BJP Leaders Reactions on Telangana Budget 2024 : కాంగ్రెస్ ప్రభుత్వం ప్రజా సంక్షేమానికి ఏం చేస్తుంది, ఎన్ని నిధులు కేటాయించారో చెప్పకుండా తమ గొప్పలు చెప్పుకోవడమే లక్ష్యంగా బడ్జెట్ ప్రసంగం సాగిందని బీజేపీ నేతలు ఆరోపించారు. భట్టి విక్రమార్క బడ్జెట్ అంతా అభూత కల్పన, అంకెల గారడి, ఆర్భాటం తప్ప అందులో ఏమీ లేదని కేంద్రమంత్రి కిషన్ రెడ్డి వ్యాఖ్యానించారు. బడ్జెట్లో ప్రభుత్వం గొప్పలు చెప్పుకోవడమే ఉందని విమర్శించారు. ప్రతి సంవత్సరం రైతులకు సీజన్ ముందు ఇవ్వాల్సిన పంటపెట్టుబడి సాయానికి బడ్జెట్లో ఎందుకు కేటాయింపులు చేయలేదని మండిపడ్డారు. బడ్జెట్ మొత్తంలో ఆసరా పెన్షన్‌ల ప్రస్తావనే లేదన్న ఆయన పెన్షన్లు పెంచుతామని కాంగ్రెస్ నేతలు మోసం చేశారని ధ్వజమెత్తారు.
"మహిళలకు నెలకు రూ.2500 ఇస్తామని ఎన్నికల సందర్భంగా హామీ ఇచ్చారు. కానీ బడ్జెట్లో మాత్రం ఆ ఊసే ఎత్తలేదు. దళిత సంక్షేమం కోసం కేటాయించాల్సిన బడ్జెట్ రూ.21,072 కోట్ల నుంచి రూ.7,638 కోట్లు తగ్గిపోయింది. గిరిజన సంక్షేమం కోసం కేటాయించాల్సిన బడ్జెట్ రూ. 4,365 కోట్ల నుంచి రూ. 3,969 కోట్లకు తగ్గిపోయింది. మొత్తం ప్రపంచం ఏమైపోయినా పర్వాలేదు, కానీ మైనారిటీల సంతుష్టీకరణ మాత్రమే మాకు కావాలనే కాంగ్రెస్ ఆలోచన మరోసారి ఈ బడ్జెట్లో మరోసారి బట్టబయలైంది." - కిషన్రెడ్డి, కేంద్రమంత్రి
Kishan Reddy Reaction on Telangana Budget 2024 : 2023-24లో రూ.2వేలుగా ఉన్న మైనార్టీ సంక్షేమ నిధులను ఈ బడ్జెట్లో ఏకంగా రూ.3,003 కోట్లకు పెంచారని విమర్శించారు. ఒక్క ఏడాదిలోనే 30శాతం కోటా పెంచేశారని ఆరోపించారు. కాలేజీకి వెళ్లే అమ్మాయిలకు స్కూటీలు అన్నారు దాని ఊసే లేదని, కేంద్రమంత్రి విద్యా నిధి పథకం కింద రూ.5 లక్షల సాయం అని దాని ప్రస్తావనే తీసుకురాలేదని ఆగ్రహం వ్యక్తం చేశారు. ఏడాదిలో రెండు లక్షల ఉద్యోగాలను భర్తీ చేస్తామన్నారని గుర్తుచేశారు. నిరుద్యోగులకు భృతి ఇస్తామని చెప్పి మోసం చేశారని విమర్శించారు. ఆర్టీసీ ఉచిత బస్సు పథకం ద్వారా రోడ్డున పడ్డ ఆటో డ్రైవర్లకు రూ.12 వేలు ఇస్తామని చెప్పి మోసం చేశారని వ్యాఖ్యానించారు.
Bandi Sanjay In TG Budget 2024 : గాడిద గుడ్డు పెట్టడం ఎంత నిజమో కాంగ్రెస్ ఇచ్చిన హామీలన్నీ అమలు చేయడం కూడా అంతేనని, దానికి రాష్ట్ర బడ్జెట్ నిదర్శనమని కేంద్ర హోంశాఖ సహాయ మంత్రి బండి సంజయ్ అన్నారు. భట్టి విక్రమార్క చదివింది ఆర్థిక బడ్జెట్టా లేక అప్పుల పత్రమా అని ఎద్దేవా చేశారు. అప్పులున్నందున హామీలను అమలు చేయలేమని చేతులెత్తేస్తున్నారా ప్రశ్నించారు.
