Stock Market Portfolio Management : స్టాక్ మార్కెట్లో ఇన్వెస్ట్ చేయడం అనేది దీర్ఘకాలంలో ఆర్థికంగా పురోగతి సాధించడానికి ఉన్న ఉత్తమ మార్గాల్లో ఒకటి. ఇందుకు గాను సరైన పోర్ట్ పోలియోను సృష్టించడం అతిముఖ్యమైనది. స్టాక్ పోర్ట్ఫోలియోను రూపొందించడానికి మీ లక్ష్యాలను నిర్ణయించడం మొదటి దశ. మీరు పోర్ట్‌ఫోలియో సృష్టించుకోవడానికి ప్రయత్నించే ముందు మీ అంతిమ లక్ష్యం ఏంటో తెలుసుకోవడం చాలా ముఖ్యం. దీనివల్ల మీ ఇన్వెస్ట్మెంట్లు లక్ష్యాలకు చేరువ చేసే దిశగా పనిచేస్తాయని నిర్ధరించుకోవచ్చు.
ఉదాహరణకు మీరు 30 ఏళ్ల వ్యక్తి అనుకుందాం. రాబోవు 10-15 ఏళ్లలో ఇల్లు కొనుగోలు చేయాలనుకుంటున్నట్లయితే స్టాక్ పోర్ట్పోలియోను ఇప్పుడే సృష్టించుకోవడం అవసరం. లక్ష్యానికి రెండు లేదా మూడేళ్ల ముందు నుంచే క్రమంగా కొంత మొత్తాన్ని వెనక్కి తీసుకుంటూ ఉండడం ఉత్తమం.
పెట్టుబడుల విభజన
మీ లక్ష్యాలు ఏంటో నిర్ణయించుకున్న తర్వాత అందుకు అనుగుణంగా పెట్టుబడులను విభజించడం రెండో దశ. ఈ దశలో మీ రిస్క్ ప్రొఫైల్ను సరిగా అంచనా వేయడం చాలా కీలకం. ఇది మరింత సమాచారంతో సరైన నిర్ణయాలు తీసుకోవడానికి మిమ్మల్ని ప్రేరేపిస్తుంది. ఉదాహరణకు మీరు 20 ఏళ్ల తర్వాత రిటైర్మెంట్ కోసం ప్లాన్‌ చేసుకున్నారు అనుకుందాం. అంటే మీరు రిస్క్ మధ్యస్థంగా ఉన్న షేర్లలో పెట్టుబడి పెట్టవచ్చు. మిడ్ కాప్, స్మాల్ కాప్ షేర్లలో రిస్క్ అధికంగా ఉంటుంది. లార్జ్ కాప్ షేర్లలో రిస్క్ కాస్త తక్కువగా ఉంటుంది. పెట్టుబడులను మీ రిస్క్ సామర్థ్యానికి అనుగుణంగా ఎంపికచేసుకోవచ్చు.
అవగాహన ఉన్న రంగాలైతే మేలు
ఒక వ్యక్తి స్టీల్‌, పవర్‌, నిర్మాణ రంగాల్లో పనిచేశారు. అందువల్ల అతడికి ఇతర పరిశ్రమలతో పోలిస్తే ఈ మూడు రంగాలపై మంచి అవగాహన, ఆసక్తి, విశ్లేషణ శక్తి మెరుగ్గా ఉంటుంది. కనుక, ఈ రంగాల్లో అతడి మార్కెట్ పెట్టుబడులు మంచి లాభాలను తెచ్చే అవకాశాలు ఎక్కువ. అలాగే అతడు ఇతర రంగాలపై పట్టున్న వారితో సర్కిల్ను పెంచుకోవడానికి ప్రయత్నిస్తే మరిన్ని మంచి స్టాక్స్ను గుర్తించగలుగుతాడు. మెరుగైన స్టాక్స్ను గుర్తించడానికి ప్రతి పెట్టుబడిదారుడు తమ విశ్లేషణ పరిధిని పెంచుకోవాలి.
