Dalmoth Mixture Recipe in Telugu : ఎక్కువ మంది ఇష్టపడే స్నాక్ రెసిపీలలో ఒకటి మిక్చర్. అందులో భాగంగానే చాలా మంది స్వీట్ షాప్స్కి వెళ్లినప్పుడు దాల్మోత్ మిక్చర్ని టేస్ట్ చేస్తుంటారు. పిల్లలైతే ఈ మిక్చర్ని ఇంకా ఎంతో ఇష్టంగా తింటుంటారు. ఈ క్రమంలోనే కొందరు ఇంటికి పార్సిల్ తెస్తుంటారు. అలాకాకుండా మీరే చాలా ఈజీగా ఇంట్లోనే ఈ దాల్మోత్ ప్రిపేర్ చేసుకోండి. టేస్ట్ కూడా స్వీట్ షాపుల్లో లభించే దానికి ఏమాత్రం తీసిపోదు! మరి, ఈ రెసిపీ తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.
కావాల్సిన పదార్థాలు :
- ఎర్ర కందిపప్పు - 500 గ్రాములు
- వంటసోడా - 1 టీస్పూన్
- జీడిపప్పు పలుకులు - ముప్పావు కప్పు
- కరివేపాకు - పావు కప్పు
- కారం - రుచికి తగినంత
- ఉప్పు - రుచికి సరిపడా
- బ్లాక్ సాల్ట్ - అరటీస్పూన్
- చాట్ మసాలా - 1 టీస్పూన్
- ఆమ్చూర్ పౌడర్ - అరటీస్పూన్
- జీలకర్ర పొడి - అరటీస్పూన్
కారపూస కోసం :
- శనగపిండి - 1 కప్పు
- ఉప్పు - రుచికి సరిపడా
- పసుపు - అరటీస్పూన్
- నూనె - వేయించడానికి సరిపడా
తయారీ విధానం :
- ముందుగా పొట్టుతో ఉండే ఎర్ర కందిపప్పును(మసూర్ దాల్) తీసుకొని రెండు మూడుసార్లు శుభ్రంగా వాష్ చేసుకోవాలి. ఆపై అందులో తగినన్ని వాటర్ పోసి వంటసోడా వేసి కలిపి రాత్రంతా నానబెట్టుకోవాలి.
- నెక్ట్ డే రెసిపీ ప్రిపేర్ చేసుకోవడానికి ముందు మరోసారి నానబెట్టుకున్న పప్పును శుభ్రంగా కడుక్కోవాలి.
- ఆపై ఫ్యాన్ కింద ఒక పొడి క్లాత్ను ఉంచి దాని మీద పప్పును పల్చగా పరచి ఎలాంటి చెమ్మ లేకుండా బాగా ఆరబెట్టుకోవాలి. ఆపై పప్పును ఒక గిన్నెలోకి తీసుకొని పక్కన ఉంచుకోవాలి.
- ఇప్పుడు రెసిపీలోకి కావాల్సిన కారపూసను ప్రిపేర్ చేసుకోవాలి. ఇందుకోసం ఒక మిక్సింగ్ బౌల్ తీసుకొని అందులో శనగపిండి, ఉప్పు, పసుపు వేసుకొని తగినన్ని వాటర్ యాడ్ చేసుకుంటూ పిండిని కాస్త స్టిక్కీగా ఉండేలా కలుపుకోవాలి.
- ఆవిధంగా పిండిని ప్రిపేర్ చేసుకున్నాక అరటీస్పూన్ ఆయిల్ వేసి మరోసారి పిండిని మిక్స్ చేసుకోవాలి. ఆపై 10 నిమిషాల పాటు మూతపెట్టి పక్కన పెట్టేసుకోవాలి. ఇలా పిండిలో నూనె వేయడం వల్ల కారపూస గుల్లగా వస్తుంది.
- అనంతరం స్టౌపై కడాయి పెట్టుకొని నూనె పోసుకోవాలి. ఆయిల్ హీట్ అయ్యే లోపు మురుకుల గొట్టం తీసుకొని అందులో కారపూస చేసుకునే బిళ్లను సెట్ చేసుకోవాలి.
- ఆయిల్ బాగా వేడయ్యాక.. స్టౌను మీడియం ఫ్లేమ్లో ఉంచి కాగుతున్న నూనెలో జాగ్రత్తగా మురుకుల గొట్టంతో పిండిని కారపూసలా వత్తుకోవాలి. ఆపై కారపూస క్రిస్పీగా అయ్యేంత వరకు వేయించుకొని ఫ్లేట్లో తీసుకోవాలి. తర్వాత అది పూర్తిగా చల్లారాక చేతితో సన్నగా బ్రేక్ చేసుకొని పక్కన ఉంచుకోవాలి.
- ఇప్పుడు స్టౌపై కారపూస వేయించుకున్న ఆయిల్లోనే స్టెయినర్(జాలీ గంటె) పెట్టుకొని నానబెట్టి ఆరబెట్టుకున్న పప్పును కొద్దిగా వేసుకొని క్రిస్పీగా అయ్యేంత వరకు గరిటెతో కలుపుతూ వేయించుకోవాలి.
- తర్వాత దాన్ని ఒక టిష్యూ పేపర్ ఉన్న బౌల్లోకి తీసుకోవాలి. అలా పప్పు మొత్తాన్ని వేయించుకుని పక్కన పెట్టుకోవాలి.
- ఇప్పుడు అదే ఆయిల్లో స్టెయినర్ సహాయంతో జీడిపప్పు పలుకులను కూడా లో ఫ్లేమ్ మీద గోల్డెన్ కలర్ షేడ్ వచ్చేంత వరకు వేయించుకోవాలి. అలాగే కరివేపాకును వేయించుకోవాలి.
- అనంతరం ఒక మిక్సింగ్ బౌల్ తీసుకొని అందులో వేయించుకున్న పప్పు, కారం, ఉప్పు, బ్లాక్ సాల్ట్, చాట్ మసాలా, ఆమ్చూర్ పౌడర్, జీలకర్ర పొడి వేసుకొని అన్నీ కలిసేలా బాగా మిక్స్ చేసుకోవాలి.
- తర్వాత ఆ మిశ్రమంలో ఫ్రై చేసుకున్న కరివేపాకు, జీడిపప్పుతో పాటు ముందుగా తయారు చేసుకున్న కారపూస వేసుకొని మొత్తం కలిసేలా బాగా కలుపుకోవాలి. అంతే.. ఎంతో రుచికరంగా ఉండే స్వీట్ షాప్ స్టైల్ "దాల్మోత్ మిక్చర్" రెడీ!
- ఆపై ఈ మిక్చర్ను గాలి చొరబడని కంటైనర్లో స్టోర్ చేసుకుంటే దాదాపు 2 నెలల పాటు ఫ్రెష్గా తినేయొచ్చు!
ఇవీ చదవండి :
ఈవెనింగ్ టైమ్ బెస్ట్ స్నాక్ "ఎగ్ 65" - ఎటువంటి సాస్లు అవసరం లేదు - టేస్ట్ సూపర్!
