సండే స్పెషల్​ : రాయలసీమ స్టైల్​ స్పైసీ "మటన్​ వేపుడు" - ఇలా ప్రిపేర్ చేశారంటే మసాలా ఘాటు నషాళానికి ఎక్కాల్సిందే! - Rayalaseema Style Spicy Mutton Fry

Mutton Fry: చాలా మందికి మటన్​ అంటే ఇష్టం. మటన్​తో ఎన్నో రకాలు వెరైటీలు చేసుకుని తింటుంటారు. ఈ సండే స్పెషల్​గా రాయలసీమ స్టైల్​ మటన్​ వేపుడు చేసుకోండి. మేం చెప్పే పద్ధతిలో చేసుకున్నారంటే.. మళ్లీ మళ్లీ కావాలంటారు. మరి, ఈ రెసిపీని ఎలా చేయాలో ఇప్పుడు చూద్దాం.

Rayalaseema Style Spicy Mutton Fry: మటన్​.. ఈ పేరు వింటేనే చాలా మంది ఎప్పుడెప్పుడు తినాలా అని ఎదురుచూస్తుంటారు. ఇక సండే వచ్చిందంటే కచ్చితంగా ఇంట్లో వండాల్సిందే. అయితే.. మటన్​ను తీరొక్క రీతిలో చేసుకుంటారు. పులుసు, కూర, ఫ్రై, గోంగూర మటన్​, చుక్కకూర మటన్​, మటన్​ ధమ్​ బిర్యానీ.. ఇలా ఒక్కటేమిటి ఎన్ని రకాలుగా వీలైతే అన్ని రకాలుగా వండుకుంటుంటారు. చాలా మంది మటన్ పులుసుగా వండుతుంటారు. కానీ.. ఫ్రై చేస్తే టేస్ట్​ అద్దిరిపోతుంది. అది కూడా రాయలసీమ స్టైల్లో ట్రై చేస్తే.. మసాలా ఘాటు నాషాళానికి ఎక్కాల్సిందే. మరి, ఈ రెసిపీ ఎలా చేయాలో ఒక లుక్కేయండి..

మటన్​ ఫ్రై కి కావాల్సిన పదార్థాలు:

• లేత మటన్ - అరకిలో
• అల్లం వెల్లులి పేస్టు - 1 టేబుల్​ స్పూన్​
• ధనియాల పొడి - 1 టేబుల్​ స్పూన్​
• కారం- 2 టేబుల్​ స్పూన్​
• ఉప్పు - రుచికి సరిపడా
• నూనె - 2 టేబుల్​ స్పూన్లు
• పసుపు - 1 టీస్పూన్​
• నీరు - తగినంత

వేపుడు కోసం

• నూనె - తగినంత
• అల్లం వెల్లుల్లి పేస్టు - 1 టేబుల్​ స్పూన్​
• కరివేపాకు - 2 రెమ్మలు
• ఎండు మిర్చి - 4
• పచ్చిమిర్చి - 3
• గరం మసాలా - 1 టీస్పూన్​
• కొత్తిమీర తరుగు - కొద్దిగా
• కరివేపాకు - 2 రెమ్మలు

తయారీ విధానం:

• ముందుగా మటన్​ ముక్కలను ఓ గిన్నెలో వేసుకుని కారం, అల్లం వెల్లుల్లి పేస్ట్​, ఉప్పు, పసుపు, ధనియాల పొడి, నూనె వేసి ముక్కలకు పట్టే విధంగా బాగా కలిపి సుమారు మూడు గంటల పాటు ఫ్రిడ్జ్​లో పెట్టుకోవాలి.
• మూడు గంటల తర్వాత స్టవ్​ ఆన్​ చేసి కుక్కర్​ పెట్టి 2 టేబుల్​ స్పూన్ల ఆయిల్​ వేడి చేసుకోవాలి. అది హీట్​ అయిన తర్వాత మటన్​ ముక్కలు వేసి కలుపుకోవాలి.
• ఆ తర్వాత మటన్​లోకి 300ml నీళ్లు పోసి మీడియం ఫ్లేమ్​ మీద 6 విజిల్స్​ వచ్చేవరకు ఉడికించుకుని పక్కకు పెట్టుకోవాలి.
• ఇప్పుడు స్టవ్​ ఆన్​ చేసి కడాయి పెట్టి అరకప్పు నూనె పోసుకుని వేడి అయ్యాక రెండు రెబ్బల కరివేపాకు వేసి వేయించుకోవాలి. ఆ తర్వాత ఎండుమిర్చి, పచ్చిమిర్చి వేసి వేయించుకోవాలి.
• అవి వేగాక అల్లం వెల్లుల్లి పేస్ట్​ వేసి పచ్చి వాసన పోయేంతవరకు వేయించుకోవాలి. ఇప్పుడు అందులోకి ఉడికించిన మటన్​ నీళ్లతో సహా పోసుకుని.. మీడియం ఫ్లేమ్​ మీద నీళ్లు ఇగిరిపోయేంతవరకు కలుపుతూనే వేయించుకోవాలి.
• 15 నిమిషాలకి ముక్కలు వేగి నీరు ఇంకిపోయి నూనె పైకి తేలుతుంటుంది. అప్పుడు మరోసారి బాగా కలిపి గరం మసాలా వేసి ముక్కకు పట్టేలా కలుపుకోవాలి.
• దింపే ముందు కొత్తమీర తరుగు, కరివేపాకు వేసి కలిపి స్టవ్​ ఆఫ్​ చేస్తే అంతే. ఎంతో రుచికరంగా, కారంగా ఉండే రాయలసీమ స్టైల్​ మటన్​ వేపుడు రెడీ.