What Seeds that are Beneficial to Health: మనం ఆరోగ్యంగా ఉండాలంటే పౌష్టికాహారంతో పాటు కొన్ని రకాల గింజలను తీసుకోవడం చాలా ముఖ్యం. ఎందుకంటే వీటిలో మన శరీరానికి అవసరమైన విటమిన్లు, ఖనిజాలు, ఫైబర్ వంటివి పుష్కలంగా లభిస్తాయి. అయితే, ఆరోగ్యంగా ఉండడానికి ఏ గింజలు తీసుకోవాలి ? వాటి వల్ల కలిగే ప్రయోజనాలు ఏంటీ ? అనే విషయాలను ప్రముఖ డైటీషియన్ 'డాక్టర్ శ్రీలత' చెబుతున్నారు. ఆ వివరాలు మీ కోసం..!
చియా సీడ్స్ : సీడ్స్లో మన శరీరానికి అత్యంత అవసరమైన పీచు పదార్థం అధికంగా ఉంటుంది. చియా గింజలలో కూడా పీచు ఎక్కువగా లభిస్తుంది. అలాగే ఇందులో ఆరోగ్యకరమైన కొవ్వులు, ఒమేగా -3 ఫ్యాటీ యాసిడ్స్, నాణ్యమైన ప్రొటీన్, అనేక రకాల ఖనిజాలు, శక్తివంతమైన యాంటీ ఆక్సిడెంట్లు ఉంటాయి. సుమారు 2 టేబుల్ స్పూన్ల చియా గింజల ద్వారా 10 గ్రాముల పీచుని పొందవచ్చని నిపుణులు చెబుతున్నారు. ఈ విత్తనాలను పండ్ల రసాలలో లేదా బాదం పాలలో నానబెడితే మృదువుగా మారతాయి. ఆ తర్వాత వాటిని తాగడం ద్వారా ఆరోగ్య ప్రయోజనాలను పొందవచ్చంటున్నారు.
గుమ్మడి గింజలు : ఈ గింజలలో మన హెల్త్కు మేలు చేసే ఎన్నో పోషకాలున్నాయి. ముఖ్యంగా ఇందులో గుండె ఆరోగ్యంగా ఉండడానికి అవసరమయ్యే మెగ్నీషియం అధికంగా ఉంటుంది. ఇది కండరాలకు మేలు చేస్తుంది. గుమ్మడి గింజలను సూప్లు, సలాడ్లలో కలిపి తీసుకోవచ్చని సూచిస్తున్నారు.
దానిమ్మ గింజలు : మన శరీరానికి అవసరమయ్యే విటమిన్ సి దానిమ్మ గింజల్లో ఎక్కువగా లభిస్తుంది. ఇంకా మన కణాలకు మేలు చేసే యాంటీ ఆక్సిడెంట్లు ఇందులో అధికంగా ఉంటాయి. కాబట్టి వీటిని ప్రతిరోజూ తీసుకోవడం మంచిదన చెబుతున్నారు.
క్వినోవా : మన ఆరోగ్యానికి మేలు చేసే గింజల్లో క్వినోవా కూడా ఒకటి. ధాన్యంలా కనిపించే వీటిలో ప్రొటీన్లు అధికంగా ఉంటాయి. సుమారు కప్పు క్వినోవా తీసుకోవడం ద్వారా 8 గ్రాముల ప్రొటీన్ పొందవచ్చు. వీటిని అన్నంలాగానే వండాలి. ఉదయాన్నే క్వినోవా తినడం వల్ల పీచు పదార్థం, ప్రొటీన్, ఇనుము పొందవచ్చని చెబుతున్నారు
అవిసె గింజలు : వీటిలో పీచు పదార్థం, ప్రొటీన్లు, ఒమేగా- 3 కొవ్వు ఆమ్లాలు పుష్కలంగా లభిస్తాయి. రక్తపోటుతో బాధపడేవారు రోజూ వీటిని తీసుకోవడం వల్ల బ్లడ్ ప్రెషర్ నియంత్రణలో ఉంచుకోవచ్చని చెబుతున్నారు. దాదాపు 2 టేబుల్ స్పూన్ల అవిసె గింజల్లో 7 గ్రాముల ప్రొటీన్ ఉంటుందని వివరిస్తున్నారు.
"పుచ్చకాయ, గుమ్మడికాయ, మస్క్ మిలన్ వంటి గింజలు ఆరోగ్యానికి ఎంతో మంచివి. వీటిని ఏదోక రూపంలో డైలీ తినడం ద్వారా హెల్దీగా ఉండవచ్చు. టీస్పూన్ నెయ్యి వేసి వీటిని ఫ్రై చేసి పిల్లలకు స్నాక్లాగా ఇవ్వొచ్చు. వివిధ రకాల గింజలన్నింటినీ కలిపి లడ్డూలు చేసి ఇస్తే ఆరోగ్యానికి ఎంతో మంచిది." -డాక్టర్ శ్రీలత (డైటీషియన్)
పొద్దు తిరుగుడు విత్తనాలు : సన్ఫ్లవర్ సీడ్స్లో విటమిన్ ఎ, ఆరోగ్యకరమైన కొవ్వులు అధికంగా ఉంటాయి. ఇవి ఆరోగ్యానికి ఎంతో మేలు చేస్తాయని అంటున్నారు.
నువ్వులు : నువ్వులలో ఫైబర్, క్యాల్షియం, ఐరన్ శాతం అధికంగా ఉంటుంది. దీనిని పొడిలా చేసుకుని కూరలు, చట్నీల రూపంలో తినడం ద్వారా పోషకాలు సరిగ్గా అందుతాయి. నువ్వులను ఆహారంలో భాగం చేసుకోవడం ద్వారా బరువు తగ్గొచ్చని డాక్టర్ శ్రీలత చెబుతున్నారు. మలబద్ధకం సమస్యతో బాధపడేవారు వీటిని తీసుకోవడం ద్వారా మంచి ఫలితం ఉంటుంది. ఎదిగే పిల్లలకు నువ్వులతో లడ్డూలు, చిక్కీలు చేసి ఇస్తే చాలా మంచిదని డాక్టర్ శ్రీలత సూచిస్తున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
ఇవి కూడా చదవండి :
ప్రొటీన్ కావాలంటే గుడ్డు, చికెన్ తినాల్సిన పని లేదు - డైలీ ఈ గింజలు కొన్ని తిన్నా చాలు!
