Music Director Thaman Reacted on Trolls : సంగీత దర్శకుడు తమన్ గురించి ప్రత్యేకంగా చెప్పనక్కర్లేదు. ఎన్నో సూపర్ హిట్ సినిమాలకు అదిరిపోయే మ్యూజిక్ను అందించారు. అయినా కూడా కొన్ని సందర్భాల్లో ఆయనపై విమర్శలు వస్తుంటాయి. సోషల్ మీడియాలో ఆయన్ను తెగ ట్రోల్ చేస్తుంటారు. అయితే తాజాగా ఆయన కొందరు సినీ అభిమానులు, పలువురు నెటిజన్లకు ఓ విజ్ఞప్తి చేశారు. ఈ మేరకు సోషల్ మీడియాలో ఓ పోస్ట్‌ పెట్టారు.
అసలేం జరిగిందంటే? - సాధారణంగా తమ అభిమాన హీరో సినిమా విడుదల ఆలస్యమైనా, అప్డేట్స్ ఇవ్వకపోయినా సినీ ప్రియులు, ఫ్యాన్స్ అసహనం వ్యక్తం చేస్తుంటారు. సోషల్ మీడియా వేదికగా అప్డేట్స్ ఇవ్వమంటూ మూవీటీమ్ను ట్రోల్ చేస్తుంటారు. అయితే ప్రస్తుతం గేమ్ ఛేంజర్ విషయంలో అదే జరుగుతోంది. దర్శకుడు శంకర్ ఈ సినిమాను చాలా కాలంగా తెరకెక్కిస్తున్నారు. దీంతో అప్డేట్స్ ఆలస్యం కారణంగా ఫ్యాన్స్ అసహనానికి గురౌతున్నారు. మూవీటీమ్ను ట్రోల్ చేస్తున్నారు. అయితే తాజాగా నిర్మాణ సంస్థ, దర్శకుడినుద్దేశిస్తూ అసభ్య పదజాలంతో ట్రోల్స్ చేశారు. ఈ క్రమంలోనే తమన్ స్పందించినట్లు తెలుస్తోంది.
"డియర్‌ బ్రదర్స్‌ అంతా సరిగ్గానే జరుగుతోంది. ఈ మూవీ అప్‌డేట్‌ కోసం మీరెంత కాలంగా ఎదురుచూస్తున్నారో అర్థం చేసుకున్నాను. మీ ప్రోత్సాహం, ప్రేమే మాకు అవసరం. ఏ సినిమా అయినా మీ కోసమే చేస్తాం. సినిమాకు మీరు రక్తం లాంటి వారు. కానీ మీరు ఇలా దిగజారి అసభ్య పదజాలంతో హ్యాష్‌ట్యాగ్స్‌ క్రియేట్‌ చేయడం కరెక్ట్ కాదు. దయచేసి అలాంటి అసభ్యకరమైన ట్వీట్స్ చేయొద్దు. వారంతా ఫిల్మ్ ఇండస్ట్రీకి, సమాజానికి ఎంతో చేశారు. వారిని మనం గౌరవిద్దాం. ఒకరినొకరు సపోర్ట్‌ చేసుకుందాం" అని రాసుకొచ్చారు.
ఇకపోతే గేమ్ ఛేంజర్ ప్రమోషన్స్ను ఆగస్టు నెలాఖరు నుంచి వేగవంతం చేస్తామని తమన్ ఓ ఈవెంట్లో చెప్పారు. వినాయక చవితి సందర్భంగా శనివారం ఓ సర్‌ప్రైజ్‌ కూడావస్తుందని హింట్‌ ఇచ్చారు. దీంతో #GameChanger హ్యాష్‌ట్యాగ్‌ తెగ ట్రెండింగ్‌ అవుతోంది. ప్రస్తుతం తమన్, ప్రభాస్ 'ది రాజాసాబ్', పవన్‌ కల్యాణ్‌ 'ఓజీ', సిద్ధు జొన్నలగడ్డ 'తెలుసు కదా' సహా పలు చిత్రాలకు సంగీతం అందిస్తున్నారు.
ప్రభాస్ 'రాజాసాబ్' - ఆ రూమర్స్ నిజం కాదట! - Prabhas Rajasaab Movie
