Squid Game 2 Teaser : ప్రముఖ ఓటీటీ సంస్థ నెట్‌ఫ్లిక్స్‌ వేదికగా 2021లో విడుదలై విశేష ప్రేక్షకాదరణ సొంతం చేసుకున్న కొరియన్‌ వెబ్‌ సిరీస్ 'స్క్విడ్ గేమ్'. ఇప్పుడు ఈ సిరీస్కు కొనసాగింపుగా 'స్క్విడ్ గేమ్ 2' సిద్ధమవుతోంది. డిసెంబర్‌ 26 నుంచి ఇది స్ట్రీమింగ్‌కు అందుబాటులోకి రానుంది. ఈ క్రమంలో తాజాగా మేకర్స్ ఈ సీక్వెల్కు సంబంధించిన టీజర్‌ను రిలీజ్ చేశారు.
ఇక గత సీజన్లో చూసిన విధంగానే గ్రీన్‌ లైట్‌, రెడ్‌ లైట్‌ వంటి గేమ్స్‌ను మరోసారి ఈ సీజన్‌లోనూ చూడొచ్చుని ఆ వీడియో ద్వారా అర్థమవుతోంది. గత సీజన్లో ఈ ఆట నుంచి బయటపడిన 456వ కంటెస్టెంట్ సియోంగ్ గి-హున్ ఇందులో మళ్లీ పాల్గొనడం ఇది ప్రమాదకరం ఇక్కడినుంచి వెళ్లిపోదామంటూ కో ప్లేయర్స్ను హెచ్చరించడం వంటి సీన్స్ టీజర్లో కీ హైలైట్స్గా నిలిచాయి.
ఇంతకీ ఈ 'స్క్విడ్ గేమ్' స్టోరీ ఏంటంటే:
జీవితంలో సర్వస్వం కోల్పోయి, అప్పులపాలైన ఓ 456 మందిని రహస్య దీవికి తీసుకెళ్తారు. అక్కడ రెడ్‌లైట్‌, గ్రీన్‌లైట్‌, టగ్ ఆఫ్‌ వార్‌ వంటి ఆటల పోటీలను నిర్వహిస్తారు. మొత్తం ఆరు గేమ్స్ ఉంటాయి. చివరగా వచ్చేదే 'స్క్విడ్ గేమ్'. ఈ ఆరు ఆటల్లో విజేతలుగా నిలిచినవారు మాత్రమే భారీ మొత్తంలో డబ్బు గెలుచుకోవచ్చు. కానీ, ఈ గేమ్స్లో ఓడిపోయిన వారిని ఎలిమినేషన్‌ అనే పేరుతో చంపేస్తుంటారు.
సర్వైవల్‌ థ్రిల్లర్‌గా రూపందిన ఈ సిరీస్ కొరియాలోనే కాకుండా ప్రపంచవ్యాప్తంగా మంచి ఆదరణ పొందింది. చేసుకుంది. రిలీజైన కొద్ది రోజుల్లోనే సుమారు 111 మిలియన్ల వ్యూస్‌తో తెగ ట్రెండ్ అయ్యింది. ఈ క్రమంలో ఈ సిరీస్ డైరెక్టర్ హర్షం వ్యక్తం చేశారు.
"స్క్విడ్ గేమ్‌కి ప్రాణం పోసి ఓ సిరీస్‌గా మీ ముందుకు తీసుకురావడానికి దాదాపు 12 ఏళ్లు పట్టింది. కానీ, ఎన్నడూ లేనివిధంగా నెట్‌ఫ్లిక్స్‌లో మోస్ట్‌ పాపులర్‌ షోగా 'స్క్విడ్ గేమ్' పేరు తెచ్చుకోవడానికి కేవలం 12 రోజులు మాత్రమే పట్టింది. ఈ సిరీస్కు ఇంతటి ఘన విజయాన్ని అందించినందుకు ప్రపంచవ్యాప్తంగా ఉన్న ప్రేక్షకులందరికీ నా ధన్యవాదాలు" అని ఆయన అన్నారు. ఇప్పుడు ఆ మొదటి సీజన్కు కొనసాగింపుగానే సీక్వెల్ రూపొందుతోంది.
