హామీలు అమలు చేసినట్లు నిరూపిస్తే పోటీ నుంచి తప్పుకుంటా - కాంగ్రెస్​కు బండి సంజయ్​ సవాల్ - Bandi Sanjay Challenge to Congress

Bandi Sanjay Challenge to Congress in Karimnagar :కాంగ్రెస్​ పార్టీకి కరీంనగర్​ బీజేపీ ఎంపీ అభ్యర్థి బండి సంజయ్​ సవాల్​ విసిరారు. హామీలు అమలు చేసినట్లు నిరూపిస్తే పోటీ నుంచి తప్పుకుంటానని అన్నారు. కరీంనగర్​లోని బీజేపీ కార్యాలయంలో వివిధ పార్టీలకు చెందిన పలువురు బీజేపీలో చేరగా, వారికి పార్టీ కండువా కప్పి కమలం పార్టీలోకి ఆహ్వానించారు.

Bandi Sanjay Challenge to Congress Party : రాష్ట్రంలోని కాంగ్రెస్​ ప్రభుత్వం హామీలను అమలు చేసినట్లు నిరూపిస్తే, పోటీ నుంచి తప్పుకోవడానికి సిద్ధంగా ఉన్నట్లు కరీంనగర్​ బీజేపీ ఎంపీ అభ్యర్థి బండి సంజయ్​ స్పష్టం చేశారు. నిరూపించలేకపోతే మీరందరూ పోటీ నుంచి తప్పుకుంటారా అంటూ ప్రశ్నించారు. సోమవారంలోపు నిరూపిస్తే నామినేషన్​ విత్​ డ్రా చేసుకుంటానని చెప్పారు. కరీంనగర్​లోని బీజేపీ కార్యాలయంలో ఇతర పార్టీల నుంచి వచ్చిన వారికి పార్టీ కండువా కప్పి కమలం పార్టీలోకి ఆహ్వానించారు. ఈ మేరకు కాంగ్రెస్​ పార్టీకి బండి సంజయ్​ సవాల్​ విసరగా, బీఆర్​ఎస్​పై తీవ్రస్థాయిలో ధ్వజమెత్తారు.

ఆరు గ్యారంటీలు అమలు చేస్తామని కాంగ్రెస్​ మోసగించిందని బండి సంజయ్​ ఆరోపించారు. వంద రోజుల్లో ఆరు గ్యారంటీలు అమలు చేస్తామన్నారన్నారు. తమ మేనిఫెస్టో ఖురాన్​, బైబిల్​, భగవద్గీత అని కాంగ్రెస్​ నేతలు చెప్పారని మండిపడ్డారు. అందులో హామీలు నిలబెట్టుకోలేదని దుయ్యబట్టారు. మహిళల ఖాతాల్లో రూ.2400 జమ చేసినట్లు నిరూపించాలని సవాల్​ విసిరారు. ఆసరా పింఛన్లు రూ.4 వేలు ఇచ్చామని కాంగ్రెస్​ నేతలు నిరూపించాలన్నారు. విద్యార్థుల భరోసా కార్డులు ఇచ్చామని చెప్పుకుంటున్న హస్తం పార్టీ నేతలు, అందుకు తగిన ఆధారాలు చూపాలని ప్రశ్నించారు. వీటిన్నింటిని నిరూపించకపోతే 15 స్థానాల్లో కాంగ్రెస్​ పోటీ నుంచి తప్పుకుంటుందా అంటూ బండి సంజయ్​ సవాల్ విసిరారు.

"ముస్లింల కోసమే పార్టీ ఉందని కాంగ్రెస్​ ప్రచారం చేసుకుంటే, బీఆర్​ఎస్​ అధినేత కేసీఆర్​ శ్రీ రాముడిని హేళన చేసేవిధంగా మాట్లాడుతున్నారు. వీళ్లు ఒక వర్గం ఓట్లు గురించి ఏ విధంగా కక్కుర్తి పడుతున్నారో తెలుస్తోంది. వీళ్ల గురించి ఆలోచించాల్సిన బాధ్యత హిందూ సమాజం మీద ఉంది. ఈరోజు మేమా మతతత్వవాదులం వాళ్లా? రుణమాఫీని ఆగస్టు 15లోగా చేస్తానని కాంగ్రెస్​ పార్టీ అన్నది. కాంగ్రెస్​, బీఆర్​ఎస్​ పొలిటికల్​ డ్రామా ఆడుతున్నాయి. ఎందుకంటే మెజార్టీ సీట్లను బీజేపీ గెలుస్తుంది అందుకే ఈ డ్రామాలు అన్నీ. కాంగ్రెస్​ పార్టీ హామీలు చేసిందని నిరూపిస్తే తాను తప్పకుండా పోటీ నుంచి తప్పుకుంటాను. ఒకవేళ నిరూపిస్తే పోటీ నుంచి తప్పుకుని కాంగ్రెస్​ పార్టీ నుంచి ప్రచారం చేస్తాను." - బండి సంజయ్​, కరీంనగర్​ ఎంపీ అభ్యర్థి