Biden Greets Trump : అమెరికా అధ్యక్షుడు జో బైడెన్, త్వరలో అధ్యక్ష పదవిని అలకరించనున్న డొనాల్డ్ ట్రంప్ ఇద్దరూ పరస్పరం కరచాలనం చేసుకున్నారు. ఓవల్ ఆఫస్లో జరిగిన భేటీలో, అధికార మార్పిడి సజావుగా సాగేందుకు కృషి చేస్తామని ఇరువురు నేతలు ప్రతిజ్ఞ చేశారు.
అభినందనలు
అమెరికా అధ్యక్ష ఎన్నికల్లో ఘన విజయం సాధించిన డొనాల్డ్ ట్రంప్నకు బైడెన్ స్వయంగా అభినందనలు తెలిపారు. ఈ సందర్భంగా ట్రంప్ మాట్లాడుతూ, "రాజకీయాలు చాలా కఠినమైనవి. వాస్తవానికి ఈ లోకం ఎల్లప్పుడూ ఒకేలా మంచిగా ఉండదు. కానీ నేడు ఈ ప్రపంచం చాలా బాగుంది" అని అన్నారు.
ఓవల్ ఆఫీస్లో ప్రస్తుత అధ్యక్షుడు బైడెన్తో బుధవారం ఉదయం 11 గంటలకు ట్రంప్ భేటీ కావాల్సి ఉంది. కానీ ఆయన కాస్త ఆలస్యంగా రావడం గమనార్హం.
సంప్రదాయం
అమెరికాలో ప్రెసిడెన్సియల్ ఎలక్షన్స్ పూర్తయిన తరువాత ప్రస్తుత అధ్యక్షుడు, త్వరలో ప్రమాణం చేయనున్న అధ్యక్షుడికి ఆతిథ్యం ఇవ్వడం సంప్రదాయంగా వస్తోంది. అందులో భాగంగానే జో బైడెన్, ట్రంప్నకు ఓవల్ ఆఫీస్లో ఆతిథ్యం ఇచ్చారు. అయితే 2020లో జరిగిన అధ్యక్ష ఎన్నికల్లో రిపబ్లికన్ పార్టీ తరఫున పోటీ చేసి ఓడిపోయిన ట్రంప్, అప్పుడు గెలుపొందిన డెమొక్రాట్ పార్టీ అభ్యర్థి అయిన జో బైడెన్కు అతిథ్యం ఇవ్వకపోవడం గమనార్హం.
