ఇది ఒక్క స్పూన్​ తీసుకుంటే - అజీర్తి సమస్య తీవ్రత తగ్గుతుందట!- ఎలా చేయాలో తెలుసా? - Indigestion Treatment as Ayurveda

Indigestion Treatment: అజీర్తి సమస్య మనలో చాలా మందిని వేధిస్తుంటుంది. దీంతో కొందరు బయట లభించే మందులను వినియోగిస్తుంటారు. అయితే, ఆయుర్వేద పద్ధతిలో తయారు చేసే ఈ ఔషధాన్ని తీసుకోవడం వల్ల మంచి ఫలితం ఉంటుందని చెబుతున్నారు నిపుణులు. అదేలాగో ఈ స్టోరీలో తెలుసుకుందాం.

Ayurvedic Home Remedy to Reduce Indigestion: కడుపులో ఏ చిన్న సమస్య వచ్చినా చాలా ఇబ్బందికరంగా ఉంటుంది. ముఖ్యంగా అజీర్తి సమస్య అయితే చెప్పలేనంత బాధ పెడుతుంది. తిన్నది అరగకపోవడం.. కడుపంతా ఉబ్బరంగా ఉండడం వల్ల పొట్టంతా రాయిలా మారుతుంది. ఫలితంగా ఎటు కదలలేక.. ఏ పనీ చేయలేకపోతుంటాం. అయితే, ఈ సమస్యకు ఆయుర్వేదంలో పరిష్కార మార్గం ఉందని చెబుతున్నారు ప్రముఖ ఆయుర్వేద ఫిజిషియన్‌ గాయత్రీ దేవీ. పథ్యాహారం తీసుకోవడం వల్ల అజీర్తి సమస్య నుంచి బయటపడవచ్చని వివరిస్తున్నారు. ఈ నేపథ్యంలోనే ఆ ఔషధానికి కావాల్సిన పదార్థాలు, తయారీ విధానం ఏంటో ఇప్పుడు తెలుసుకుందాం.

పథ్యాహారానికి కావాల్సిన పదార్థాలు

• 250 గ్రాముల అల్లం పేస్ట్​
• 275 గ్రాముల పటిక బెల్లం పొడి
• 5 గ్రాముల శొంఠి పొడి
• 10 గ్రాముల పిప్పళ్ల పొడి
• 10 గ్రాముల మిరియాల పొడి
• 5 గ్రాముల యాలకుల పొడి
• తేనె

తయారీ విధానం

• ముందుగా స్టౌ వెలిగించుకుని ఓ గిన్నెలో అల్లం పేస్ట్​ను వేసి కాసేపు వేగనివ్వాలి
• ఆ తర్వాత పటిక బెల్లం పొడిని వేసి లో ఫ్లేమ్​లో కలపాలి.
• అనంతరం ఇందులోనే శొంఠి పొడి, మిరియాలు, యాలకులు, పిప్పళ్ల పొడిని కలపాలి.
• ఈ పొడులన్నీ బాగా కలిశాక స్టౌ ఆఫ్​ చేసి ఈ మిశ్రమాన్ని పక్కకు పెట్టుకొని తేనె కలుపుకోవాలి.
• అజీర్తి సమస్య ఉన్నవాళ్లతో పాటు రాకుండా ఉండేవారు కూడా ఈ ఔషధాన్ని తీసుకోవచ్చని ఆయుర్వేద నిపుణులు చెబుతున్నారు.
• ఆహారం తీసుకునే 10 నిమిషాల ముందు ఓ చెంచాడు పరిమాణంలో ఉదయం, సాయంత్రం తీసుకోవడం వల్ల అజీర్తి సమస్య నుంచి బయటపడవచ్చని సూచిస్తున్నారు.

శొంఠి: సాధారణంగానే మనకు అజీర్తిగా ఉన్నప్పుడు శొంఠి తినాలని మన పెద్దలు చెబుతుంటారు. ఎందుకంటే శొంఠి జీర్ణశక్తిని మెరుగుపరిచి అజీర్తి సమస్యను తగ్గిస్తుందని ఆయుర్వేద నిపుణులు చెబుతున్నారు.

పిప్పళ్లు: పిప్పళ్లలో జీర్ణశక్తిని మెరుగుపరిచే గుణాలు ఉన్నాయని ఆయుర్వేద నిపుణులు చెబుతున్నారు. ఫలితంగా అజీర్తి సమస్య తగ్గిపోతుందని వివరిస్తున్నారు

మిరియాలు: మిరియాలను అనేక ఆరోగ్య సమస్యలకు ఔషధంగా వాడుతుంటారు. ఇన్​ఫెక్షన్లు తగ్గడానికి, శరీరంలోని మలినాలు బయటకు వెళ్లడానికి వీటిని వాడతారు. ఇందులో అజీర్తి సమస్యను తగ్గించే గుణాలు ఉన్నాయని చెబుతున్నారు.

యాలకులు: సుగంధ ద్రవ్యమైన యాలకులు అజీర్తి సమస్యను పరిష్కరించడంలో మంచిగా సహాయ పడుతుందని ఆయుర్వేద నిపుణుు చెబుతున్నారు.

NOTE: ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.