How to Make Methi Biscuits at Home : మెంతికూరతో కర్రీ చేసుకోవడం అందరికీ తెలుసు. కానీ.. బిస్కెట్లు కూడా తయారు చేసుకోవచ్చని మీకు తెలుసా? టేస్ట్ అదుర్స్ అనిపిస్తుంది. మరి.. మెంతికూర బిస్కెట్ల తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఈ స్టోరీలో తెలుసుకుందాం.
కావాల్సిన పదార్థాలు :
- మెంతికూర - 1 కట్ట
- రవ్వ - అర కప్పు
- మైదా - 2 కప్పులు
- నెయ్యి/బటర్ - 3 చెంచాలు
- కారం - అర స్పూన్
- ఉప్పు - రుచికి సరిపడా
- జీలకర్ర - పావు స్పూన్
- మిరియాల పొడి - అర టీస్పూన్
- నూనె - వేయించడానికి తగినంత
తయారీ విధానం :
- ఇందుకోసం ముందుగా మెంతికూరను వీలైనంత సన్నగా కట్ చేసుకొని పక్కన ఉంచుకోవాలి.
- ఇప్పుడు ఒక మిక్సింగ్ బౌల్ తీసుకొని అందులో రవ్వ, మైదా, జీలకర్ర, మిరియాల పొడి, రుచికి తగినంత ఉప్పు, కారం.. ఇలా ఒక్కొక్కటిగా వేసుకొని ఇంగ్రీడియంట్స్ అన్నీ కలిసేలా బాగా మిక్స్ చేసుకోవాలి.
- ఆ తర్వాత అందులో కరిగించుకున్న నెయ్యిని వేసుకొని కాస్త ముద్దలాగా అనుకుంటూ మరోసారి పిండి మొత్తాన్ని బాగా కలుపుకోవాలి. అయితే, ఇక్కడ మీకు నెయ్యి అందుబాటులో లేకపోతే బటర్ యూజ్ చేసినా బిస్కెట్లు మంచి టేస్ట్ వస్తాయి.
- ఆ విధంగా పిండిని కలుపుకున్నాక.. ముందుగా కట్ చేసి పెట్టుకున్న మెంతికూర తరుగును అందులో వేసుకొని ఒకసారి మిక్స్ చేసుకోవాలి.
- ఇప్పుడు తగినన్ని వాటర్ యాడ్ చేసుకుంటూ పిండిని మెత్తని ముద్దలా కలుపుకొని పక్కన పెట్టుకోవాలి. అయితే, మరీ ఎక్కువ వాటర్ వేసుకున్నా బిస్కట్లు మంచి షేప్లో రావనే విషయం గుర్తుంచుకోవాలి.
- అనంతరం చపాతీ పీటపై కాస్త పొడి పిండి చల్లుకొని కలిపిపెట్టుకున్న పిండి ముద్ద నుంచి కొద్దిగా పిండి తీసుకొని చపాతీ రోలర్ సహాయంతో పిండిని రొట్టెలా వత్తుకోవాలి.
- అయితే.. మరీ పల్చగా కాకుండా చపాతీ కన్నా కాస్త మందం ఉండేలా చూసుకోవాలి.
- ఆవిధంగా ప్రిపేర్ చేసుకున్నాక.. దాని మీద గ్లాసు లేదా మూతతో నొక్కి గుండ్రటి ఆకృతులు వచ్చేలా కట్ చేయాలి. లేదంటే.. చాకు లేదా పిజ్జా కట్టర్ సహాయంతో మీకు ఇష్టమైన ఆకృతులలో కట్ చేసుకోవాలి.
- ఆ తర్వాత వాటి మీద ఫోర్క్‌తో గుచ్చి, రంధ్రాలు చేసుకోవాలి. ఆవిధంగా పిండి మొత్తాన్ని ప్రిపేర్ చేసుకొని పక్కన పెట్టుకోవాలి.
- ఇప్పుడు స్టౌపై పాన్ పెట్టుకొని ఆయిల్ వేసుకోవాలి. నూనె వేడెక్కాక.. ప్రిపేర్ చేసుకున్న బిస్కట్లను అందులో వేసి మీడియం మంట మీద ఫ్రై చేసుకోవాలి.
- ఇక అవి ఎప్పుడైతే బాగా వేగి కాస్త రంగు మారగానే ప్లేట్లోకి తీసుకొని సర్వ్ చేసుకుంటే చాలు. అంతే.. టేస్టీగా ఉండే క్రిస్పీ 'మెంతికూర రవ్వ బిస్కెట్లు' రెడీ!
- ఒకవేళ మీరు ఎక్కువ మొత్తంలో ప్రిపేర్ చేసుకుంటే వాటిని చల్లారాక గాలిచొరబడని కంటెయినర్లో స్టోర్ చేసుకుంటే చాలు. కనీసం 15 రోజులు ఫ్రెష్గా ఉంటాయి! మరి, ఆలస్యమెందుకు నచ్చితే మీరూ ఓసారి ట్రై చేసి చూడండి.
ఇవీ చదవండి :
నోరూరించే "పాలకూర దోశ" - ఆకుకూరలు తినని వారికి బెస్ట్ ఛాయిస్ - ప్రిపరేషన్ వెరీ ఈజీ!
ఇంట్లోనే అద్భుతమైన పావ్భాజీ బర్గర్ - స్ట్రీట్ ఫుడ్ అంత టేస్టీగా.. అంతకు మించిన హెల్తీగా!
