Ambajipeta Marriage Band Review : 'క‌ల‌ర్‌ఫొటో', 'రైట‌ర్ ప‌ద్మ‌భూష‌ణ్‌' సినిమాలతో ప్రేక్షకులను ఆకట్టుకున్నారు యంగ్ హీరో సుహాస్. ఇటీవ‌లే ఆయ‌న లీడ్ రోల్లో వచ్చిన మరో చిత్రమే 'అంబాజీపేట మ్యారేజి బ్యాండు'. తాజాగా ఈ సినిమా థియేటర్లలో సందడి చేస్తోంది. ఈ నేపథ్యంలో ఈ మూవీ ఎలా ఉందంటే ?
స్టోరీ ఏంటంటే :
అంబాజీపేట మ్యారేజీ బ్యాండులో మ‌ల్లి (సుహాస్) ఓ మెంబర్. చిర‌త పల్లిలో త‌న ఫ్యామిలీతో క‌లిసి నివ‌సిస్తుంటాడు. అక్క ప‌ద్మ (శ‌ర‌ణ్య ప్రదీప్) అదే ఊరి స్కూల్లో టీచ‌ర్‌గా ప‌నిచేస్తుంటుంది. అయితే ఊరి మోతుబ‌రి వెంక‌ట్‌బాబు (నితిన్ ప్ర‌స‌న్న) వ‌ల్లే ప‌ద్మ‌కి ఉద్యోగం వచ్చిందంటూ, వాళ్లిద్ద‌రి మ‌ధ్య అక్ర‌మ సంబంధం ఉంద‌నే ఓ రూమర్ మొద‌ల‌వుతుంది. ఇంత‌లో వెంక‌ట్‌బాబు చెల్లెలు ల‌క్ష్మి (శివాని నాగారం), మ‌ల్లి ప్రేమ‌లో ప‌డ‌తారు. వెంక‌ట్‌బాబు త‌మ్ముడికీ, మ‌ల్లికీ మ‌ధ్య ఊళ్లో గొడ‌వ, ఆ తర్వాత స్కూల్ విష‌యంలో ప‌ద్మ‌కీ, వెంక‌ట్‌బాబుకీ మ‌ధ్య వాగ్వాదం మొద‌ల‌వుతుంది. అవి కాస్త పెద్దదిగా మారుతుంది. ఇంత‌లో మ‌ల్లి, ల‌క్ష్మిల లవ్ స్టోరీ కూడా బ‌య‌ట ప‌డుతుంది. అయితే ఎలాగైనా ఆ ఫ్యామిలీపై రివెంజ్ తీర్చుకోవాల‌ని ఓ రోజు వెంక‌ట్‌ బాబు రాత్రివేళ‌లో ప‌ద్మని స్కూల్‌కి పిలిపించి అవ‌మానిస్తాడు. ఆ తర్వాత ఏం జరిగింది? మ‌ల్లి, ల‌క్ష్మిల లవ్ స్టోరీలో
ఎటువంటి ట్విస్ట్ ఏర్పడిందో తెరపై చూడాల్సిందే
ఎలా ఉందంటే :
స‌మాజంలోని అంత‌రాలు, ప‌రువు, ప్రేమ నేపథ్యంలో సాగే సినిమాలు ఈ మ‌ధ్య త‌ర‌చూ రూపొందుతున్నాయి. త‌మిళంలో అయితే వీటి ప్ర‌భావం చాలా గ‌ట్టిగా ఉంది. తెలుగు డైరెక్టర్లు ఈ మ‌ధ్య మ‌న మూలాల్లోకి వెళ్లి అలాంటి స్టోరీలను తెరకెక్కించాలనే ప్ర‌య‌త్నం చేస్తున్నారు. విజ‌యాలను అందుకుంటున్నారు. ఆ త‌ర‌హా మరో ప్ర‌య‌త్న‌మే ఇది. ఓ అబ్బాయి, అమ్మాయి మ‌ధ్య ప్రేమే ఈ క‌థ‌కి ముఖ్య‌మైతే ఇదొక సాధార‌ణ‌మై ప్ర‌య‌త్న‌మే అయ్యుండేది. కానీ డైరెక్టర్ తెలివిగా ప్రేమ‌క‌థ‌ని మించి, ఆత్మాభిమానం అనే అంశాన్నీ బ‌లంగా చెప్పే ప్ర‌య‌త్నం చేశాడు. అది ఈ సినిమాని ప్ర‌త్యేకంగా నిలిపింది.
