కొలెస్ట్రాల్​ను కరిగించే "ఉలవల కారం పొడి" - వేడి వేడి అన్నంలోకి తింటే అమృతమే!

-ఉలవలతో ఇలా కారప్పొడి చేసుకోండి -వేడి వేడి అన్నంలోకి నెయ్యితో అద్దిరిపోతుంది -ఆరోగ్య ప్రయోజనాలు కూడా పుష్కలం

How to Make Ulava Karam Podi: వేడి వేడి అన్నంలోకి కొద్దిగా ఉలవచారు పోసుకుని, పైన మీగడ వేసుకుని ఒక్క ముద్ద నోట్లో పెట్టుకుంటే ఆహా అనిపిస్తుంది ఎవరికైనా. అయితే ఉలవలతో కేవలం చారు మాత్రమే కాదు కారప్పొడి కూడా ప్రిపేర్​ చేసుకోవచ్చు. టేస్ట్​ చాలా బాగుంటుంది. వేడి వేడి అన్నంలోకి కొద్దిగా ఈ కారం పొడి, నెయ్యి వేసుకుని తింటే అమృతమే. పైగా ఉలవలు ఆరోగ్యానికి ఎంతో మేలు చేస్తాయి. కొలెస్ట్రాల్​ కరిగించడం నుంచి షుగర్​ కంట్రోల్​ చేయడానికి, జీర్ణ వ్యవస్థను ఆరోగ్యంగా ఉంచడానికి సహా ఎన్నో విధాలుగా ఉపయోగపడతాయి. మరి లేట్​ చేయకుండా ఈ పొడికి కావాల్సిన పదార్థాలు, తయారీ విధానం ఈ స్టోరీలో తెలుసుకుందాం.

కావాల్సిన పదార్థాలు:

• ఉలవలు - 200 గ్రాములు
• మినపప్పు - 2 టీ స్పూన్లు
• శనగపప్పు - 2 టీ స్పూన్లు
• నూనె - సరిపడా
• జీలకర్ర - అర టీస్పూన్​
• బ్యాడిగి మిరపకాయలు - 20
• వెల్లుల్లి రెబ్బలు - 5
• ఎండు కొబ్బరి ముక్కలు - పావు కప్పు
• చింతపండు - చిన్న ఉసిరికాయంత
• ఉప్పు - రుచికి సరిపడా

తయారీ విధానం:

• స్టవ్​ ఆన్​ చేసి పాన్​ పెట్టి ఉలవలు వేసి వేయించుకోవాలి. ఉలవలు మంచి వాసన వచ్చేవరకు సిమ్​లోనే నిధానంగా వేయించుకోవాలి.
• ఉలవలు పూర్తిగా వేగి మంచి వాసన వస్తున్నప్పుడు ఓ ప్లేట్​లోకి తీసుకోవాలి.
• ఇప్పుడు అదే పాన్​లో మినపప్పు, శనగపప్పు వేసి ఓ రెండు చుక్కల నూనె వేసి దోరగా ఫ్రై చేసుకోవాలి. ఆ తర్వాత జీలకర్ర వేసి కూడా వేయించుకోవాలి.
• ఇలా వేయించుకున్నవాటిని ఓ ప్లేట్​లోకి తీసుకోవాలి. ఇప్పుడు అదే పాన్​లో టీ స్పూన్​ నూనె వేసి బ్యాడిగి మిరపకాయలు వేసి వేయించుకోవాలి. ఒకవేళ మీరు సాధారణ మిరపకాయలు వాడుతున్నట్లైతే కారానికి సరిపోయే విధంగా వేసుకోవాలి.
• మిరపకాయలు వేగుతున్నప్పుడు వెల్లుల్లి రెబ్బలు, ఎండు కొబ్బరి ముక్కలు కూడా వేసి ఫ్రై చేసుకోవాలి. ఇవన్నీ వేగిన తర్వాత స్టవ్​ ఆఫ్​ చేసి పక్కన పెట్టాలి.
• ఇప్పుడు ఫ్రై చేసుకున్న ఉలవలు, మిరపకాయల మిశ్రమాన్ని పూర్తిగా చల్లారనివ్వాలి.
• ఆ తర్వాత వాటిని మిక్సీజార్​లోకి తీసుకుని రుచికి సరిపడా ఉప్పు, చింతపండు వేసి మెత్తగా గ్రైండ్​ చేసుకోవాలి. చింతపండు వేసుకోకపోయినా ఈ కారప్పొడి సూపర్​గా ఉంటుంది. అంతే ఎంతో రుచికరమైన, మరెంతో ఆరోగ్యకరమైన ఉలవల కారప్పొడి రెడీ.
• దీన్ని ఓ గాజు పాత్రలో స్టోర్​ చేసుకుని వేడి వేడి అన్నంలోకి నెయ్యితో తింటే అద్దిరిపోతుంది. అంతేకాకుండా ఇడ్లీ, దోశ, ఉప్మా వంటి టిఫెన్స్​లోకి కూడా పర్ఫెక్ట్. నచ్చితే మీరూ ఓసారి ట్రై చేయండి.