సమగ్ర అధ్యయనం అవసరం
మీరు ఏ రంగంలో పెట్టుబడి పెడుతున్నా సరే ఆ రంగంపై సమగ్ర పరిశోధన చేయడం చాలా అవసరం. ముఖ్యంగా వివిధ స్టాక్స్పై సమగ్ర అధ్యయనం నిర్వహించడం అనేది విజయవంతమైన స్టాక్ మార్కెట్ పెట్టుబడికి కీలక అడుగు. మీరు కష్టపడి సంపాదించిన డబ్బుతో ఏదైనా కంపెనీ షేర్ కొనుగోలు చేసేముందు ఆ సంస్థ ప్రాథమిక అంశాలను లోతుగా పరిశోధించడం అత్యవసరం. కంపెనీ ఆదాయం, ఖర్చులు, దాని ఆర్థిక స్థిరత్వంపై దృష్టి పెట్టాలి. సంస్థ వార్షిక నివేదికలను పరిశీలించడం ద్వారా ఒక అంచనాకు రావచ్చు. కంపెనీ వృద్ధి సామర్థ్యంపై అంచనా వేయడానికి ఇండస్ట్రీ ట్రెండ్స్పై శ్రద్ధ వహించండి. మీరు ఇన్వెస్ట్ చేయాలనుకుంటున్న సంస్థ అదే ఉత్పత్తులను అందించే ఇతర కంపెనీలతో ఎలా పోటీ పడుతుందో అర్థం చేసుకోవడం అతిమఖ్యం.
పోర్ట్‌ఫోలియో డైవర్సిఫికేషన్‌
వైవిధ్యం అనేది పెట్టుబడిలో ఒక ప్రాథమిక రిస్క్ మేనేజ్‌మెంట్ స్ట్రాటజీ. మీ పెట్టుబడినంతటినీ ఒకే రంగం లేదా స్టాక్‌లో పెట్టకుండా ఉండడం ద్వారా స్టాక్ అస్థిరతను, ఆ సెక్టార్‌లో ఉన్న సమస్యల ప్రభావాన్ని మీపై పడకుండా బయటపడవచ్చు. మార్కెట్ హెచ్చుతగ్గుల సమయంలో డైవర్సిఫికేషన్‌ ఫైనాన్సియల్గా దెబ్బతినకుండా ఒక రక్షణ కవచంలా పనిచేస్తుంది. ఎందుకంటే మీ పోర్ట్‌ఫోలియోలోని ఒక స్టాక్‌కు ఏర్పడిన నష్టాన్ని వేరేదాని లాభాలతో కవర్‌ చేసుకోవచ్చు. దీనివల్ల రిస్క్‌ను బ్యాలెన్స్‌ చేసుకోవడానికి అవకాశం ఏర్పుడుతుంది. పోర్ట్‌ఫోలియో విభిన్నంగా ఉంటేనే అది మంచి పెట్టుబడి.
ఇన్వెస్ట్మెంట్ కాలవ్యవధి
స్టాక్ మార్కెట్లో స్వల్పకాల పెట్టుబడి అనేది మంచి ఎంపిక కాదు. దీర్ఘకాలిక ఇన్వెస్ట్మెంట్ల వల్ల మార్కెట్లలో స్వల్పకాలంలో ఏర్పడే హెచ్చుతగ్గులకు మనపై ప్రభావం చూపించకుండా చేసుకోవచ్చు. దీర్ఘకాలం పాటు ఓపికతో వ్యవహరించిన వారికి షేర్ మార్కెట్ మెరుగైన రాబడిని అందించిందని చరిత్ర చెబుతోంది. అందుచేత స్టాక్ మార్కెట్లో మెరుగైన ప్రయోజనాలను పొందేందుకు ఓపిక, సహనంతో దీర్ఘకాలంపై దృష్టి సారించాలి. కనీసం 5-10 ఏళ్లు వేచి ఉండే ధోరణి సరైనది. సుదీర్ఘ సంపద సృష్టికి అవకాశముంటుంది.
