KTR Meeting at Nalgonda : కాంగ్రెస్ ప్రభుత్వ హయాంలో మార్పు వచ్చిందన్నారు - వచ్చిన మార్పు ఇద్దరు బీఆర్ఎస్ కార్యకర్తలను హత్య చేయడమేనా అంటూ బీఆర్ఎస్ కార్యనిర్వాహక అధ్యక్షుడు కేటీఆర్ ప్రశ్నించారు. తెలంగాణలో రంగుల సినిమా లాంటి కలలు చూపించారని తెలిపారు. నల్గొండ జిల్లా దేవరకొండలో మాజీ మంత్రి కేటీఆర్ పట్టభద్రుల ఎమ్మెల్సీ ఎన్నికల ప్రచారంలో పాల్గొన్నారు. అనంతరం కాంగ్రెస్పై విమర్శలు చేశారు.
కాంగ్రెస్ వచ్చాక మార్పు ఏందంటే పచ్చగా ఉన్న తెలంగాణలో హత్యా రాజకీయాలు చేస్తున్నారని కేటీఆర్ ధ్వజమెత్తారు. కేసీఆర్ ఉన్న రోజులు కరెంటు పోకుండా ఉంటే, ఇప్పుడేమో కరెంటు ఎప్పుడు పోతుందో చెప్పలేకపోతున్నారని ఎద్దేవా చేశారు. కేసీఆర్ రూ. లక్ష రుణమాఫీ చేస్తే, తాను రూ.2 లక్షల రుణమాఫీ చేస్తానని చెప్పి ఆరు నెలలైనా ఇప్పటివరకు రుణమాఫీ కాలేదని దుయ్యబట్టారు. క్వింటాల్కు రూ.500 బోనస్ ఇస్తానని చెప్పి ఇప్పుడు సన్న వడ్లకే ఇస్తానని చెబుతున్నారన్నారు.
తీన్మార్ మల్లన్నపై అందుకే కేసులు : కాంగ్రెస్ ప్రభుత్వం డొల్లతనం దివాళాకోరు రాజకీయం చేస్తున్నారని కేటీఆర్ మండిపడ్డారు. తులం బంగారం కాదు కదా తులం ఇనుము కూడా ఇచ్చారా అని ప్రశ్నించారు. ఇక్కడ టాక్స్లు వసూలు చేసి వాళ్ల దిల్లీ పెద్దలకు పంపిస్తున్నారని ఆరోపించారు. ఆరు గ్యారంటీల్లో ఒక్కటి కూడా పూర్తి కాలేదని విమర్శించారు. ఎమ్మెల్సీ ఎన్నికల్లో బీఆర్ఎస్ గెలిస్తే కాంగ్రెస్ ఇచ్చిన హామీలను గట్టిగా అడగొచ్చని చెప్పారు. అమ్మాయిల ఫొటోలు మార్ఫింగ్, బ్లాక్ మెయిలింగ్, దందాలు, అనుమతి లేకుండా ఫొటోలు పెట్టడం వంటివి చేసినందుకే తీన్మార్ మల్లన్నపై కేసులు పెట్టారని తెలిపారు. తెల్లారి లేస్తే నోరు పారేసుకునే వ్యక్తి కాంగ్రెస్ పార్టీ అభ్యర్థి అని కేటీఆర్ విమర్శలు చేశారు. కాంగ్రెస్ నాయకులకు చిత్తశుద్ధి ఉంటే ఓయూ, కేయూ విద్యార్థులకు ఎమ్మెల్యే టికెట్ ఎందుకు ఇవ్వలేదని ప్రశ్నించారు. విద్యార్థులు, నిరుద్యోగుల తరఫున నిలదీసే నాయకులు రాకేశ్ రెడ్డిని ఎమ్మెల్సీ ఎన్నికల్లో గెలిపించాలని కేటీఆర్ పట్టభద్రులను కోరారు.
వైద్య రంగంలో కేసీఆర్ చేసిన అభివృద్ధి ఓ అరుదైన విప్లవం : కేటీఆర్ - KTR Tweets On Health Sector
కాంగ్రెస్ మార్పంటే కరెంటు కోతలు, ఐటీ కంపెనీల తరలింపు : కేటీఆర్ - KTR Comments on CM Revanth Reddy
