Income Tax Refund Delay Reasons : ఆదాయపు పన్ను రిటర్నులు దాఖలు చేసిన వారిలో అర్హత ఉన్న చాలా మందికి ఇప్పటికే రీఫండ్ అందింది. కొంత మందికి మాత్రం పలు కారణాలతో రీఫండ్ ఆలస్యం అవుతోంది. దీనికి గల ప్రధానమైన కారణాలు ఏమిటంటే?
- ఫారం-26 ఏఎస్లో, ఐటీ రిటర్నుల్లో నమోదు చేసిన ఆదాయం, టీడీఎస్‌ విలువల్లో తేడాలు ఉన్నప్పుడు, ఆ రిటర్నులను ఆదాయపు పన్ను శాఖ పరిశీలించదు. కానీ ఇలాంటి వాటిని సరిచేసుకోవాలని పన్ను చెల్లింపుదారులకు సమాచారం మాత్రం ఇస్తుంది.
- కొన్నిసార్లు ఆదాయపు పన్ను రిటర్నులు దాఖలు చేసినప్పటికీ, దానిని ఇ-వెరిఫై చేయడం మర్చిపోవచ్చు. ఇలాంటప్పుడు కూడా, మీ ఐటీ రిటర్నులను ఆదాయపు పన్ను శాఖ పరిశీలించదు.
- రీఫండ్ ఆలస్యం కావడానికి మరో సాధారణ కారణం ఐటీఆర్‌లో బ్యాంకు ఖాతా వివరాలు తప్పుగా నమోదు చేయడం. వాస్తవానికి పన్ను రిటర్నులలో పేర్కొన్న బ్యాంకు ఖాతాకు నేరుగా రీఫండ్ను జమ చేస్తారు. ఇందులో పొరపాటు అంటే ఐఎఫ్‌ఎస్‌సీ, ఖాతా సంఖ్య తప్పుగా ఉంటే రీఫండ్ విఫలం అవుతుంది. ఇలాంటప్పుడు బ్యాంకు ఖాతా వివరాలను మరోసారి నమోదు చేసి, తిరిగి రీఫండ్ను జారీ చేయాల్సిందిగా కోరాలి.
- కొన్నిసార్లు మునుపటి అసెస్‌మెంట్‌ సంవత్సరాలకు సంబంధించిన పన్ను బాకీలు ఉంటే, ప్రస్తుత రీఫండ్ మొత్తం నుంచి వాటిని జమ చేసుకునే అధికారం ఆదాయ పన్ను శాఖకు ఉంటుంది. ఇలాంటి సందర్భాల్లో మీకు పన్ను విభాగం నుంచి నోటీసులు వస్తాయి. ఈ సర్దుబాటు ప్రక్రియ వల్ల కూడా రీఫండ్ ఆలస్యం కావచ్చు.
- పన్ను చెల్లింపుదారులు కొన్నిసార్లు మినహాయింపులను అధికంగా క్లెయిమ్ చేస్తుంటారు. ఇలాంటప్పుడు ఆ రిటర్నులను ఆదాయపు పన్ను విభాగం తనిఖీ చేసేతుంది. కనుక రీఫండ్ ఆలస్యం అవుతుంది.
- ఆదాయపు పన్ను శాఖ నుంచి వచ్చిన నోటీసులను జాగ్రత్తగా చదివితే, రీఫండ్ ఎందుకు రాలేదన్న విషయం మీకు క్లియర్గా అర్థమవుతుంది. దానికి తగ్గట్లుగా సమాధానం ఇవ్వడం, సరిదిద్దుకోవడం చేస్తే రీఫండ్ వీలైనంత త్వరగానే అందుతుంది.
రీ ఇష్యూ ఎలా కోరాలి?
రీఫండ్ నిలిచిపోయిన సందర్భంలో ఇ-ఫైలింగ్‌ పోర్టల్‌ స్టేటస్‌లో రీఫండ్ ఫెయిల్యూర్‌ అని చూపిస్తుంది. రీ-ఇష్యూ కోసం ఐటీఆర్ ఇ-ఫైలింగ్‌ పోర్టల్‌లోకి లాగిన్‌ అవ్వాలి. సర్వీసెస్‌ ట్యాబ్‌లోకి వెళ్లి రీఫండ్ రీ-ఇష్యూ ఆప్షన్‌ సెలెక్ట్ చేసుకోవాలి. అందులో క్రియేట్‌ రీఫండ్ రీ-ఇష్యూ రిక్వెస్ట్‌ ఆప్షన్‌పై క్లిక్‌ చేయాలి. ఏ బ్యాంక్‌ ఖాతాలో రీఫండ్ పడాలని కోరుకుంటున్నారో ఆ అకౌంట్ను ఎంచుకోవాలి. తర్వాత ఆధార్‌ ఓటీపీతో వెరిఫికేషన్‌ పూర్తి చేయాలి. అంతే సింపుల్!
