SSMB 29 Heroine : సూపర్ స్టార్ మహేశ్ బాబు- దర్శకధీరుడు రాజమౌళి కాంబోలో అత్యంత ప్రతిష్ఠాత్మకంగా తెరకెక్కనున్న ప్రాజెక్ట్ 'SSMB 29'. ఈ సినిమా కోసం యావత్ దేశమంతా ఎదురుచూస్తోంది. ఇటీవల రాజమౌళి ఆఫ్రికా ట్రిప్ నుంచి పలు ఫొటోలు షేర్ చేసి, సినిమాపై హైప్ పెంచేశారు. అలా సినిమా నుంచి ఏ అప్డేట్ వచ్చినా అది క్షణాల్లో వైరల్‌గా మారుతోంది. తాజాగా ఈ సినిమాలో హీరోయిన్ కన్ఫార్మ్ అయ్యిందంటూ వార్తలు చక్కర్లు కొడుతున్నాయి.
ఈ సినిమాను మేకర్స్ భారీ బడ్జెట్తో తెరకెక్కించనున్నారు. అసలే అక్కడుంది రాజమౌళి. ఆయన ఏ చిన్న విషయంలోనూ రాజీ పడరు. అందుకే సినిమాలో హీరోయిన్ పాత్ర కోసం గ్లోబల్ స్టార్ నటిని సంప్రదించారని టాక్. ఆమె ఎవరో కాదు, బాలీవుడ్ బ్యూటీ ప్రియాంకా చోప్రా. మిస్ వరల్డ్ పోటీల్లో నెగ్గిన ప్రియాంక, బాలీవుడ్లో కెరీర్ ప్రారంభించింది.
దాదాపు 20ఏళ్ల పాటు బాలీవుడ్లో స్టార్ హీరోయిన్గా రాణించిన ప్రియాంక, హాలీవుడ్ సినిమాల దాకా వెళ్లిపోయింది. అలా గ్లోబల్ స్టార్ ట్యాగ్ సంపాదించిన ప్రియాంకను సినిమాలో తీసుకుంటే హాలీవుడ్ లెవెల్లోనూ క్రేజ్ పెరుగుతుందని మేకర్స్ భావిస్తున్నారేమో! కానీ, ఈ విషయంపై మేకర్స్ నుంచి క్లారిటీ రావాల్సి ఉంది. చూడాలి మరి జక్కన్న అత్యంత ప్రతిష్ఠాత్మకంగా తెరకెక్కించనున్న సినిమాలో మహేశ్తో ఏ అమ్మడు జోడీ కట్టనుందో?
షూటింగ్ అప్పుడే షూరు : ఇక ఈ సినిమా కన్ఫార్మ్ అయ్యి చాలా రోజులు గడుస్తున్నా, షూటింగ్ ఇంకా ప్రారంభం కాలేదు. ఈ గ్యాప్లో అటు జక్కన్న, ఇటు మహేశ్ బాబు ఫారిన్ ట్రిప్స్ కూడా వెళ్లారు. అయితే 2025 ఏప్రిల్లో ఈ సినిమా చిత్రీకరణ ప్రారంభించాలని మేకర్స్ భావిస్తున్నారట.
సినిమా కథ విషయానికొస్తే, ఇక ఇండియన్ సినీ ఇండస్ట్రీలో ఇప్పటివరకూ చూడని సరికొత్త ప్రపంచాన్ని రాజమౌళి తెరపై ఆవిష్కరించబోతున్నారని రచయిత విజయేంద్ర ప్రసాద్‌ గతంలో ఓ ఇంటర్వ్యూలో తెలిపారు. దీంతో దీనిపై అంచనాలు రెట్టింపు అవుతున్నాయి . అమెజాన్‌ అడవుల నేపథ్యంలో సాగే ఈ కథలో పలువురు విదేశీ నటులు కనిపించనున్నారు. భారతీయ భాషలతో పాటు, విదేశీ భాషల్లోనూ దీనిని రీమేక్ చేయనున్నారు. దుర్గా ఆర్ట్స్‌పై కె.ఎల్‌.నారాయణ ఈ చిత్రాన్ని నిర్మిస్తున్నారు. వెండితెరపై సరికొత్త లుక్‌లో మహేశ్ కనిపించనున్నారు.
