క్రైమ్‌ థ్రిల్లర్‌ను మరిపిస్తోన్న ముంబయి నటి రియల్ స్టోరీ- సినీ విలన్లను తలదన్నేలా ఏపీ ఒరిజినల్‌ క్యారెక్టర్లు - What Happened in Heroine Incident

Pratidhwani : ఎక్కడో ముంబాయిలో ఉండే ఒక సినిమా హీరోయిన్‌ను విమానాల్లో వెళ్లి మరీ ఏపీ పోలీసులు ఎందుకు అరెస్ట్ చేశారు? ఆమె కుటుంబానికి నరకం ఎందుకు చూపించారు? దాని వెనుక అసలు వాస్తవాలు ఏంటి? ఓ సినిమా హీరోయిన్‌కు ఓ పారిశ్రామికవేత్తకు మధ్యలో తగవు ఉంటే అందులోకి జగన్ పార్టీ వాళ్లు ఎందుకు దూరారు? అసలేం జరిగిందో నేటి ప్రతిధ్వని కార్యక్రమం ద్వారా తెలుసుకుందాం.

Pratidhwani : సాధారణంగా ఇటువంటి ఘటనలు తెలుగు సినిమాల్లో చూసే వాళ్లం. అవేటంటే విలన్‌ చేసే అక్రమాలపై ఆధారాలను పోలీసులకు ఇవ్వాలి అనుకుంటారొకరు. అంతలో ఫోన్ వస్తుంది. నీ కుటుంబ సభ్యులు నా దగ్గర బందీలుగా ఉన్నారు. నువ్వు ఆధారాలు తీసుకు వచ్చి మాకు అప్పగిస్తే మీ వాళ్లని విడిపిస్తాం అంటారు. అచ్చం సినిమాలో జరిగినట్టే ముంబయిలో ఒక సినీ నటి విషయంలో జరిగింది. ఆ హీరోయిన్‌ను ఓ పారిశ్రామికవేత్త లైంగికంగా వేధించారు. ఆమె అతడిపై కేసు పెట్టింది. ఆ పారిశ్రామికవేత్త మామూలు వ్యక్తి కాదు. నాటి వైఎస్సార్సీపీ పెద్దలకు స్నేహితుడు. ఇంకేముంది ఆ హీరోయిన్‌పై అక్రమ కేసులు పెట్టి జైలులోకి నెట్టారు. పారిశ్రామికవేత్తపై ఆమె పెట్టిన కేసులు వెనక్కి తీసుకుంటేనే నిన్ను విడిచిపెడతామని సినీ ఫక్కీలో బెదిరించారు. ఆమె కుటుంబానికి అక్షరాల నరకం చూపించారు. ఓ మహిళను ప్రభుత్వమే ఇలా చేయటం, దానికి ఐఏఎస్​లు (IAS), ఐపీఎస్​ (IPS) లు సహకరించటాన్ని ఏమనాలి? ఆటవిక రాజ్యం అందామా? ప్రజాస్వామ్యం అందామా? ఇదీ నేటి ప్రతిధ్వని అంశం. చర్చలో పాల్గొంటున్న వారు పౌరహక్కుల సంఘం రాష్ట్ర అధ్యక్షుడు ఎం.సుబ్బారావు, రాజకీయ విశ్లేషకులు పోతుల బాలకోటయ్య.

ఈ వేధింపుల కేసులో ఎవరెవరి పాత్ర ఉంది? చట్టప్రకారం ఏఏ సెక్షన్ల కింద అది నేరంగా పరిగణింపబడుతుంది? వాటికి శిక్షలు ఎలా ఉంటాయి? 42 రోజులు పాటు ఆ నటిని, ఆమె తలిదండ్రులను ఎక్కడో పరాయి రాష్ట్రం నుంచి బలవంతంగా తీసుకొచ్చి మన జైలులో నిర్బంధించటం ఎంత అన్యాయం? వాళ్లు ఎంత క్షోభను అనుభవించి ఉంటారు? అసలు వైఎస్సార్సీపీ ప్రభుత్వ పెద్దలకు మనసెలా ఒప్పింది? మహిళల మీద నేరాలు, ఘోరాలు, అఘాయిత్యాలకు సంబంధించిన నిందితులు, ఆరోపణలు ఎదుర్కొంటున్న వారంతా వైసీపీలోకే ఎలా పోగుపడుతున్నారు? వైఎస్సార్సీపీ వాళ్లు, వారి మీడియా ఎంతసేపు ఆ యువతి క్యారెక్టర్‌ను తప్పు పట్టేలా మాట్లాడుతున్నారు, రాస్తున్నారు. ఆమెను ఓ మోసగత్తెగా చిత్రీకరిస్తున్నారు. మహిళల పట్ల ఇదేనా జగన్ చిత్తశుద్ధి?

కేసు న్యాయస్థానాల్లో నిలబడాలన్నా, దోషులకు శిక్షలు పడాలన్నా ఈ కేసు దర్యాప్తులో ఎటువంటి జాగ్రత్తలు తీసుకోవాలి? వైఎస్సార్సీపీ హయాంలో రాష్ట్రంలో ఉన్నవారినే కాకుండా వేరే రాష్ట్రాల్లో ఉన్నవాళ్లను కూడా వేధించారు. బాధితులకు న్యాయం జరగాలి అంటే తక్షణం ప్రభుత్వం ఏం చేయాలి? అంశాలపై సమగ్ర సమాచారం ప్రతిధ్వని కార్యక్రమం ద్వారా తెలుసుకుందాం.