పాకం లేకుండానే "కమ్మటి అరిసెలు" ఇలా చేసుకోండి - టేస్ట్​ అద్దిరిపోతాయి!

- తడి పిండి అవసరం లేదు - పాకం పట్టాల్సిన పనిలేదు

How to Make Ariselu Without Pakam: సంక్రాంతి అంటేనే భోగి మంటలు, పిండి వంటలు. ఈ పిండి వంటల్లో అందరి నోరూ ఊరించే వంటకం అరిసెలు. కాని.. అరిసెలు చేయడం కొంచెం కష్టమే. ఎందుకంటే బెల్లం పాకం సరిగ్గా కుదరలేదంటే వాటిని చెత్తడబ్బాలో పడేయాల్సిందే. అరిసెల రుచి మొత్తం పాకంలోనే ఉంటుంది. అయితే.. ఈ పాకం పట్టుకునే పనిలేకుండా అరిసెలు చేసుకునే పద్ధతి ఉంటే బాగుండు అని చాలా మంది అనుకుంటుంటారు. అలాంటివారి కోసమే ఈ రెసిపీ​ తీసుకొచ్చాం. వీటిని తయారు చేయడం చాలా ఈజీ. మరి, లేట్​ చేయకుండా కావాల్సిన పదార్థాలు, తయారీ విధానం ఈ స్టోరీలో తెలుసుకుందాం..

కావాల్సిన పదార్థాలు:

• బియ్యప్పిండి - 1 కప్పు
• గోధుమ పిండి - అర కప్పు
• బెల్లం - 1 కప్పు
• నీళ్లు - కప్పున్నర
• నెయ్యి - సరిపడా
• యాలకుల పొడి - 1 టీ స్పూన్​
• నువ్వులు - 1 టీ స్పూన్​
• నూనె - డీ ఫ్రైకి సరిపడా

తయారీ విధానం:

• ముందుగా ఓ ప్లేట్​లోకి బియ్యప్పిండి, గోధుమ పిండి వేసి కలిపి పక్కన పెట్టాలి.
• ఇప్పుడు స్టవ్​ ఆన్​ చేసి గిన్నె పెట్టి బెల్లం, నీళ్లు పోసి కరిగించుకోవాలి. బెల్లం పూర్తిగా కరిగిన తర్వాత వడకట్టుకోవాలి.
• మరో పాన్​ స్టవ్​ మీద పెట్టుకుని వడకట్టిన బెల్లం నీళ్లు, 1 చెంచా నెయ్యి, యాలకుల పొడి, నువ్వులు వేసి కలిపి నీళ్లు మరిగించుకోవాలి.
• నీళ్లు మరుగుతున్నప్పుడు ముందే కలిపిన బియ్యప్పిండి, గోధుమపిండి మిశ్రమాన్ని కొద్దికొద్దిగా పోసుకుంటూ ఉండలు లేకుండా కలుపుతూ ఉండాలి.
• ఆ తర్వాత మధ్యమధ్యలో నెయ్యి వేసుకుంటూ పిండి మిశ్రమం గిన్నెకు అంటుకోకుండా దగ్గరగా అయ్యేవరకు కలుపుతూ ఉడికించుకోవాలి.
• పిండి దగ్గరకు అయిన తర్వాత స్టవ్​ ఆఫ్​ చేసి పిండి గట్టి పడకుండా మూత పెట్టి చల్లార్చుకోవాలి.
• ఈలోపు స్టవ్​ ఆన్​ చేసి కడాయి పెట్టి డీప్​ ఫ్రైకి సరిపడా నూనె పోసి వేడి చేసుకోవాలి.
• నూనె కాగేలోపు గోరువెచ్చగా ఉన్న పిండి ముద్దను ఓ ప్లేట్​లోకి తీసుకుని బాగా కలిపి చిన్న చిన్న ఉండలుగా చేసుకోవాలి.
• ఇప్పుడు బటర్​ పేపర్​ లేదా పాలీథిన్​ కవర్​ మీద నెయ్యి రాసి ఉండను ఉంచి అరిసెలుగా వత్తుకోవాలి.
• వీటిని కాగుతున్న నూనెలో వేసి ఓ నిమిషం పాటు అలానే ఉంచాలి. ఆ తర్వాత రెండు వైపులా ఎర్రగా కాల్చుకుని నూనె లేకుండా వత్తుకుని ప్లేట్​లోకి తీసుకోవాలి.
• ఇలా పిండి మొత్తాన్ని అరిసెలుగా చేసుకుంటే కేవలం నిమిషాల్లోనే పాకం పట్టే పని లేకుండా అరిసెలు రెడీ.
• నచ్చితే మీరూ ఈ సంక్రాంతి పండక్కి ఓసారి ట్రై చేయండి.