ఇల్లు క్లీన్​ చేసే పని పెట్టుకున్నారా? - "బేకింగ్​ సోడా" మంత్రం వేయండి - చిటికెలో క్లీన్ అయిపోతుంది! - Baking Soda Cleaning Tips

How to Use Baking Soda for Cleaning : చాలా మందికి బేకింగ్​ సోడాను వంటల్లో ఉపయోగిస్తారని మాత్రమే తెలుసు. కానీ.. ఈ వంటసోడాను ఇంటిని శుభ్రం చేయడానికి కూడా వాడొచ్చని నిపుణులు చెబుతున్నారు. మరి.. క్లీనింగ్​ విషయంలో బేకింగ్​ సోడాను ఏ విధంగా వాడాలో ఇప్పుడు చూద్దాం.

Cleaning Tips with Baking Soda : సాధారణంగా బేకింగ్ సోడా చాలా మంది వంటింట్లో ఉంటుంది. ఏవైనా పిండి వంటకాలు చేస్తున్నప్పుడు, అలాగే కేక్​ల రుచి పెంచడానికి కచ్చితంగా కాస్త బేకింగ్​ సోడా ఉపయోగిస్తుంటారు. దీనిని సోడియం బైకార్బోనేట్.. ఇంకా వంటసోడా అని కూడా పిలుస్తారు. అయితే.. ఈ బేకింగ్​ సోడాను వంటల్లోనే కాకుండా కిచెన్​, బాత్​రూమ్​లోని టైల్స్​, ఇంట్లోని స్టెయిన్​లెస్​ స్టీల్​ ట్యాప్స్​ క్లీన్​ చేయడానికీ ఉపయోగించవచ్చని నిపుణులు చెబుతున్నారు. బేకింగ్​ సోడాతో వీటిని ఎలా శుభ్రం చేయాలో మీకు తెలుసా? ఇప్పుడు చూద్దాం.

కిచెన్​లోని మరకలను ఇలా మాయం చేయండి..

ఎన్ని జాగ్రత్తలు తీసుకున్నా కూడా.. రోజూ వంట చేసే క్రమంలో వంటగది ప్లాట్‌ఫామ్, స్టౌ, కిచెన్​లోని టైల్స్​పై నూనె మరకలు పడుతుంటాయి. అయితే, బేకింగ్​ సోడాతో ఈ మరకలని ఈజీగా మాయం చేసుకోవచ్చు. ముందుగా గిన్నెలో కొద్దిగా బేకింగ్​ సోడా, నిమ్మరసం, నీళ్లు పోసుకుని బాగా కలపండి. ఈ మిశ్రమాన్ని కిచెన్​లో మరకలున్న చోట చల్లండి. కొద్దిసేపటి తర్వాత గోరువెచ్చని నీటితో శుభ్రంగా తుడవండి. ఇలా చేస్తే వంటగదిలోని ఆయిల్ మరకలు పోయి.. కిచెన్​ తళతళా మెరుస్తుంది.

బాత్​రూమ్​లోని టైల్స్​ కొత్తవాటిలా..

సాధారణంగా బాత్​రూమ్​లోని ఫ్లోర్​, టైల్స్​పై ఏర్పడిన మొండి మరకలు ఓ పట్టాన వదలవు. అయితే, ఒక్కసారి బేకింగ్​ సోడాని ఇలా ఉపయోగిస్తే.. బాత్​రూమ్​లోని టైల్స్ కొత్తవాటిలా​ తళతళా మెరిసిపోతాయి. ముందుగా టైల్స్​పై బేకింగ్​ సోడాని చల్లండి. తర్వాత కొన్ని నీళ్లు చల్లుతూ.. బ్రష్​తో టైల్స్​ని రుద్దండి. ఇప్పుడు వాటర్​తో క్లీన్​ చేస్తే సరిపోతుంది. ఇక్కడ మీరు బేకింగ్​ సోడాతో పాటు వెనిగర్​ లేదా నిమ్మరసం కూడా ఉపయోగించవచ్చు.

స్టెయిల్​లెస్​ స్టీల్​ ట్యాప్స్​..

ప్రస్తుత కాలంలో చాలా మంది బాత్​రూమ్, కిచెన్​లలో ​స్టెయిల్​లెస్​ స్టీల్​ ట్యాప్స్ ఫిక్స్​ చేయించుకుంటున్నారు. అయితే, కొన్ని రోజుల తర్వాత వీటిపై మురికి, ఉప్పు మరకలు పేరుకుపోయి చూడడానికి అందవిహీనంగా కనిపిస్తాయి. బేకింగ్​ సోడాతో చకచకా వీటిని కొత్త వాటిలా మెరిపించవచ్చు. ముందుగా గిన్నెలో కొద్దిగా బేకింగ్​ సోడా తీసుకుని వాటర్​ కలిపి పేస్ట్​లాగా చేయండి. ఈ మిశ్రమాన్ని ట్యాప్​కి పట్టించి అరగంట సేపు నాననివ్వండి. తర్వాత టూత్​బ్రష్​తో ట్యాప్​పైన రుద్ది.. నీటితో క్లీన్​ చేయండి. అంతే ట్యాప్​ మెరిసిపోతుంది.

కార్పెట్లు క్లీన్​ చేసేద్దాం..

జిడ్డుగా, మురికిగా మారిన కార్పెట్లను బేకింగ్ సోడా సహాయంతో ఈజీగా క్లీన్​ చేయవచ్చు. అదేలా అంటే.. కార్పెట్​ని నానబెట్టే బకెట్లో బట్టల సోడాతో పాటు కొద్దిగా బేకింగ్ సోడా, వెనిగర్​ కూడా కలపండి. 15 నిమిషాల పాటు కార్పెట్​ని నానబెట్టి.. ఉతకండి. ఈ విధంగా చేస్తే కార్పెట్​పై ఉన్న మురికి, బ్యాక్టీరియా తొలగిపోతాయని నిపుణులు చెబుతున్నారు.

దిండుపై మరకలు మాయం చేద్దాం..

అనుకోకుండా కొన్నిసార్లు దిండుపై నూనె, కాఫీ మరకలు పడుతుంటాయి. వీటిని తొలగించడానికి బేకింగ్​ సోడా బాగా ఉపయోగపడుతుంది. ముందుగా టేబుల్‌ స్పూన్‌ బేకింగ్‌ సోడాలో కొద్దిగా నీళ్లు పోసుకుని పేస్ట్​లాగా కలిపి.. దిండుపై అప్లై చేయండి. కొద్దిసేపటి తర్వాత ఓ క్లాత్​ తీసుకుని శుభ్రం​ చేస్తే మరకలు పోతాయి. 2016లో 'జర్నల్ ఆఫ్ క్లీనింగ్ సైన్స్'లో ప్రచురించిన నివేదిక ప్రకారం.. వంట సోడా దిండుపై ఉన్న కాఫీ, నూనె, జిడ్డు మరకలను తొలగించడానికి బాగా పనిచేసిందని గుర్తించారు. ఈ అధ్యయనంలో అమెరికాలోని యూనివర్సిటీ ఆఫ్ కాలిఫోర్నియాకు చెందిన 'డాక్టర్‌ మార్గరెట్ జాన్సన్' పాల్గొన్నారు.

ఇవి కూడా చదవండి :