేఖ, మంత్రి

అసలేం జరిగిందంటే : అక్టోబరు 2న హైదరాబాద్​ లంగర్​హౌస్​లో మంత్రి కొండా సురేఖ మీడియాతో మాట్లాడుతూ, బీఆర్​ఎస్​ నేత కేటీఆర్​పై వివాదాస్పద వ్యాఖ్యలు చేశారు.. 'కేటీఆర్​ మంత్రిగా ఉన్న సమయంలో అనేక మంది సినిమా హీరోయిన్ల జీవితాలతో ఆడుకున్నారు. సమంత-నాగ చైతన్య విడిపోవడానికి కారణం కేటీఆర్​. గతంలో ఫోన్​ ట్యాపింగ్​ ద్వారా అందరినీ ఇబ్బందులకు గురి చేశారు. హీరోయిన్స్​ తొందరగా పెళ్లిళ్లు చేసుకుని, సినిమాలు విడిచి వెళ్లిపోవడానికి కేటీఆర్​నే కారణం. కేటీఆర్​ మత్తు పదార్థాలకు అలవాటు పడి, వారిని కూడా మత్తు పదార్థాలకు అలవాటు చేసి రేవ్ పార్టీలు పెట్టారు. బ్లాక్​ మెయిల్​ చేసి, వాళ్ల జీవితాలతో ఆడుకున్నారు. కేటీఆర్​ మాదిరిగానే అందరూ ఉంటారు అని అనుకోవద్దు.' అంటూ తీవ్రస్థాయిలో ఆరోపణలు చేశారు.