How to Make Mutton Masala Curry : నాన్వెజ్ ప్రియులు మాంసాహారంలో మటన్ ఎక్కువగా ఇష్టపడుతుంటారు. ఇక సండే వచ్చిందంటే తప్పకుండా మటన్ ఉండాల్సిందే. కాస్త ధర ఎక్కువైనా పర్లేదు కానీ.. సండే రోజు టేస్టీ మటన్ తినాల్సిందేనంటారు నాన్వెజ్ లవర్స్ చాలా మంది. అయితే.. నార్మల్గా మటన్ కర్రీని అందరూ వండుతారు. ఇదే తిని ఇంట్లో వాళ్లందరికి కాస్త బోర్గా అనిపిస్తుంది. అయితే, మీ కోసమే ఆంధ్ర స్టైల్లో ఘుమఘుమలాడే 'మటన్ మసాలా రెసిపీ'ని పరిచయం చేయబోతున్నాం. ఒక్కసారి ఇలా చేశారంటే ఇంట్లో వాళ్లందరూ లొట్టలేసుకుంటూ ప్లేట్ మొత్తం ఖాళీ చేస్తారు. మరి ఇంకెందుకు ఆలస్యం ఆంధ్ర స్టైల్లో టేస్టీ మటన్ మసాలా కర్రీ ఎలా చేయాలో ఓ లుక్కేయండి.
మటన్ మసాలా కర్రీ తయారీకి కావాల్సిన పదార్థాలు :
- మటన్- అరకేజీ
- నూనె- నాలుగు చెంచాలు
- టేబుల్ స్పూన్- నెయ్యి
- పచ్చి కొబ్బరి ముక్కలు-అరకప్పు
- జీడిపప్పు- అరకప్పు (నీటిలో నానబెట్టండి)
- గసగసాలు- రెండు చెంచాలు(నీటిలో నానబెట్టండి)
- ఉల్లిపాయలు-2
- టమాటాలు-2
- పచ్చిమిర్చిలు-4
- అల్లం వెల్లుల్లి పేస్ట్-2 టేబుల్స్పూన్లు
- ఉప్పు- తగినంత
- పసుపు-అరటీస్పూన్
- కరివేపాకు -2 రెమ్మలు
- కొత్తిమీర- కొద్దిగా
- ధనియాలపొడి- చెంచా
- గరంమసాలాపొడి- టీస్పూన్
- వేయించిన జీలకర్రపొడి - టీస్పూన్
- కారం- రెండు చెంచాలు
తయారీ విధానం..
- మటన్ రెండుమూడుసార్లు నీటిలో శుభ్రంగా కడిగి పక్కన పెట్టుకోండి.
- స్టౌపై ప్రెషర్ కుక్కర్ పెట్టి అందులో మటన్ వేయండి. ఇందులో లీటర్కు పైగా నీళ్లను యాడ్ చేసుకుని మీడియమ్ ఫ్లేమ్లో 6 నుంచి 7 విజిల్స్ వచ్చే వరకు మెత్తగా ఉడికించుకోండి.
- ఇప్పుడు మిక్సీ జార్లో నానబెట్టిన జీడిపప్పు, గసగసాలు, పచ్చికొబ్బరి ముక్కలు వేసి మెత్తగా గ్రైండ్ చేసుకోండి. ఈ పేస్ట్ని ఒక చిన్న గిన్నెలోకి తీసుకోండి.
- అదే మిక్సీ గిన్నెలో కట్ చేసిన ఉల్లిపాయ ముక్కలు, పచ్చిమిర్చిలు వేసుకుని నీళ్లు పోసుకుని మెత్తగా పేస్ట్ చేసుకుని పక్కన పెట్టుకోండి.
- అలాగే టమాటా ఫ్యూరీ పేస్ట్ కూడా సిద్ధం చేసుకోండి.
- ఇప్పుడు పాన్లో ఆయిల్ వేసుకుని వేడి చేయండి. ఇందులో కరివేపాకు రెమ్మలు, ఉల్లిపాయ, పచ్చిమిర్చి పేస్ట్ వేసి వేయించండి. తర్వాత అల్లం వెల్లుల్లి పేస్ట్, రుచికి సరిపడా ఉప్పు వేసి కలపండి. ఇప్పుడు పసుపు, ధనియాలపొడి, కారం వేసి కలపండి.
- ఇందులో టమాటా ఫ్యూరీ, పచ్చికొబ్బరి, గసగసాల పేస్ట్ వేసుకుని పచ్చివాసన పోయేంత వరకు ఫ్రై చేసుకోండి. ఇందులోకి మటన్ని ఉడికించుకోగా మిగిలిన వాటర్ యాడ్ చేసి.. మూత పెట్టి పులుసు మరిగించండి.
- ఇప్పుడు ఉడికించుకున్న మటన్ ముక్కలు, గరంమసాలా పొడి, జీలకర్ర పొడి వేసి మూత పెట్టి నూనె పైకి తేలెంత వరకు ఉడికించుకోండి.
- మటన్ కర్రీ దింపేసుకునే ముందు టేబుల్ స్పూన్ నెయ్యి, కొత్తిమీర చల్లుకుంటే.. నోరూరించే ఆంధ్ర స్టైల్ మటన్ మసాలా కర్రీ మీ ముందుంటుంది. నచ్చితే మీరు కూడా ఈ టేస్టీ మటన్ కర్రీని ఇంట్లో ప్రిపేర్ చేయండి.
ఇవి కూడా చదవండి :
సండే స్పెషల్: అద్దిరిపోయే "మటన్ ఛుడ్వా" - ఈ అద్భుతమైన రుచిని ఆస్వాదించండిలా!
