ఓసారి ఇలా "ఎగ్​ ఫ్రెంచ్ ఫ్రైస్" ట్రై చేయండి - ఇంటిల్లిపాదీ లొట్టలేసుకుంటూ తింటారంతే!

యమ్మీ యమ్మీగా ఎగ్ ఫ్రెంచ్ ఫ్రైస్ - ఇలా చేసి ఇచ్చారంటే పిల్లలు ఒక్కటీ మిగల్చరు!

Egg French Fries Recipe in Telugu : ఫ్రెంచ్ ఫ్రైస్ ఈ పేరు చెప్పగానే చాలా మందికి నోరూరిపోతుంది. ఆలూతో ప్రిపేర్ చేసుకునే వీటిని వయసుతో ప్రమేయం లేకుండా అందరూ చాలా ఇష్టంగా తింటారు. ఇక పిల్లలైతే ప్రత్యేకంగా చెప్పాల్సిన పనిలేదు. అయితే, ఎప్పుడూ రొటీన్​గా బంగాళదుంపలతోనే కాకుండా ఈసారి కాస్త డిఫరెంట్​గా ట్రై చేయండి. అదే, "ఎగ్ ఫ్రెంచ్ ఫ్రైస్". ఇవి కూడా చాలా రుచికరంగా ఉంటాయి. గుడ్డుతో ప్రిపేర్ చేసేవి కాబట్టి వీటిని పిల్లల నుంచి పెద్దల వరకు అందరూ లొట్టలేసుకుని మరీ తింటారు! పైగా ఈ ఫ్రెంచ్ ఫ్రైస్​ని చాలా సులభంగా తయారు చేసుకోవచ్చు. ఇంతకీ, అందుకు కావాల్సిన పదార్థాలేంటి? తయారీ విధానం ఏంటో ఇప్పుడు చూద్దాం.

కావాల్సిన పదార్థాలు :

• ఎగ్స్ - 3 నుంచి 4
• బంగాళ దుంపలు - 3(మీడియం సైజ్​వి)
• ఉప్పు - రుచికి సరిపడా
• గరంమసాలా - కొద్దిగా
• కారం - తగినంత
• చిల్లీ ఫ్లేక్స్ - 2 టేబుల్​స్పూన్లు
• డీప్ ఫ్రైకి సరిపడా - నూనె
• బ్రెడ్ క్రంబ్స్ - కొద్దిగా

తయారీ విధానం :

• ఇందుకోసం ముందుగా బంగాళదుంపలను పొట్టు తీసుకోవాలి. ఆపై వాటిని ఫ్రెంచ్ ఫ్రైస్ మాదిరిగా సన్నని పొడవాటి ముక్కలుగా కట్ చేసుకోవాలి. తర్వాత ఆ ముక్కలను సగం వరకు ఉడికించుకోవాలి.
• ఆ విధంగా ఉడికించుకున్నాక వాటిని ఒక బౌల్​లో ఉప్పు నీటిని​ తీసుకొని అందులో వేసి గంట పాటు నాననివ్వాలి.
• ఇక్కడ బంగాళదుంప ముక్కలను ముందుగా ఉడికించి నానబెట్టుకోవడం వల్ల ఫ్రెంచ్ ఫ్రైస్ క్రిస్పీగా, క్రంచీగా వస్తాయి. పైగా ఎగ్ కోటింగ్ మాడకుండా ఉంటుందని గుర్తుంచుకోవాలి.
• ఈలోపు రెసిపీలోకి కావాల్సిన మిగతా ఇంగ్రీడియంట్స్​ని ప్రిపేర్ చేసుకోవాలి. ముందుగా ఒక చిన్న బౌల్​లో ఎగ్స్​ని పగులకొట్టి పోసుకోవాలి. ఆపై అందులో ఉప్పు వేసి కలిపి పక్కన పెట్టుకోవాలి. అదేవిధంగా ఒక ప్లేట్​లో బ్రెడ్ క్రంబ్స్ తీసుకొని రెడీగా ఉంచుకోవాలి.
• గంట తర్వాత నానబెట్టుకున్న ఆలూ ముక్కలను ఒక ప్లేట్​లోకి తీసుకొని వాటిపై గరంమసాలా, ఉప్పు, కారం, చిల్లీ ఫ్లేక్స్ చల్లుకోవాలి.
• ఇప్పుడు స్టౌపై కడాయి పెట్టుకొని నూనె వేసుకోవాలి. ఆయిల్ వేడయ్యాక ఆలూ ముక్కలను ముందుగా ప్రిపేర్ చేసుకున్న కోడిగుడ్డు మిశ్రమంలో ముంచి ఆ తర్వాత బ్రేడ్ క్రంబ్స్​తో కోట్ చేసుకొని కాగుతున్న నూనెలో నెమ్మదిగా వేసుకోవాలి.
• అనంతరం వాటిని క్రిస్పీగా మారేంత వరకు ఫ్రై చేసుకోవాలి. ఆపై తీసి వేడివేడిగా సర్వ్ చేసుకుంటే చాలు. అంతే.. ఎంతో రుచికరంగా ఉండే "ఎగ్​ ఫ్రెంచ్ ఫ్రైస్" రెడీ!
• ఇక వీటిని టమటా సాస్​తో ముంచుకొని తింటుంటే ఆ టేస్ట్ చాలా చాలా బాగుంటుంది! మరి, నచ్చిందా అయితే మీరూ ఓసారి ఇలా ఎగ్ ఫ్రెంచ్ ఫ్రైస్​ని ట్రై చేయండి.

ఇవీ చదవండి :