Upcoming Bikes Under 1 Lakh : బైక్స్, స్కూటీస్ అంటే యువతకు ఎంత క్రేజో ప్రత్యేకంగా చెప్పాల్సిన పనిలేదు. అయితే చాలా మందికి ఆశ ఉన్నా, వారి దగ్గర పెద్ద మొత్తంలో డబ్బులు ఉండవు. అందుకే ఇలాంటి వారిని టార్గెట్ చేసుకుని, ప్రముఖ ఆటోమొబైల్ కంపెనీలు అన్నీ తమ లేటెస్ట్ బైక్స్, స్కూటీలను మార్కెట్లోకి తీసుకువస్తున్నాయి. పైగా వీటిలో లేటెస్ట్ ఫీచర్స్, స్పెక్స్ను పొందుపరుస్తున్నాయి. యువత ఆర్థిక పరిస్థితుల రీత్యా, మంచి మైలేజ్ ఇచ్చేలా సదరు టూ-వీలర్స్ను తీర్చిదిద్దుతున్నాయి. ఇక 2024 సంవత్సరానికి వస్తే, పలు ప్రముఖ టూ-వీలర్ తయారీ కంపెనీలు తమ లేటెస్ట్ బ్రాండెడ్ బైక్లను లాంఛ్ చేయడానికి సిద్ధం అవుతున్నాయి. మరెందుకు ఆలస్యం వాటిలోని టాప్-5 బైక్స్ అండ్ స్కూటీస్పై ఓ లుక్కేద్దాం రండి.
1. Liger X : లైగర్ ఎక్స్ అనేది ఒక ఆటో-బ్యాలెన్స్ ఎలక్ట్రిక్ స్కూటర్. దీనిని ఆటో ఎక్స్పో 2023లో ప్రదర్శించారు. ముంబయికి చెందిన లైగర్ మొబిలిటీ సంస్థ భారతదేశంలోనే మొదటిసారిగా ఈ సెల్ఫ్ బ్యాలెన్స్డ్ ఈ-స్కూటర్ను లాంఛ్ చేయడానికి సన్నాహాలు చేస్తోంది.
లైగర్ ఎక్స్ బైక్లో రెండు వేరియంట్లు ఉంటాయి. అవి: X, X Plus. లైగర్ ఎక్స్ వేరియంట్ రేంజ్ 60 కి.మీ. లైగర్ ఎక్స్ ప్లస్ బండి రేంజ్ 100 కి.మీ ఉంటుందని కంపెనీ చెబుతోంది. నియో-రెట్రో డిజైన్తో వస్తున్న ఈ X, X Pluse స్కూటీలు గరిష్ఠంగా గంటకు 65 కి.మీ వేగంతో ప్రయాణిస్తాయి.
ఈ లైగర్ ఎక్స్ స్కూటర్లు 4జీ, జీపీఎస్ ఎనేబుల్డ్ స్మార్ట్ఫోన్ కనెక్టివిటీని కలిగి ఉంటాయి. అంతేకాదు ఇది ప్రీమియం టీఎఫ్టీ కన్సోల్తో వస్తుంది. దీని ద్వారా కాల్స్, మెసేజ్ అలర్ట్లు కూడా పొందే అవకాశం ఉంటుంది. ఈ లైగర్ ఎక్స్ బహుశా 2024 నవంబర్లో లాంఛ్ అయ్యే అవకాశం ఉంది. దీని ధర సుమారుగా రూ.90 వేలు ఉండవచ్చని ఓ అంచనా.
2. TVS Fiero 125 : ఈ టీవీఎస్ కంపెనీ 2025 జనవరిలో ఫియరో 125 బైక్ను లాంఛ్ చేయడానికి సన్నాహాలు చేస్తోంది. ఈ స్పోర్టీ బైక్లో 125 సీసీ, 3 వాల్వ్ ఎయిర్-కూల్డ్ ఫ్యూయెల్ ఇంజెక్టెడ్ మోటార్ ఉంటుంది. ఇది 11.38 పీఎస్ పవర్, 11.2 ఎన్ఎం టార్క్ జనరేట్ చేస్తుందని తెలుస్తోంది.
