అమ్మమ్మల కాలం నాటి "చింతకాయ కొబ్బరి పచ్చడి" - నోట్లో నీళ్లు ఊరిపోవడం గ్యారెంటీ!

- వేడి వేడి అన్నంలో పుల్లపుల్లగా అద్దిరిపోతుంది - ఈ టిప్స్ పాటిస్తే నెక్స్ట్ లెవల్!

How to Make Chinthakaya Kobbari Pachadi: "చింతకాయ పచ్చడి.." తెలుగు వారికి పరిచయం అక్కర్లేని పేరు. వేడి వేడి అన్నంలో కొద్దిగా పచ్చడి, కమ్మని నెయ్యి వేసుకుని తింటే నిమిషాల్లో కంచాలు ఖాళీ కావాల్సిందే. పుల్లపుల్లగా, కారంగా ఉండే ఈ పచ్చడి రుచి అద్భుతం. అందుకే చాలా మంది సంవత్సరానికి సరిపడా నిల్వ పచ్చడి పెట్టుకుని ఎప్పుడు కావాలంటే అప్పుడు తింటుంటారు. అయితే, నిల్వపచ్చడి ఎంత టేస్టీగా ఉంటుందో, పచ్చి చింతకాయ పచ్చడి అంతకు మించి అన్నట్టుగా ఉంటుంది. పైగా దీన్ని ప్రిపేర్​ చేయడానికి ఎక్కువ టైమ్​ కూడా అక్కర్లేదు. చాలా ఈజీగా పనైపోతుంది. మరి, ఈ పచ్చడికి కావాల్సిన పదార్థాలు, తయారీ విధానమేంటో ఈ స్టోరీలో తెలుసుకుందాం.

కావాల్సిన పదార్థాలు:

• లేత చింతకాయలు - 200 గ్రాములు
• కొబ్బరి ముక్కలు - 1 కప్పు
• పచ్చిమిర్చి - 6
• జీలకర్ర - అర టీ స్పూన్​
• ఉప్పు - రుచికి సరిపడా
• పసుపు - పావు టీ స్పూన్​

తాలింపు కోసం:

• నూనె -2 టేబుల్​ స్పూన్లు
• ఆవాలు - అర టీ స్పూన్​
• జీలకర్ర - అర టీ స్పూన్​
• శనగపప్పు - 1 టీ స్పూన్​
• మినపప్పు - 1 టీ స్పూన్​
• దంచిన వెల్లుల్లి రెబ్బలు - 4
• ఎండు మిర్చి - 3
• కరివేపాకు - 2 రెమ్మలు

తయారీ విధానం:

• లేత చింతకాయలను కొద్దిసేపు నీటిలో నానబెట్టి శుభ్రంగా కడగాలి. ఆ తర్వాత వాటిని చిన్న చిన్న ముక్కలుగా కట్​ చేసి పక్కన పెట్టాలి.
• ఒకవేళ మీరు ముదురు చింతకాయలు తీసుకుంటే వాటిని నీటిలో కాసేపు నానబెట్టి శుభ్రంగా కడిగి పీచు, పైపొట్టు తీయాలి.
• అలాగే లోపల ఉన్న గింజలు కూడా తీసి ముక్కలుగా కట్​ చేసుకోవాలి.
• మిక్సీజార్​లో చింతకాయ ముక్కలు, కొబ్బరి ముక్కలు, పచ్చిమిర్చి, జీలకర్ర, ఉప్పు వేసి కచ్చాపచ్చగా గ్రైండ్​ చేసుకోవాలి. చివరగా పసుపు వేసి మరోసారి కచ్చాపచ్చాగా గ్రైండ్​ చేసుకోవాలి. ఈ మిశ్రమాన్ని రోట్లో రుబ్బుకుంటే టేస్ట్​ మరింత బాగుంటుంది.
• తాలింపు కోసం స్టవ్​ ఆన్​ చేసి పాన్​ పెట్టి నూనె పోసి వేడి చేసుకోవాలి. నూనె వేడెక్కిన తర్వాత ఆవాలు, జీలకర్ర, పచ్చిశనగపప్పు, మినపప్పు వేసి దోరగా వేయించుకోవాలి.
• ఆ తర్వాత దంచిన వెల్లుల్లి రెబ్బలు, ఎండు మిర్చి, కరివేపాకు వేసి మరో రెండు నిమిషాలు ఫ్రై చేసి స్టవ్​ ఆఫ్​ చేయాలి.
• ఈ తాలింపును చింతకాయ మిశ్రమంలో కలిపితే సరి. ఎంతో టేస్టీగా ఉండే చింతకాయ కొబ్బరి పచ్చడి. నచ్చితే మీరూ ట్రై చేయండి.