How To Make Mirchi Bajji : ఈ వర్షాకాలంలో నాలుగు చినుకులు పడటమే ఆలస్యం.. వేడివేడి టీ/ కాఫీలతో పాటు బజ్జీలూ, పునుగులూ, పకోడీలు వంటి స్నాక్స్ తినాలనిపిస్తుంది. అయితే, ఈ స్నాక్స్లో ఎన్ని రకాలున్నా.. మిర్చి బజ్జీ టేస్ట్ వేరే లెవెల్లో ఉంటుంది. వేడివేడిగా అప్పుడే వేయించిన మిర్చి బజ్జీలను.. అలా ఉల్లిపాయలతో కలిపి కొరుక్కుని తింటే.. జిందగీ ఖుష్ అవుతుంది.
అయితే.. బయట తినాలంటే హెల్త్ టెన్షన్స్ ఉంటాయి. ఇంట్లో చేస్తేనేమో.. రోడ్ సైడ్ బండి అంత టేస్ట్ రాదు. అందుకే.. మీకోసం ఈ రెసిపీ తెచ్చాం. ఇక్కడ చెప్పే విధంగా మిర్చి బజ్జీలను ఇంట్లో చేశారంటే.. అచ్చం అదే టేస్ట్ ఫీలవుతారు. అంతేకాదు.. మళ్లీ మళ్లీ ఇలానే ట్రై చేస్తారు. మరి ఇంకెందుకు ఆలస్యం.. ?వేడివేడిగా మిర్చి బజ్జీలను సింపుల్గా ఎలా చేయాలో చూసేద్దాం పదండి..
మిర్చి బజ్జీలు చేయడానికి కావాల్సిన పదార్థాలు :
- బజ్జీ మిరపకాయలు -10
- చింతపండు - కొద్దిగా
- శనగపిండి- కప్పు
- ఉప్పు- రుచికి సరిపడా
- కారం- టీస్పూన్
- పసుపు - చిటికెడు
- వాము- టీస్పూన్
- బియ్యం పిండి- అరకప్పు
- వంటసోడా-చిటికెడు
- నీళ్లు- కొద్దిగా
స్ట్రీట్ స్టైల్ మిర్చి బజ్జీలు తయారు చేయు విధానం :
- ముందుగా చింతపండులో కొన్ని నీళ్లు పోసి.. చిక్కని చింత పండు గుజ్జును రెడీ చేసుకోవాలి. ఇందులోకి టేబుల్స్పూన్ శనగపిండి వేసి కలపండి.
- ఆ తర్వాత కొద్దిగా వామును అరచేతిలో వేసుకుని బాగా నలిపి చింత పండు మిశ్రమంలో వేసి బాగా కలపండి.
- ఇలా చింత పండు గుజ్జు కట్ చేసిన మిర్చిలో స్టఫ్ చేయడం వల్ల మిర్చి బజ్జీ చాలా రుచిగా ఉంటుందని గుర్తుంచుకోండి.
- ఇప్పుడు ఒక బౌల్లో శనగపిండి, బియ్యం పిండి, రుచికి సరిపడా ఉప్పు, కారం, పసుపు, వంటసోడా వేసి బాగా మిక్స్ చేయండి.
- పిండి జారుగా, చిక్కగా కాకుండా నీళ్లను సరిపోయేంతంగా పోసుకోండి.
- తర్వాత మిర్చిలను శుభ్రంగా కడిగి మధ్యలోకి కట్ చేసుకోండి. ఇప్పుడు మధ్యలో మనం ప్రిపేర్ చేసుకున్న చింతపండు మిశ్రమాన్ని స్టఫ్ చేయండి.
- ఇలా అన్ని మిర్చిలకూ చింతపండు గుజ్జు స్టఫ్ చేసిన తర్వాత.. స్టౌపై పాన్ పెట్టి.. అందులో మిర్చి బజ్జీలు వేయించడానికి సరిపడా ఆయిల్ పోసుకోండి.
- నూనె బాగా వేడైన తర్వాత శనగపిండి మిశ్రమంలో స్టఫ్ చేసుకున్న మిర్చి బజ్జీలను చిక్కగా ముంచి ఆయిల్లో ఫ్రై చేసుకోండి.
- మిర్చిలు బాగా వేగిన తర్వాత.. వేడివేడిగా కొన్ని ఉల్లిపాయ ముక్కలు పక్కన పెట్టుకుని తింటే టేస్ట్ అద్దిరిపోతుంది.
- అంతే ఇలా సింపుల్గా మీకు ఎంతో ఇష్టమైన కరకరలాడే స్ట్రీట్ స్టైల్ మిర్చి బజ్జీలను ఇంట్లోనే చేసుకోవచ్చు.
- నచ్చితే మీరు కూడా ఇలానే మిర్చి బజ్జీలను ట్రై చేయండి. మీ ఇంట్లో వాళ్లందరూ సూపర్గా చేశావని మీకు క్రెడిట్ ఇవ్వడం ఖాయం!
ఇవి కూడా చదవండి :
నోరూరించే క్రిస్పీ "ఆనియన్ సమోసా" - నిమిషాల్లో ప్రిపేర్ చేసుకోండి! - టేస్ట్ మాత్రం వేరే లెవల్!
పానీపూరీ బయట తింటే సకల రోగాలు - చక్కగా ఇలా ఇంట్లో చేసుకోండి! - అదే టేస్ట్, సూపర్ క్వాలిటీ!
