Alsi Pinni Recipe in Telugu : కొన్ని రెసిపీల పేర్లు భలే తమాషాగా ఉంటాయి. ఇప్పుడు మనం చెప్పుకోబోయే "అలసీ పిన్నీ" మిఠాయి రెసిపీ కూడా అదే కోవకు చెందుతుంది. ఇక్కడ పిన్నీ లేదు, అలసిపోయే ప్రసక్తీ లేదు. ఇది హరియాణా వారి స్పెషల్ స్వీట్ రెసిపీ. ఈ స్వీట్ మరో పేరు.. "అవిసె గింజల లడ్డూ". మీరు ఇప్పటివరకు ఎన్నో రకాల తీపి వంటకాలు ట్రై చేసి ఉంటారు.
కానీ, ఓసారి ఈ స్పెషల్ స్వీట్ను ట్రై చేయండి. పైగా ఈ లడ్డూలో పోషకాలు అధికం. చెడు కొలెస్ట్రాల్ను నియంత్రిస్తాయి. బరువు పెరుగుతారన్న బాధ ఉండదు. ఆరోగ్యానికి అవిసె గింజలు మంచివని ఆహార నిపుణులు నేపథ్యంలో.. ఓసారి "అలసీ పిన్నీ లడ్డూ" ప్రిపేర్ చేసుకుని తింటే బాగుంటుంది కదా! మరి, ఇంకెందుకు ఆలస్యం ఈ రెసిపీ తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.
కావాల్సిన పదార్థాలు :
- అవిసె గింజలు - అర కిలో
- గోధుమపిండి - ముప్పావు కిలో
- వెన్న - అర కిలో
- బెల్లం - ముప్పావు కిలో
- శనగలు - 200 గ్రాములు
- పల్లీలు - 2 టేబుల్స్పూన్లు
- వాల్నట్స్ - 2 టేబుల్స్పూన్లు
- ఖర్జూరాలు - పావు కప్పు
- కిస్మిస్ - 2 టేబుల్స్పూన్లు
- గుమ్మడి గింజలు - రెండు టేబుల్స్పూన్లు
- నువ్వులు - రెండు టేబుల్స్పూన్లు
- పిస్తా - 2 టేబుల్స్పూన్లు
- బాదం - 2 టేబుల్స్పూన్లు
- జీడిపప్పు పలుకులు - 2 టేబుల్స్పూన్లు
తయారీ విధానం :
- ఇందుకోసం ముందుగా స్టౌపై కడాయి పెట్టుకొని లో ఫ్లేమ్ మీద అవిసె గింజలను డ్రైగా వేయించుకొని పక్కన పెట్టుకోవాలి.
- ఇప్పుడు అదే కడాయిలో పల్లీలు, శనగలు, నువ్వులు, గుమ్మడిగింజలు, డ్రైఫ్రూట్స్ను కూడా దోరగా వేయించుకోవాలి.
- అనంతరం మిక్సీ జార్ తీసుకొని అందులో ముందుగా అవిసెగింజలను తీసుకొని పొడిలా గ్రైండ్ చేసుకొని ఒక బౌల్లోకి తీసుకొని పక్కన ఉంచుకోవాలి.
- ఆ తర్వాత అదే మిక్సీ జార్లో వేయించి పెట్టుకున్న పల్లీలు, శనగలు, నువ్వులు, గుమ్మడిగింజలు, డ్రైఫ్రూట్స్ మిశ్రమాన్ని మెత్తని పౌడర్లా గ్రైండ్ చేసుకొని పెట్టుకోవాలి.
- ఇప్పుడు స్టౌపై మళ్లీ అదే కడాయి పెట్టుకొని వెన్నను వేసి వేడి చేసుకోవాలి. అది కరిగి కాస్త వేడయ్యాక అందులో గోధుమపిండిని వేసుకొని కలుపుతూ కాసేపు వేయించుకోవాలి.
- ఆవిధంగా వేయించుకున్నాక అదే మిశ్రమంలో ముందుగా మిక్సీ పట్టుకున్న అవిసె గింజల పొడి, డ్రైఫ్రూట్స్ పౌడర్ వేసి కలియ తిప్పుతూ ఇంకాస్త వేగనివ్వాలి. ఇలా వేయించుకునేటప్పుడు మంట వీలైనంత తక్కువగానే ఉండేలా చూసుకోవాలి.
- ఇంకో బర్నర్ మీద మరో పాత్ర పెట్టుకొని కప్పు నీళ్లు, బెల్లం వేసి మరిగించాలి. బెల్లం పూర్తిగా కరిగి పాకంలా మారాక స్టౌ ఆఫ్ చేసుకొని ఈ సిరప్ను అవిసె గింజల మిశ్రమంలో మెల్లగా పోస్తూ.. ఉండలు కట్టకుండా కలుపుకోవాలి.
- అలా మిక్స్ చేసుకుంటున్నప్పుడే అందులో కిస్మిస్, ఖర్జూర పండు ముక్కలు కూడా వేసి మిశ్రమం మొత్తం కలిసేలా కలియతిప్పుకోవాలి.
- ఎప్పుడైతే మిశ్రమం మొత్తం కలిసిపోయి, దగ్గరగా అయ్యిందనిపిస్తే స్టౌ ఆఫ్ చేసుకొని కడాయిని దించేయాలి.
- ఇక ఈ మిశ్రమం గోరువెచ్చగా ఉండగానే లడ్డూలు చుట్టుకొని సర్వ్ చేసుకుంటే చాలు. అంతే.. ఎంతో టేస్టీగా ఉండే "అలసీ పిన్నీ లడ్డూలు" రెడీ!
ఇవీ చదవండి :
ఇంట్లో పాలు, పంచదార ఉంటే చాలు- ఎంతో రుచికరమైన "పాలకోవా" ఈజీగా చేసుకోవచ్చు!
గోధుమ పిండితో బాదుషా! - రుచి, ఆరోగ్యం ఒకేసారి - ఈ పండక్కి ఇలా తయారు చేయండి!