టీవీఎస్ కంపెనీ ఈ ఫియరో 125 బైక్ను హోండా ఎస్పీ 125, హీరో గ్లామర్ 125, బజాజ్ పల్సర్ 125లకు పోటీగా తీసుకువస్తోంది. బహుశా దీని ధర రూ.80,000 వరకు ఉండొచ్చని ఓ అంచనా.
3. Honda Activa 7G : భారతదేశంలోని మోస్ట్ పాపులర్ స్కూటీల్లో హోండా యాక్టివా ఒకటి. అందుకే ఈ క్రేజ్ను, డిమాండ్ను క్యాష్ చేసుకునేందుకు హోండా కంపెనీ 2025 మార్చిలో 'యాక్టివా 7జీ' స్కూటీని లాంఛ్ చేయడానికి సన్నాహాలు చేస్తోంది.
ఈ హోండా యాక్టివా 7జీ బైక్లో 109.51 సీసీ, సింగిల్-సిలిండర్ ఫ్యూయెల్-ఇంజెక్టెడ్ ఇంజిన్ ఉంటుంది. ఇది 7.79 పీఎస్ పవర్, 8.84 ఎన్ఎం టార్క్ జనరేట్ చేస్తుంది. అయితే దీనిలో కొత్తగా టెలిస్కోపిక్ ఫోర్క్, ప్రీలోడ్-అడ్జెస్టబుల్ మోనోషాక్ ఉంటాయని తెలుస్తోంది. అలాగే దీనిలోని ఫ్రంట్ వీల్ 12 అంగుళాలు, రియర్ వీల్ 10 అంగుళాలు ఉంటుందని సమాచారం. ఇంకా దీనిలో సెమీ-డిజిటల్ ఇన్స్ట్రుమెంట్ కన్సోల్, బ్లూటూత్ కనెక్టివిటీ, డిస్క్ బ్రేక్స్, ఎల్ఈడీ హెడ్లైట్స్ ఉండవచ్చని అంచనా. మార్కెట్లో దీని ధర రూ.79,000 వరకు ఉండవచ్చు.
4. Vespa Electtrica : ఈ వెస్పా ఎలక్ట్రికాపై సింగిల్ రీఛార్జ్తో 100 కి.మీ రేంజ్ వరకు ప్రయాణించవచ్చని కంపెనీ చెబుతోంది. ఈ ఎలక్ట్రిక్ స్కూటర్లో 3.6 కిలోవాట్ సామర్థ్యం గల డీసీ మోటార్ ఉంటుంది. దీనిని కేవలం 3.5 గంటల్లోనే ఛార్జ్ చేయవచ్చు. ఇంకా ఈ స్కూటర్లో డిజిటల్ స్పీడో మీటర్, ఓడో మీటర్, ట్రిప్ మీటర్ ఉంటాయి. బ్లూటూత్ కనెక్టివిటీ కూడా ఉంటుంది. అయితే దీని లాంఛ్ డేట్ గురించి కంపెనీ ఎలాంటి ప్రకటన చేయలేదు. దీని ధర బహుశా రూ.90,000 ఉండవచ్చు.
5. Hero Xoom 125R : హీరో కంపెనీ స్పోర్టీ స్కూటర్ సెగ్మెంట్లో 'జూమ్ 125ఆర్' బైక్ను తీసుకువస్తోంది. బహుశా దీనిని ఈ ఏడాది చివర్లో లేదా 2025 ప్రారంభంలో లాంఛ్ చేసే అవకాశం ఉంది.
హీరో జూమ్ 125ఆర్ బైక్ యూత్ఫుల్ డిజైన్తో, 125 సీసీ ఇంజిన్తో వస్తుంది. అప్రిలియా ఎస్ఆర్125, టీవీఎస్ ఎన్టార్క్ 125, సుజుకి అవినిస్, యమహా రేజెడ్ఆర్ 125 ఎఫ్ఐ హైబ్రిడ్ బైక్లతో ఇది పోటీ పడనుంది. మార్కెట్లో ఈ బైక్ ధర రూ.1 లక్ష వరకు ఉండవచ్చని అంచనా.
