Zebra Movie Pre Release : విలక్షణ నటుడు సత్యదేవ్ లీడ్ రోల్లో తెరకెక్కిన సినిమా 'జీబ్రా'. డైరెక్టర్ ఈశ్వర్‌ కార్తీక్‌ ఈ సినిమాకు దర్శకత్వం వహించారు. ప్రియా భవానీ శంకర్, జెన్నిఫర్‌ పిషినాటో హీరోయిన్లుగా కనిపించనున్నారు. నవంబర్ 22న ఈ సినిమా థియేటర్లలో రిలీజ్ కానుంది. ఈ నేపథ్యంలో మేకర్స్ హైదరాబాద్లో మంగళవారం ప్రీ రిలీజ్ ఈవెంట్ నిర్వహించారు. ఈ కార్యక్రమానికి మెగాస్టార్ చిరంజీవి ముఖ్య అతిథిగా హాజరయ్యారు. అయితే ఈ ఈవెంట్లో చిరు వైజాగ్ స్లాంగ్లో మాట్లాడి ఆకట్టుకున్నారు.
'జీబ్రా' సినిమా గురించి చిరంజీవి స్టేజ్పై మాట్లాడుతుండగా, అభిమానుల్లో ఒకరు 'బాస్ మీ కోసం వైజాగ్ నుంచి వచ్చాను' అని అన్నారు. దానికి చిరు వైజాగ్ స్లాంగ్లోనే ఫన్నీగా రెస్పాన్స్ ఇచ్చారు. 'అయితే ఏటంటావ్ ఇప్పుడు. నువ్వు వైజాగ్ నుంచి వచ్చావ్. సంతోషమే. మరి ఈ బొమ్మను (జీబ్రా సినిమాను ఉద్దేశించి) నువ్వు వైజాగ్లో ఆడించాలి ఆ. మన హీరోది కూడా అదే ఊరు. కూర్చోరా కాసేపు, భలేవోడివే!' అంటూ చిరూ ఈవెంట్లో నవ్వులు పూయించారు. ఆయన వైజాగ్ స్లాంగ్లో మాట్లాడడంతో ఫ్యాన్స్ ఈలలతో గోల చేశారు. కాగా, ఈ వీడియో ప్రస్తుతం సోషల్ మీడియాలో వైరల్గా మారింది. 'బాసు టైమింగ్ సూపర్', 'చిరు ఆల్రౌండర్' అంటూ ఫ్యాన్స్ కామెంట్లలో ప్రశంసిస్తున్నారు.
Megastar #Chiranjeevi Timing😅@KChiruTweets pic.twitter.com/uO6aUloCNL
— Suresh PRO (@SureshPRO_) November 12, 2024
చిరుకు అంకితం
ఈ సినిమాను మెగాస్టార్ చిరంజీవికి అంకితమిస్తున్నట్లు హీరో సత్యదేవ్ చెప్పారు. 'చిరంజీవి మా ట్రైలర్‌ వేడుకకు రావడంతోనే ఈ సినిమా విజయం సాధిస్తుందని నమ్ముతున్నా. ఈ సినిమా నా కెరీర్‌లోనే చాలా పెద్దది. దీన్ని నా తొలి సినిమాలా భావిస్తున్నా. ఈ చిత్రాన్ని చిరంజీవికి అంకితమిస్తున్నా. ఇక నుంచి కచ్చితంగా కొత్త సత్యదేవ్‌ను చూస్తారు. ప్రేక్షకులకు మంచి సినిమాలందిస్తా' అని అన్నారు. కాగా, ఈ కార్యక్రమంలో ప్రశాంత్‌ వర్మ, వెంకటేశ్‌ మహా, బాల సుందరం, వై.రవిశంకర్, దినేశ్, జెన్నీఫర్, అనిల్‌ క్రిష్, సత్య పొన్నార్, పూర్ణాచారి, అమృత తదితరులు పాల్గొన్నారు.
కన్నడ స్టార్ నటుడు డాలీ ధనంజయ ఈ సినిమాలో కీలక పాత్రలో నటించారు. ఇక సత్యరాజ్, సునీల్‌ తదితరులు ముఖ్య పాత్రలు పోషించారు. ఎస్‌.ఎన్‌. రెడ్డి, ఎస్‌.పద్మజ, బాల సుందరం, దినేశ్ సుందరం సంయుక్తంగా ఈ సినిమా నిర్మించారు.
