How to Make Punugulu with Idli Batter: ఆరోగ్యానికి మేలు చేసే బ్రేక్ఫాస్ట్లలో ఇడ్లీ ఫస్ట్ ప్లేస్లో ఉంటుంది. అందుకే చాలా మంది రెగ్యులర్గా వీటిని చేసుకుని తింటుంటారు. ఈ క్రమంలోనే రెండు మూడు రోజులకు సరిపడే విధంగా పిండిని ప్రిపేర్ చేసుకుని ఫ్రిడ్జ్లో పెట్టుకుని వాడుతుంటారు. అయితే కొన్నిసార్లి ఇడ్లీలు తినాలిపించదు. దాంతో ప్రిపేర్ చేసిన ఇడ్లీ పిండిని ఏం చేయాలో తెలియక పడేయడం చేస్తుంటారు. అయితే ఇకపై అలాంటి అవసరం లేదు. ఇడ్లీ పిండి మిగిలిపోతే ఎంచక్కా పునుగులు వేసుకోవచ్చు. చలికాలంలో వేడివేడిగా క్రిస్పీగా ఏమైనా తినాలనుకునేవారికి ఇవి సూపర్ ఆప్షన్. వీటిని ప్రిపేర్ చేయడానికి పెద్దగా కష్టపడనవసరం లేదు. మరి ఈ పునుగులకు కావాల్సిన పదార్థాలు, తయారీ విధానం ఈ స్టోరీలో తెలుసుకుందాం.
కావాల్సిన పదార్థాలు:
- ఇడ్లీ పిండి - రెండు కప్పులు
- ఉప్పు - రుచికి తగినంత
- అటుకులు - 2 టేబుల్ స్పూన్స్
- పచ్చిమిర్చి - 2
- ఉల్లిపాయ - 1
- జీలకర్ర - అర టీస్పూన్
- అల్లం - అంగుళం
- బేకింగ్ సోడా - చిటికెడు
- కరివేపాకు - 2 రెమ్మలు
- నూనె - డీప్ ఫ్రై చేయడానికి సరిపడా
తయారీ విధానం:
- ముందుగా ఉల్లిపాయ, అల్లం, కరివేపాకు, పచ్చిమిర్చిని సన్నగా కట్ చేసుకుని పక్కన పెట్టాలి. అలాగే అటుకులను ఓ గిన్నెలోకి తీసుకుని నీళ్లు పోసి పావు గంట నానబెట్టాలి.
- ఇప్పుడు ఓ గిన్నెలోకి ఇడ్లీ పిండి తీసుకోవాలి. అందులోకి రుచికి సరిపడా ఉప్పు వేసి కలుపుకోవాలి. మీరు అంతకుముందే ఇడ్లీ పిండిలో ఉప్పు వేసినట్లైతే చూసుకుని వేసుకోవాలి.
- ఇడ్లీ పిండిలోకి నానబెట్టిన అటుకులను నీళ్లు లేకుండా పిండి వేసుకోవాలి. ఆ తర్వాత సన్నగా కట్ చేసిన ఉల్లిపాయ, పచ్చిమిర్చి, అల్లం, కరివేపాకు తరుగు, జీలకర్ర, బేకింగ్ సోడా వేసి బాగా కలుపుకోవాలి.
- స్టవ్ ఆన్ చేసి కడాయి పెట్టి డీప్ ఫ్రైకి సరిపడా నూనె పోసుకోవాలి. నూనె బాగా కాగిన తర్వాత ఇడ్లీ పిండిని చిన్న చిన్న పునుగులుగా నూనెలో వేసుకోవాలి.
- స్టవ్ను మీడియం ఫ్లేమ్లో పెట్టి రెండు వైపులా గోల్డెన్ బ్రౌన్ కలర్ వచ్చే వరకు వేయించుకోవాలి. ఇలా ఇడ్లీ పిండి మొత్తాన్ని పునుగులుగా వేయించుకోవాలి. అంతే ఎంతో టేస్టీగా ఉండే ఇడ్లీ పిండి పునుగులు రెడీ.
- వీటిని పల్లీ/టమాట/కొబ్బరి చట్నీతో తింటే అద్దిరిపోతాయి. నచ్చితే మీరూ ఇడ్లీ పిండి మిగిలినప్పుడు వీటిని ట్రై చేయండి.
ఇంట్లో కూరగాయలు లేనప్పుడు "పచ్చిమిర్చి ఉల్లిపాయ పచ్చడి" చేయండి - వేడివేడి అన్నంలోకి అద్దిరిపోతుంది!
ఎగ్, చికెన్తో కాదు - ఓసారి ఇలా "మిల్లెట్ నూడుల్స్" చేయండి! - రుచితో పాటు ఆరోగ్యం బోనస్!
