విటమిన్ సప్లిమెంట్లు ఎవరైనా తీసుకోవచ్చా? ఈ మాత్రలు సురక్షితమేనా?

-మీరు తరచూగా విటమిన్ మాత్రలు తీసుకుంటున్నారా? -విటమిన్ సప్లిమెంట్లు ఎవరెవరు వేసుకోవాలో తెలుసా?

Who Should Take Vitamin Supplements: విటమిన్ల లోపంతో జబ్బులు వస్తున్నాయని కొందరు.. బలం వస్తుందనే భావనతో మరికొందరు వైద్యుల సూచనలు లేకుండానే విటమిన్‌ మాత్రలు వేసేసుకుంటుంటారు. విటమిన్‌ ఎ నుంచి జింకు వరకు అన్ని రకాల సప్లిమెంట్లను మింగుతుంటారు. అయితే, ఆరోగ్యంగా ఉండి, రకరకాల ఆహార పదార్థాలు తినేవారికి వీటిని తీసుకోవడం వల్ల ఎలాంటి ప్రయోజనం ఉండదని నిపుణులు అంటున్నారు. కేవలం కొందరికి మాత్రమే ఈ విటమిన్ల ఉపయోగం ఉంటుందని వివరిస్తున్నారు. మరి ఈ నేపథ్యంలోనే విటమిన్ సప్లిమెంట్ల అవసరం ఎవరికి ఉంటుందో ఇప్పుడు తెలుసుకుందాం.

గర్భిణీల్లో ఫోలిక్ యాసిడ్ లోపం ఉంటుందని.. అలాంటి వారు ఈ మాత్రలు వేసుకోవాలని ప్రముఖ పోషకాహార నిపుణులు డాక్టర్ శ్రీలత చెబుతున్నారు. గర్భం ధరించిన తొలిరోజుల్లో ఫోలిక్‌ యాసిడ్‌ను తీసుకుంటే పిండంలో నాడీలోపాలు ఏర్పడకుండా చూసుకోవచ్చని వివరిస్తున్నారు. ఇంకా గర్భధారణకు ప్రయత్నిస్తున్నవారు కూడా రోజూ ఫోలిక్‌ యాసిడ్‌తో కూడిన మాత్రలు వేసుకోవటం మంచిదని సూచిస్తున్నారు.

వయసు పెరుగుతున్న కొద్దీ ఆహారాన్ని నమలటంలో, మింగలో వృద్ధుల్లో ఇబ్బంది తలెత్తుతాయి. కొందరు అయితే, మొత్తంగా ఆహారమే సరిగా తీసుకోకపోతుంటారు. ఫలితంగా పోషకాహార లోపానికి దారితీస్తుందని నిపుణులు అంటున్నారు. అలాంటి వారికి విటమిన్ల సప్లిమెంట్లు మేలు చేస్తాయని వివరిస్తున్నారు.

అల్సరేటివ్‌ కొలైటిస్‌, సీలియాక్‌ డిసీజ్‌, సిస్టిక్‌ ఫైబ్రోసిస్‌ వంటి సమస్యలు జీర్ణక్రియను అస్తవ్యస్తం చేసి.. పోషణ లోపానికి దారితీస్తాయని చెబుతున్నారు. ఇంకా బరువు తగ్గటానికి చేసే బైపాస్‌ సర్జరీల వంటివీ కూడా దీనికి కారణం అవుతాయని వివరిస్తున్నారు. అలాంటి వారికి విటమిన్‌ మాత్రలు అవసరం అవుతాయని సూచిస్తున్నారు.

ఇంకా కొన్ని రకాల మాత్రల వల్ల శరీరంలో మెగ్నీషియం, పొటాషియం, క్యాల్షియం మోతాదులు తగ్గుతాయని.. ఇలాంటివారికి ఆయా పోషకాలు భర్తీ చేయడానికి విటమిన్‌ మాత్రలు ఇస్తారని తెలిపారు. ముఖ్యంగా యాంటీ బయాటిక్స్ ఇచ్చినప్పుడు శరీరంలోని విటమిన్లు బయటకు వెళ్లిపోతాయని అంటున్నారు. ఆ సమయంలోనే వాటిని భర్తీ చేయడానికే బీ కాంప్లెక్స్ విటమిన్లు ఇస్తుంటారని వివరిస్తున్నారు. ఇంకా జ్వరం, ఇన్‌ఫెక్షన్ల వంటి జబ్బుల నుంచి కోలుకుంటున్నవారికీ మాత్రలు అవసరం పడతాయని చెబుతున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.