మ‌ల్లి, ల‌క్ష్మిల ప్రేమ‌క‌థ‌తో మొద‌ల‌య్యే కథ ప్రారంభ‌మైన కొద్దిసేపటికే ఆ ఊరు చిర‌త‌ప‌ల్లికి ప్రేక్ష‌కుల్ని తీసుకెళ్లి అందులో ఓ పాత్ర‌లా మారుస్తుంది. స‌హ‌జ‌మైన స‌న్నివేశాలు, పాత్ర‌ల తీరుతెన్నులు, సంభాష‌ణ‌లు అంత‌గా ప్ర‌భావం చూపిస్తాయి. ప్రేమ‌క‌థ‌లో కొత్త‌ద‌న‌మేమీ లేదు కానీ 2007 నాటి వాతావ‌ర‌ణం, అప్పుడ‌ప్పుడే సెల్‌ఫోన్లు వ‌స్తున్న ఆ కాలం నాటి లవ్ లెటర్ నేపథ్యంతో సినిమా స‌ర‌దా సర‌దాగా సాగుతుంది. మ‌రోవైపు కులాల మ‌ధ్య అంత‌రాల్ని, ఆర్థిక అస‌మాన‌త‌ల్నీ స‌హ‌జంగా ఆవిష్క‌రిస్తూ క‌థ‌తో కనెక్ట్ చేశాడు డైరెక్టర్. ఇంటర్వెల్ ముందు నుంచి కథ మరో మ‌లుపు తీసుకుంటుంది. అప్పటిదాకా లవ్ స్టోరీ కీల‌కం కాగా, ఆ తర్వాత నుంచి ఆత్మాభిమానం అంశం ప్ర‌ధానంగా మారుతుంది.
సెకండాఫ్లో మ‌ల్లి, అత‌ని ఫ్యామిలీ చేసే పోరాటం చుట్టూనే కథ సాగుతుంది. ఊహ‌కు త‌గ్గ‌ట్టే సాగుతున్నప్పటికీ, బ‌ల‌మైన సీన్స్, డ్రామాతోనూ ప్ర‌భావం చూపించాడు డైరెక్టర్. పోలీస్ స్టేష‌న్‌లో సాగే సీన్స్, ప్రేమ ప్రాణాల మీదకు తేకూడ‌దు అంటూ మ‌ల్లి, ల‌క్ష్మి తీసుకునే నిర్ణ‌యం, ఆ నేపథ్యంలో పండే భావోద్వేగాలు చిత్రానికి ప్ర‌ధాన‌బ‌లం. ప‌తాక స‌న్నివేశాలు కూడా ఆడియెన్స్ను ఆక‌ట్టుకుంటాయి. అక్క‌డ‌క్క‌డా కొన్ని స‌న్నివేశాలు నాట‌కీయంగా, ఎక్కువ స్వేచ్ఛ‌ని తీసుకుని మ‌లిచిన‌ట్టు అనిపించినప్పటికీ సినిమా మాత్రం ప్రేక్ష‌కుల‌పై బ‌ల‌మైన ప్ర‌భావ‌మే చూపిస్తుంది.
ఎవ‌రెలా చేశారంటే :
Ambajipeta Marriage Band Cast : పాత్ర‌లే త‌ప్ప న‌టులు క‌నిపించ‌ర‌నే విష‌యాన్ని రుజువు చేస్తుంది ఈ చిత్రం. న‌టులు ఆయా పాత్ర‌ల్లో అలా ఒదిగిపోయారు. మ‌ల్లి పాత్రకి సుహాస్ స‌రైన ఎంపిక అనిపిస్తుంది. భావోద్వేగ ప్ర‌ధాన‌మైన స‌న్నివేశాల్లో అతడి న‌ట‌న మ‌న‌సుల్ని హ‌త్తుకుంటుంది. శివానీ నాగారం ల‌క్ష్మి పాత్రకి పూర్తిగా న్యాయం చేశారు. శ‌ర‌ణ్య ప్రదీప్ ఈ సినిమాకి మరో హీరో. ఆమె పాత్ర‌ని డిజైన్ చేసిన తీరు, అందులో ఆమె నటించిన విధానం సినిమాకే హైలైట్‌గా నిలిచింది. అన్న‌ద‌మ్ములుగా నటించిన నితిన్, విన‌య మ‌హాదేవ్, హీరోకి స్నేహితుడిగా క‌నిపించే జ‌గ‌దీష్ బండారి పాత్ర‌లు కూడా ప్రేక్షకులను ఆక‌ట్టుకుంటాయి.
- " class="align-text-top noRightClick twitterSection" data="">
బ‌లాలు
+ కథ, నేప‌థ్యం
+ భావోద్వేగాలు
+ సుహాస్, శ‌ర‌ణ్య న‌ట‌న
బ‌ల‌హీనత‌లు
- ప్రేమ స‌న్నివేశాలు
చివ‌రిగా : అంబాజీపేట మ్యారేజీబ్యాండు - మ‌న‌సుల్ని గెలిచే సౌండు.
గమనిక : ఈ సమీక్ష సమీక్షకుడి దృష్టి కోణానికి సంబంధించింది. ఇది సమీక్షకుడి వ్యక్తిగత అభిప్రాయం మాత్రమే!
Suhas New Movie : అంబాజీపేట మ్యారేజి బ్యాండు టీజర్.. సౌండ్ అదిరింది.. సుహాస్ యాక్టింగ్ కేక
తండ్రైన 'కలర్‌ ఫొటో' హీరో సుహాస్ - ప్రొడక్షన్ నెం.1 అంటూ ఫొటో షేర్
