మార్కెట్లో కొనే పనిలేకుండా - ఇంట్లోనే ఈజీగా "కస్టర్డ్ పౌడర్​ను" ప్రిపేర్ చేసుకోండిలా!

-తక్కువ పదార్థాలతో ఇంట్లోనే సులువుగా కస్టర్డ్​ పౌడర్ -నిమిషాల్లో రెడీ అయ్యే ఈ పొడితో ఎన్నో రకాల వంటలు!​

How to Make Custard Powder Easily at Home: కస్టర్డ్ పౌడర్ గురించి ప్రత్యేకమైన పరిచయాలు అక్కర్లేదు. ఐస్​క్రీమ్స్, ఫ్రూట్ సలాడ్స్, మిల్క్​షేక్స్, డెజర్ట్స్​.. ఇలా రకరకాల వంటల్లో ఈ పౌడర్​ను ఉపయోగిస్తుంటారు. ఇక ఈ పౌడర్​ కొనాలంటే షాప్స్​, సూపర్​ మార్కెట్స్​కు వెళ్లాల్సిందే. అయితే ఇప్పుడా అవసరం లేకుండా.. ఇంట్లోనే చాలా ఈజీగా ప్రిపేర్ చేసుకోవచ్చు. అందుకోసం ఎక్కువ శ్రమించాల్సిన పనిలేదు! కేవలం పదే పది నిమిషాల్లో ఈ కస్టర్డ్ పౌడర్​ను సులభంగా తయారు చేసుకోవచ్చు. పైగా ఇంట్లో చేసుకుంటే ఆరోగ్యం కూడా. అంతేకాదు.. మీరు సొంతంగా తయారు చేసుకున్న ఈ పౌడర్​తో ప్రిపేర్ చేసుకునే రెసిపీలు చాలా రుచికరంగానూ ఉంటాయి! ఇంతకీ.. హోమ్ మేడ్ కస్టర్డ్ పౌడర్ తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఈ స్టోరీలో తెలుసుకుందాం.

కావాల్సిన పదార్థాలు :

• పంచదార - అర కప్పు
• కార్న్​ఫ్లోర్(మొక్కజొన్న పిండి) - 1 కప్పు
• పాలపొడి - 1 కప్పు
• వెనీలా ఎక్స్‌ట్రాక్ట్ - అర చెంచా
• యెల్లో ఫుడ్ కలర్ - అర టీస్పూన్

తయారీ విధానం :

• ఇందుకోసం ముందుగా మిక్సీ జార్​లో తీసుకొని అందులో పంచదార వేసుకొని మెత్తగా గ్రైండ్ చేసుకోవాలి.
• ఆవిధంగా మిక్సీ పట్టుకున్నాక.. అందులో కార్న్​ఫ్లోర్, పాలపొడి, వెనీలా ఎక్స్‌ట్రాక్ట్, ఫుడ్ కలర్ వేసి మరోసారి అన్నింటినీ మెత్తగా గ్రైండ్ చేసుకోవాలి.
• అయితే, ఈ మిశ్రమం ఏమాత్రం బరకగా ఉండకూడదు కాబట్టి మిక్సీ పట్టుకున్న దాన్ని ఒక మిక్సింగ్​ బౌల్​లో జల్లెడ పట్టుకుంటే ఇంకా మంచిది.
• ఇక జల్లెడ పట్టుకున్న ఆ మిశ్రమాన్ని వెంటనే స్టోర్ చేసుకోకుండా.. గ్రైండ్ చేసుకున్నప్పుడు ఉన్న వేడి పూర్తిగా చల్లారాక తడి లేని పొడి సీసాలో భద్రం చేసుకుంటే చాలు. అంతే.. ఇంట్లోనే ఈజీగా "కస్టర్డ్ పౌడర్" రెడీ!
• ఇక ఈ కస్టర్డ్​ పౌడర్​ను కేవలం వెనిలీ ఫ్లేవర్​తో మాత్రమే కాకాండా ఇతర ఫ్లేవర్స్​కు కలిగిన ఎక్స్​ట్రాక్ట్స్​ కూడా వేసుకోవచ్చు.
• ఇక ఈ కస్టర్డ్ పౌడర్​తో మీకు కావాలనుకున్నప్పుడు కస్టర్డ్‌ చేసుకోవచ్చు. అందులో ఆయా కాలాల్లో దొరికే మామిడి, అరటి, కర్బూజ, ద్రాక్ష.. వంటి తాజా పండ్ల ముక్కలు కలిపి నచ్చిన టేస్ట్​లో ఫ్రూట్​ కస్టర్డ్ రెడీ చేసుకోవచ్చు. ఒకవేళ పండ్లు అందుబాటులో లేకుంటే డ్రైఫ్రూట్స్​తో కూడా ప్రిపేర్​ చేసుకోవచ్చు.
• అయితే.. ఇది ప్రిపేర్​ చేయాలంటే నాలుగు కప్పుల పాలకు 3 టేబుల్‌ స్పూన్ల కస్టర్డ్‌ పౌడర్, పిస్తా, జీడిపప్పు, బాదం, ఖర్జూరాలు ఒక్కోటీ ఐదు చొప్పున, రెండు టేబుల్‌ స్పూన్ల కిస్‌మిస్‌ అవసరమవుతాయి. మరి, ఇంకెందుకు ఆలస్యం మీరు ఓసారి ఇలా కస్టర్డ్ పౌడర్​ను చేసుకొని.. నచ్చిన డిజర్ట్​ని ప్రిపేర్ చేసుకొని ఇంటిల్లిపాది ఆస్వాదించండి!

ఇవీ చదవండి :