మీ పాదాలు పగిలిపోయాయా? రాత్రి ఇది పెట్టుకుంటే పగుళ్లు మాయం!

-పాదాల పగుళ్ల సమస్యకు ఆయుర్వేదంలో చక్కని పరిష్కారం -ఈ ఔషధం ఎలా తయారు చేసుకోవాలి? కావాల్సిన పదార్థాలేంటి?

Cracked Heels Treatment at Home: మనలో చాలా మందిలో పాదాలు పగుళ్లు సమస్య కనిపిస్తుంటుంది. ముఖ్యంగా నడిచేటప్పుడు ఈ సమస్య చాలా ఇబ్బందులకు గురిచేస్తోంది. ఇలా బాధించడమే కాకుండా.. చూడ్డానికీ బాగోవు. దీంతో పగుళ్ల సమస్య పరిష్కారం కోసం అనేక రకాల ప్రయత్నాలు చేస్తుంటారు. వివిధ రకాలైన క్రీములు, మందులు వాడుతుంటారు. అయితే, ఈ సమస్యకు ఆయర్వేదంలో చక్కని పరిష్కార మార్గం ఉందని ప్రముఖ వైద్యురాలు గాయత్రీ దేవీ చెబుతున్నారు. మరి ఈ ఔషధం తయారీకి కావాల్సిన పదార్థాలు ఏంటి? తయారీ విధానం ఎలాగో ఇప్పుడు తెలుసుకుందాం.

కావాల్సిన పదార్థాలు

• 50 గ్రాముల సుగంధి పాల చూర్ణం
• 50 గ్రాముల మంజిష్ట చూర్ణం
• 50 గ్రాముల నువ్వుల నూనె
• 50 గ్రాముల తెల్ల గుగ్గిలం

తయారీ విధానం

• ముందుగా స్టౌ ఆన్ చేసి ఓ గిన్నెలో నీరు పోసి వేడి చేసుకోవాలి.
• నీళ్లు వేడయ్యాక సుగంధిపాలు, మంజిష్ట చూర్ణాన్ని ఇందులో వేసి కలిపి సన్నటి మంటపై మరగనిచ్చి ఆ తర్వాత జల్లిగంటెతో వడకట్టుకోవాలి.
• ఇప్పుడు మరో గిన్నెను వేడి చేసుకుని అందులో వడపోసుకున్న కషాయాన్ని పోయాలి.
• దీనిలోనే నువ్వుల నూనె పోసుకుని సన్నని మంటపై మరిగించుకోవాలి.
• నీరంతా ఆవిరై నూనె మిగిలిన తర్వాత తెల్ల గుగ్గిలం పొడిని అందులో కలపాలి.
• ఇలా సుమారు 5 నిమిషాలు మరిగించుకున్న తర్వాత స్టౌ ఆఫ్ చేసి పక్కకు పెట్టుకుంటే ఔషధం రెడీ
• ఈ ఔషధాన్ని రాత్రి పూట పాదాలకు ఎక్కువ పరిమాణంలో రాసి రాత్రి మొత్తం ఉంచుకోవాలని గాయత్రీ దేవీ తెలిపారు. ఆ తర్వాత మరుసటి రోజు ఉదయం వేడి నీటిలో పోసుకుని అందులో రాళ్ల ఉప్పు వేసి పాదాలను పెట్టి క్లీన్ చేసుకోవాలని చెబుతున్నారు. ఇలా రోజుకు ఒకసారి చేయడం వల్ల పాదాల పగుళ్లను సులభంగా తగ్గించుకోవచ్చని అంటున్నారు.

సుగంధి పాల: ఇది పాదాల పగుళ్లను తగ్గించడానికి చాలా చక్కగా ఉపయోగపడుతుందని గాయత్రీ దేవీ చెబుతున్నారు. మృత కణాలు పోయి కొత్త కణాలు రావడానికి సాయం చేస్తుందని వివరించారు. చాలా ఔషధాల తయారీలో దీనిని వాడుతామని తెలిపారు.

మంజిష్ట: పాదాల పగుళ్ల సమస్యను తగ్గించడానికి మంజిష్ట సాయం చేస్తుందని వివరించారు. ఇది చర్మానికి మంచి టానిక్​లాగా ఉపయోగపడతాయని వివరించారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.