Naga Chaitanya Karthik Dandu Movie Bugdet : టాలీవుడ్ స్టార్ హీరో అక్కినేని నాగచైతన్య ప్రస్తుతం 'తండేల్' సినిమాతో బిజీ బిజీగా ఉన్నారు. సాయి పల్లవి కీలక పాత్ర పోషిస్తున్న ఈ చిత్రం శరవేగంగా షూటింగ్ జరుపుకుంటోంది. అయితే, ఈ సినిమా విడుదలకు ముందే చై అప్కమింగ్ మూవీ గురించి ఓ వార్త నెట్టింట తెగ ట్రెండ్ అవుతోంది.
'విరూపాక్ష' ఫేమ్ కార్తీక్ దండు డైరెక్షన్లో రానున్న ఆ చిత్రానికి ఏకంగా రూ.110 కోట్ల మేర బడ్జెట్ కేటాయించనున్నట్లు తెలుస్తోంది. ముఖ్యంగా వీఎఫ్ఎక్స్ కోసమే సుమారు రూ.30 కోట్లను వెచ్చించనున్నట్లు సినీ వర్గాల్లో టాక్ నడుస్తోంది. బివిఎస్ఎన్ ప్రసాద్ ప్రొడ్యూస్ చేయనున్న ఈ సినిమా గురించి త్వరలోనే అఫీషియల్ అనౌన్స్మెంట్ రానున్నట్లు సమాచారం.
ఆ హీరోయిన్తో రెండోసారి
ఇదిలా ఉండగా, ఈ సినిమాలోని ఫీమేల్ లీడ్ కోసం ఓ స్టార్ హీరోయిన్ను అప్రోచ్ అయినట్లు తెలుస్తోంది. ఆమెవరో కాదు బుట్టబొమ్మ పూజా హెగ్డే. గతంలో ఈ కాంబోలో ఒక లైలా కోసం అనే సినిమా వచ్చి మంచి టాక్ అందుకున్న సంగతి తెలిసిందే. అయితే ఇప్పుడీ జోడీ మళ్లీ సిల్వర్ స్క్రీన్పై మెరవడం ఆనందం కలిగిస్తోందని అభిమానులు కామెంట్ చేస్తున్నారు.
Pooja Hegde Upcoming Movies : కాగా, పూజా హెగ్డేకు గత మూడేళ్లుగా సరైన హిట్ పడలేదు. 'రాధే శ్యామ్'తో మొదలై 'బీస్ట్', 'ఆచార్య', 'సర్కస్', 'కిసీ కా భాయ్ కిసీ కీ జాన్' ఇలా అన్నీ సినిమాలు బాక్సాఫీస్ వద్ద ఘోర పరాజయాన్ని చవి చూశాయి. దీంతో ఈమె గత కొంతకాలంగా సినిమాలకు దూరంగా ఉంది. అయితే ఈ మధ్యే మళ్లీ పూజాకు ఆఫర్లు వెల్లువ మొదలైంది. 'దేవా', 'సూర్య 44', 'దళపతి 69' లాంటి భారీ బడ్జెట్ చిత్రాల్లో ఛాన్స్లను అందుకుంది. ఇక తెలుగులో చైతూతో ప్రాజెక్ట్ ఓకే అయితే 'ఆచార్య' తర్వాత ఇదే ఆమె తెలుగు సినిమా అవుతుందని సినీ వర్గాల మాట.
ఇక నాగ చైతన్య విషయానికొస్తే ఆయన కూడా గత కొద్ది కాలంగా విజయాన్ని చూడలేదు. ఆ మధ్య ఓటీటీలో వచ్చిన 'దూత'కు మంచి టాక్ రావడం వల్ల చై అభిమానులు కాస్త ఊరట చెందారు. ప్రస్తుతం ఆయన చందూ మొండేటితో కలిసి 'తండేల్' చిత్రం చేస్తున్నారు. ఈ చిత్రంపైనే చైతూ ఆశలన్నీ పెట్టుకున్నారు.