భావోద్వేగాల నియంత్రణ
స్టాక్మార్కెట్లో పెట్టుబడులు పెడుతున్నప్పుడు తీసుకునే నిర్ణయాలపై భావోద్వేగాలు అధిక ప్రభావాన్ని చూపిస్తుంటాయి. చాలా మంది ఇన్వెస్టర్లు మార్కెట్లు అశాజనకంగా ఉన్నప్పుడు అధికంగా కొనుగోలు చేసి, మార్కెట్ నిరాశపరిచినప్పుడు తక్కవ ఎక్కువ అమ్మకాలు చేస్తుంటారు. దీనివల్ల నష్టాలు కూడా ఎక్కువే ఉంటాయని ఆర్థిక నిపుణులు హెచ్చరిస్తున్నారు. దీన్ని ఎదుర్కొనేందుకు నిర్మాణాత్మక పెట్టుబడి ప్రణాళికకు కట్టుబడి ఉండడం చాలా అవసరం. మార్కెట్ల హెచ్చుతగ్గుల ప్రభావం మీపై పడినప్పుడు భావోద్వేగాలగు గురవ్వకుండా కాకుండా ఆలోచించి తెలివైన నిర్ణయాలు తీసుకోవాలి. మీ బ్రోకర్ అనుమతిస్తే కొన్ని స్టాక్స్లో సిప్ కూడా చేయొచ్చు.
స్టాక్మార్కెట్ హెచ్చుతగ్గులు
మార్కెట్లు ఎప్పుడూ ఒకే విధంగా ఉండవు. కొన్నిసార్లు హెచ్చుతగ్గులకు గురవుతుంటాయి. ఒక ఏడాది క్రితం మంచి పనితీరు కనబరుస్తున్న కంపెనీ ఈ సంవత్సరం బాగా పని చేయకపోవచ్చు. స్టాక్ మార్కెట్ పోర్ట్‌ఫోలియో నిర్మాణంలో నెలవారీ, త్రైమాసికం, సెమీ-వార్షిక, వార్షికం వంటి కాలపరిమితిలో మీ పోర్ట్ఫోలియోను అంచనా వేయండి. పతనమవుతున్న స్టాక్స్ను మార్కెట్ ట్రెండ్‌ను, కాలవ్యవధిని ఆధారంగా ఉంచాలా? తీసివేయాలా నిర్ణయించండి.
అనుభవజ్ఞుల సలహాలు తీసుకోండి
స్టాక్ మార్కెట్‌ను అర్థం చేసుకోవడానికి అనుభవజ్ఞుల సలహాలను పొందడానికి ఎల్లప్పుడూ ప్రాధాన్యం ఇవ్వండి. మీ స్టాక్ ఎంపిక విషయంలో మెరుగ్గా ఉండడానికి మెంటార్‌ లేదా స్టాక్స్పై అవగాహన ఉన్న స్నేహితులను సంప్రదించడం మంచిదే. ప్రస్తుతం అనేక ఆర్థిక సంస్థలు వృత్తిపరమైన సలహాలు ఇస్తున్నాయి. వాటిని పరిశీలించొచ్చు. అనేక ఫైనాన్షియల్‌ టిప్స్ అన్ని రకాల మీడియాల్లో వస్తుంటాయి. వీటిని గమనిస్తూ ఉండాలి. ఆన్‌లైన్‌ కోర్సుల్లో చేరొచ్చు. వర్క్‌షాప్‌లు,సెమినార్‌లకు హాజరు కావచ్చు. స్టాక్ మార్కెట్‌కు సంబంధించి అనేక కొత్త పుస్తకాలు ఎప్పటికప్పుడు వస్తూనే ఉంటాయి. ఇన్వెస్ట్ చేయండం గురించి మరింత తెలుసుకోవడానికి వీటిని చదవొచ్చు. మీ సొంత విచక్షణతో, అనుభవజ్ఞుల సూచనలతో ఆర్థిక భవిష్యత్‌ను తీర్చిదిద్దుకోవడానికి మార్కెట్లో అనేక అవకాశాలు ఇప్పుడున్నాయి.
స్టాక్ మార్కెట్లో ఇన్వెస్ట్ చేస్తున్నారా? ఈ టాప్-8 టిప్స్ పాటిస్తే లాభాలు గ్యారెంటీ!
స్టాక్ మార్కెట్లో ఇన్వెస్ట్ చేయాలనుకుంటున్నారా? ఈ ముఖ్యమైన పదాల గురించి తెలుసుకోవాల్సిందే!
