వింటర్​ స్పెషల్​​ : ఘుమఘుమలాడే "టమాటా కొత్తమీర సూప్​" - వేడివేడిగా గొంతులోకి జారుతుంటే అదుర్స్!

- చలి నుంచి తట్టుకునేందుకు రుచికరమైన సూప్​ ఇది - ఇలా ప్రిపేర్​ చేస్తే నిమిషాల్లో రెడీ

How to Make Tomato Dhania Shorba: తెలుగు రాష్ట్రాల్లో చలి మొదలైంది. పగలు మొత్తం ఎండ ఉన్నా.. సాయంత్రమైతే చాలు మంచు కురుస్తుంది. ఇక ఈ చలికాలంలో ఏం తిన్నా, తాగినా వేడివేడిగా ఉండేలా చూసుకుంటాం. ముఖ్యంగా ఎక్కువ శాతం వేడివేడి రసాలు, సూప్​లు ఉండేలా చేస్తుంటారు మహిళలు. అయితే.. మనకు సూప్​లు ఎన్నో రకాలు ఉన్నాయి. అందులో టమాటా కొత్తిమీర సూప్​ ఒకటి. ఈ సూప్​ గురించి చాలా మందికి తెలిసే ఉంటుంది. అయితే కొద్దిమందికి ఈ సూప్​ చేయడం రాదు.. ఒకవేళ చేసినా పల్చగా తయారవుతుంటుంది. దీంతో.. చేసేది లేక బయటి నుంచి ఇన్​స్టంట్​ సూప్​ పొడులు తెచ్చుకుని ప్రిపేర్​ చేసుకుంటుంటారు. అలాంటి వారు ఈ స్టోరీలో చెప్పే టిప్స్​, కొలతలు పాటిస్తూ చేస్తే ఈ సూప్​ రుచి అద్దిరిపోతుంది. పైగా నిమిషాల్లో ప్రిపేర్​ చేసుకోవచ్చు. మరి అలా నోరూరిస్తూ చలిని దూరం చేసే ఈ హెల్దీ సూప్​ని ఎలా చేయాలి? కావాల్సిన పదార్థాలు ఈ స్టోరీలో చూద్దాం..

కావాల్సిన పదార్థాలు :

• నెయ్యి లేదా బటర్​ - అర టీ స్పూన్​
• నూనె - 1 టీ స్పూన్​
• దంచిన వెల్లుల్లి - 3
• దంచిన అల్లం - అర ఇంచ్​
• దాల్చిన చెక్క - చిన్న ముక్క
• యాలకులు - 3
• లవంగాలు - 2
• బిర్యానీ ఆకు - 1
• మిరియాలు - అర టీ స్పూన్​
• గోధుమ పిండి - 1 టీ స్పూన్​
• టమాట - పావు కిలో
• కొత్తిమీర - 100 గ్రాములు
• కారం - అర చెంచా
• ఉప్పు - రుచికి సరిపడా
• పచ్చిమిర్చి - 2
• వాటర్​ - అర లీటర్​

తయారీ విధానం:

• స్టవ్​ ఆన్​ చేసి పాన్​ పెట్టి నెయ్యి లేదా బటర్​, నూనె వేసుకోవాలి.
• ఆ తర్వాత దంచిన వెల్లుల్లి, దంచిన అల్లం, దాల్చిన చెక్క, యాలకులు, లవంగాలు, బిర్యానీ ఆకు, మిరియాలు వేసి బాగా ఫ్రై చేయాలి.
• ఆ తర్వాత గోధుమపిండి వేసి మంటను సిమ్​లో పెట్టి మంచి వాసన వచ్చేవరకు వేయించుకోవాలి.
• ఆ తర్వాత టమాటా ముక్కలు వేసి ఓ నాలుగు నిమిషాల పాటు ఫ్రై చేసుకోవాలి. ఆ తర్వాత కొత్తిమీరను శుభ్రంగా కడిగి కాడలతో సహా వేసుకోవాలి. ఆ తర్వాత అర చెంచా కారం, రుచికి సరిపడా ఉప్పు వేసి కలపాలి.
• అనంతరం పచ్చిమిర్చిని తుంచి వేసుకుని మూత పెట్టి మంటను సిమ్​లో పెట్టి టమాటలు గుజ్జుగా అయ్యే వరకు ఉడికించుకోవాలి.
• టమాటా ముక్కలు పూర్తిగా ఉడికిన తర్వాత అందులోకి అరలీటర్​ నీళ్లు పోసుకుని సిమ్​లో పెట్టి నిధానంగా మరగనివ్వాలి.
• లో-ఫ్లేమ్​ మీద ఈ సూప్​ చేసుకుంటే రుచి బాగుంటుంది. నీళ్లు సగానికి అయ్యేవరకు మరిగించుకోవాలి.
• ఆ తర్వాత ఓ జెల్లెడలో ఈ మిశ్రమాన్ని వేసి వడకట్టాలి. టమాటా ముక్కల్లోని సారం అంతా సూప్​లోకి జారాలే గరిటెతో మెత్తగా మెదుపుతూ సూప్​ను వడకట్టాలి.
• అంతే ఎంతో టేస్టీగా ఉండే టమాటా కొత్తిమీర సూప్​ రెడీ. దీనిపైన కాస్త కొత్తిమీర చల్లి సర్వ్​ చేసుకుని వేడివేడిగా తాగుతుంటే ఉంటుంది.. ఆ ఫీలింగ్​ చెప్పలేమంటే నమ్మండి. అంత బాగుంటుంది. మరి నచ్చితే మీరూ ఓ సారి ట్రై చేయండి.