పార్లమెంట్ ఎన్నికల్లో 'చెయ్యి' విరిగిపోవాలే - 'పువ్వు' వాడిపోవాలే - కారు రయ్​మని ఉర్కాలే : కేటీఆర్ - KTR campaign in sircilla

KTR Campaign in Sircialla : రాష్ట్ర ప్రజలకు కాంగ్రెస్ పార్టీ అరచేతిలో వైకుంఠం చూపించి అధికారంలోకి వచ్చిందని బీఆర్ఎస్ కార్యనిర్వాహక అధ్యక్షుడు కేటీఆర్ విమర్శించారు. కరీంనగర్​ ఎంపీ అభ్యర్థి వినోద్ కుమార్​కు మద్దతుగా ఎన్నికల ప్రచారం నిర్వహించారు. రాష్ట్రంలో కాంగ్రెస్ ఇచ్చిన హమీలు అమలు కావాలంటే పార్లమెంట్ ఎన్నికల్లో బీఆర్​ఎస్​ను గెలిపించాలని కోరారు.

KTR Election Campaign in Sircilla 2024 : తెలంగాణ ప్రజలకు కాంగ్రెస్ పార్టీ అరచేతిలో వైకుంఠం చూపించి గెలిచిందని బీఆర్ఎస్​ కార్యనిర్వాహక అధ్యక్షుడు కేటీఆర్ వ్యాఖ్యానించారు. అధికారంలోకి వచ్చిన తర్వాత ఇచ్చిన హమీలను మరిచిందని ధ్వజమెత్తారు. రాజన్న సిరిసిల్ల పట్టణంలోని వెంకంపేట చౌరస్తాలో కరీంనగర్​ అభ్యర్థి వినోద్​ కుమార్​కు మద్దతుగా ప్రచారం నిర్వహించిన ఆయన, కార్నర్​ మీటింగ్​లో పాల్గొన్నారు. సిరిసిల్లలోని చేనేత కార్మికులను ఉద్దేశించి మాట్లాడారు. గత ప్రభుత్వ హయాంలో చేనేత కార్మికులకు ఉపాధి ఉండేదని, ఇప్పుడు బతుకమ్మ చీరల ఆర్డర్ ఇవ్వకుండా నేత కార్మికులు ఆత్మహత్యలు చేసుకునే పరిస్థితి వచ్చిందని మండిపడ్డారు. బీఆర్ఎస్ హయాంలో సిరిసిల్లలో చేసిన అభివృద్ధిని వివరించారు.

"రాష్ట్రంలో 4 నెలల్లో లక్ష పెళ్లిళ్లు జరిగాయి. వారికి రూ.లక్ష, తులం బంగారం, వృద్ధులకు రూ.4000 పింఛన్ వచ్చిందా? పార్లమెంటులో గట్టిగా కొట్లాడే వినోద్ కుమార్​ను గెలిపించాలి. గుళ్లు కట్టుడే ప్రాచీన శిల్ప కళకు అద్దం పట్టేలా యాదాద్రి కట్టిండు. కేసీఆర్ మిడ్ మానేరు కట్టి సిరిసిల్లలో సముద్రం తీసుకు వచ్చిండు. మోదీ నుంచి ఒక్క రూపాయి అన్న లాభం జరిగిందా? ఆయనకు ఎందుకు ఓటు వేయాలి. ఈ ఎన్నికల్లో చెయ్యి విరిగిపోవాలే - పువ్వు వాడిపోవాలే - కారు రయ్యుమని ఉర్కాలే" - కేటీఆర్​, బీఆర్ఎస్ కార్యనిర్వాహక అధ్యక్షుడు

BRS MP Candidate Election Campaign in Sircilla : కరీంనగర్​ ఎంపీగా గెలిచిన బండి సంజయ్ ఐదు సంవత్సరాల్లో ఒక్క శిలాఫలకం అయినా వేశారా అని కేటీఆర్ ప్రశ్నించారు. అన్ని రేట్లను పిరం చేసిన మోదీ ప్రభుత్వానికి ఎందుకు ఓటు వేయాలని అడిగారు. భారతదేశంలో ప్రధాని మోదీని అందరూ పిరమైన ప్రధాన మంత్రి అంటున్నారని ఎద్దేవా చేశారు. సిరిసిల్లలో బీజేపీ చేసిన ఒక్క అభివృద్ధి చూపెడితే, దేనికైనా రెడీ అని సవాల్ విసిరారు. చోటా భాయి, బడే భాయ్​కి ఓటు వేయకుండా వారికి బుద్ధి చెప్పాలని అన్నారు. మతం పేరిట రాజకీయం చేసేవారిని నమ్మకూడదని సూచించారు. 'మోసపోతే గోస పడతాం' అని కేసీఆర్​ చెప్పిన నినాదాన్ని గుర్తు చేశారు. కరీంనగర్​ నియోజకవర్గంలో బీఆర్ఎస్ అభ్యర్థి వినోద్​ కుమార్​ను ఆశీర్వదించాలని కోరారు.