6 గ్యారంటీలు + తెలంగాణ బడ్జెట్ = గాడిద గుడ్డే
— Bandi Sanjay Kumar (@bandisanjay_bjp) July 25, 2024
⛔ ఆర్థికమంత్రి గారు చదివింది.. ఆర్థిక బడ్జెట్టో లేదంటే అప్పుల పత్రమో క్లారిటీ లేదు
⛔ ఆరు గ్యారంటీల అమలుకు తగిన నిధుల ఊసు లేదు
⛔ బడ్జెట్ కేటాయింపులకు ఆదాయం ఎక్కడి నుండి వస్తుందో లెక్కా పత్రం లేదు
⛔ రుణమాఫీ పూర్తిస్థాయిలో చేసే…
అప్పులున్న విషయం తెలిసి కూడా 6 గ్యారంటీలు ఇచ్చి వాటన్నింటికి బడ్జెట్లో నిధులెందుకు కేటాయించలేదన్నారు. 6 గ్యారంటీలు సహా హామీల అమలుపై చర్చ జరగకుండా ఉండేందుకే కేంద్రాన్ని బదనాం చేయాలనుకుంటున్నారా అని ప్రశ్నించారు. బడ్జెట్ కేటాయింపులకు సరిపడా ఆదాయం ఎక్కడి నుంచి సమకూర్చుకుంటారో బడ్జెట్లో లెక్కా పత్రం చూపకపోవడం విడ్డూరంగా ఉందన్నారు. 12 వేల పోస్టులకే నోటిఫికేషన్ ఇచ్చి 31 వేలకుపైగా ఉద్యోగాలు భర్తీ చేశామని చెప్పడం నిరుద్యోగులను మోసం చేయడమే అని ధ్వజమెత్తారు.
Alleti Maheshwar Reddy On Budget 2024 : రాష్ట్ర ప్రభుత్వం ప్రవేశ పెట్టిన బడ్జెట్ ప్రజా వ్యతిరేకంగా ఉందని బీజేపీ శాసనసభాపక్షం విమర్శించింది. బడాయి, అప్పుల, ప్రజా వ్యతిరేక బడ్జెట్ను రాష్ట్ర ప్రభుత్వం ప్రవేశ పెట్టిందని పార్టీ శాసన సభ పక్షనేత ఏలేటి మహేశ్వర్ రెడ్డి ఆరోపించారు. ఏ రకంగా రూ.62వేల కోట్లు అప్పు తీసుకువస్తారో చెప్పాలని డిమాండ్ చేశారు. అప్పులు కుప్పలుగా ఉంటే మరిన్ని అప్పులు చేసి మరింత దివాలా చేయాలని చూస్తున్నారని మండిపడ్డారు. ఇచ్చిన హామీలకు అనుగుణంగా కేటాయింపులు చెయ్యలేదని దుయ్యబట్టారు. ఏడు మసాల నుంచి నిరుద్యోగ భృతి కింద రూ.10వేల కోట్లు బకాయిపడ్డారన్న ఆయన అది ఎక్కడా చూపించలేదన్నారు.
కాంగ్రెస్ అసమర్థ పాలనతో కేంద్రాన్ని నిందిస్తోంది : పాయల్ శంకర్ - BJP MLAS Fires on Congress Party
రాష్ట్ర ప్రభుత్వానికి సంబంధం లేని పద్దులను బడ్జెట్లో చేర్చారని అదిలాబాద్ ఎమ్మెల్యే పాయల్ శంకర్ మండిపడ్డారు. రాష్ట్ర ప్రజలను మోసం చేసే విధంగా బడ్జెట్ ఉందని దుయ్యబట్టారు. భట్టి బడ్జెట్ ఉత్తి మాటలేనని నిజామాబాద్ అర్బన్ ఎమ్మెల్యే ధన్పాల్ సూర్య నారాయణ గుప్తా ఎద్దేవా చేశారు. బడ్జెట్లో అన్ని వర్గాలను ప్రభుత్వం మోసం చేసిందన్నారు. నిజాం చక్కెర ఫ్యాక్టరీ తెరిపిస్తామని చెప్పారు తప్పితే నిధులు కేటాయించలేదని విమర్శించారు. బీఆర్ఎస్ కాళేశ్వరం పేరుతో దోచుకున్నట్లు మూసీ పేరుతో కాంగ్రెస్ ప్రభుత్వం దోచుకోవడానికి సిద్ధంగా ఉందని ఆరోపించారు.
