Thyroid Symptoms : ప్రస్తుత కాలంలో మారిన జీవన శైలి, ఆహారపు అలవాట్లు, శారీరక శ్రమకు దూరంగా ఉండడం వంటి వివిధ కారణాల వల్ల ఎన్నో రకాల అనారోగ్య సమస్యలు మనల్ని చుట్టుముడుతున్నాయి. ముఖ్యంగా మహిళలను థైరాయిడ్ సమస్య ఎక్కువగా ఇబ్బంది పెడుతోంది. ఈ ఒక్క సమస్య వల్ల మహిళల్లో పలు రకాల ఇబ్బందులు వస్తాయని ప్రముఖ డయాబెటాలజిస్ట్ 'డాక్టర్ పి.వి. రావు' చెబుతున్నారు. థైరాయిడ్ వల్ల వచ్చే హెల్త్ ప్రాబ్లమ్స్ ఏంటో ఇప్పుడు చూద్దాం..
మన బాడీలో ఎన్నో అవయవాలు, విభాగాలుంటాయి. వీటిలో థైరాయిడ్ వ్యవస్థ అత్యంత కీలకంగా పని చేస్తుంది. మన జీవక్రియల్ని క్రమబద్ధం చేసే.. అతి ముఖ్యమైన పనిని థైరాయిడ్ వ్యవస్థే నిర్వహిస్తుంది. సీతాకోక చిలుక ఆకారంలో ఉండే థైరాయిడ్ గ్రంథి.. శరీర అవసరాలను బట్టి, నిరంతరం హార్మోన్లను స్రవిస్తూ జీవక్రియల్ని సక్రమంగా జరిగేలా చూస్తుంది. అయితే, థైరాయిడ్ గ్రంథి విడుదల చేసే థైరాక్సిన్ హార్మోన్ ఎక్కువైనా, తక్కువైనా కూడా పలు రకాల అనారోగ్య సమస్యలు వస్తాయంటున్నారు.
థైరాయిడ్ ద్వారా వచ్చే ఇబ్బందులను రెండు రకాలుగా విభజించవచ్చంటున్నారు నిపుణులు. అవసరమైన దాని కంటే.. థైరాయిడ్ హార్మోన్ అధికంగా ఉత్పత్తి అవుతుంటే.. అలాంటి పరిస్థితిని హైపర్ థైరాయిడిజమని (Hyperthyroidism), నార్మల్ స్థాయి కంటే తక్కువగా థైరాయిడ్ హార్మోన్ ఉన్నప్పుడు హైపో థైరాయిడిజమని (Hypothyroidism) అంటారని డాక్టర్ వివరిస్తున్నారు.
హైపో థైరాయిడ్ లక్షణాలు :
- సాధారణంగా థైరాయిడ్తో బాధపడేవారిలో తీవ్రమైన అలసట వేధిస్తుంది.
- థైరాయిడ్ హార్మోన్స్ తగ్గితే బరువు పెరుగుతారు.
- జుట్టు అధికంగా రాలిపోతుంది.
- ఎక్కువగా చెమట పడుతుంది.
- థైరాయిడ్తో బాధపడేవారిలో బయటకు కనిపించే లక్షణాలలో మెడ ఉబ్బడం ఒకటి. థైరాయిడ్ గ్రంథి మార్పుల వల్ల ఇలా మెడ వాపు వస్తుంది.
- థైరాయిడ్ సమస్య తలెత్తినప్పుడు మన శరీర ఉష్ణోగ్రతలో మార్పు వస్తుంది. ఒక్కసారిగా పెరగడమో, తగ్గడమో జరుగుతుంది. వాతావరణం సరిగానే ఉన్నా.. ఎక్కువ చలిగానో లేదా ఎక్కువ వేడిగానో అనిపిస్తుంది.
- స్కిన్ పొడిబారుతుంది.
- గోర్లు కూడా పెలుసుగా మారతాయి.
- తరచూ కాళ్లు, చేతులు తిమ్మిర్లు వస్తాయి.
- చేతులు జలదరింపులు వస్తాయి.
- మలబద్ధకం
- అసాధారణ రుతుస్రావం
హైపర్ థైరాయిడ్ లక్షణాలు :
- శరీరంలో థైరాయిడ్ హార్మోన్స్ పెరిగితే.. ఒక్కసారిగా శరీర బరువు తగ్గుతుంది.
- కండరాలు బలహీనంగా మారతాయి. చేతులు వనుకుతాయి.
- కంటి సమస్యలు
- విరేచనాల బాధ
- మహిళల్లో థైరాయిడ్ వ్యాధి.. రుతుచక్రాన్ని ప్రభావితం చేస్తుంది. దీనివల్ల క్రమరహిత రుతుచక్రం ఇబ్బంది పెడుతుంది.
- హైపోథైరాయిడ్ కారణంగా ఫ్యాట్స్ అధికంగా పెరిగి హార్ట్స్ట్రోక్ వచ్చే ప్రమాదం ఉంటుందట.
- కొన్ని సందర్భాల్లో తక్కువ హార్మోన్ల కారణంగా స్పృహ తప్పే అవకాశం ఉంటుంది.
- హైపర్ థైరాయిడ్ సమస్యతో బాధపడేవారు.. నిర్లక్ష్యంగా వ్యవహరిస్తే హార్ట్ ప్రాబ్లమ్స్ వస్తాయి. అందుకే ఈ సమస్య ఉన్నవారు డాక్టర్లను కలిసి.. వారు సూచించిన మందులను రోజూ వాడుకోవాలని డాక్టర్ పి.వి రావు చెబుతున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
ఇవి కూడా చదవండి :
పిల్లల్లో థైరాయిడ్-గుర్తించకపోతే పెను శాపం
చలికాలంలో ఏసీ వాడుతున్నారా? ఆస్థమా, ఇన్ఫెక్షన్లతో జాగ్రత్త! ఈ చిట్కాలు పాటిస్తే సరి!!
