Motor Insurance Add-on Benefits : వాహన బీమా అనేది రోడ్డు ప్రమాదాలు జరిగినపుడు చాలా ఉపయోగపడుతుంది. అయితే ఈ మోటారు బీమాకు జతచేసుకునే యాడ్-ఆన్స్ గురించి, అవి అందించే ప్రయోజనాల గురించి చాలా మందికి అవగాహన లేదనే చెప్పాలి. ప్రమాదాలు జరిగినప్పుడు మాత్రమే కాకుండా వాహనం దొంగిలించబడినా, ప్రకృతి వైపరీత్యాల వల్ల నష్టాలు ఏర్పడినా, పరిహారం రావాలంటే కాంప్రిహెన్సివ్ ఇన్సూరెన్స్ పాలసీ తీసుకోవాలి. దీనికి తోడు కొన్ని యాడ్-ఆన్లు కూడా జతచేసుకోవాలి. అవేంటో ఇప్పుడు చూద్దాం.
రౌండ్-ది-క్లాక్ రోడ్ సైడ్ అసిస్టెన్స్ కవరేజ్
వెహికల్ బ్రేక్‌డౌన్‌, ఫ్లాట్ టైర్, ఇంజన్ ఫెయిల్యూర్ లాంటి సమస్యలు వచ్చినప్పుడు, పెట్రోల్ అయిపోయినపుడు, వాహనం రిపేర్కి వచ్చినపుడు పాలసీదారులకు ఈ రౌండ్-ది-క్లాక్ యాడ్-ఆన్ చాలా ఉపయోగపడుతుంది. ఈ యాడ్-ఆన్ టోయింగ్ సేవలు, ఆన్-సైట్ మరమ్మతులు, అత్యవసర ఇంధనం అందించి మీ సమస్యను పరిష్కారం కావడానికి తగిన సహాయాన్ని అందిస్తుంది.
ఇంజిన్ ప్రొటెక్షన్ కవర్
ఇంజిన్ అనేది వాహనంలోని అత్యంత ముఖ్యమైన, ఖరీదైన భాగం. దీనికి ఏదైనా రిపేర్ వస్తే బాగుచేయించడానికి భారీగా ఖర్చువుతుంది. కాబట్టి ఇంజిన్ ప్రొటెక్షన్ యాడ్-ఆన్ను పాలసీలో చేర్చుకోవడం ఉత్తమం. దీని వల్ల ఇంజిన్ పనిచేయకపోవడం, లూబ్రికేటింగ్ ఆయిల్ లీకేజీ, ఇంజిన్లోకి నీళ్లు చేరడం, హైడ్రోస్టాటిక్ లాక్ మొదలైన సమస్యల వల్ల ఏర్పడిన నష్టాలకు పరిహారం లభిస్తుంది. వరద ప్రభావిత ప్రాంతాల్లో, లోతట్టు ప్రాంతాల్లో నివసించే వాహన యజమానులకు ఈ యాడ్-ఆన్ ఎంతో ఉపయోగకరంగా ఉంటుంది.
జీరో-డిప్రిషియేషన్ కవర్
వాహనం పాతబడుతున్న కొలదీ దాని విలువ తగ్గుపోతుంటుంది. అలాగే వాహనంపై గీతలు, చొట్టలు పడినా దాని విలువ పడిపోతుంది. ఇన్సూరెన్స్ రెగ్యులేటరీ అండ్ డెవలప్‌మెంట్ అథారిటీ ఆఫ్ ఇండియా (IRDAI) వాహనం ప్రామాణిక తరుగుదల రేటును లెక్కిస్తుంది. దీనిని ఆధారంగా చేసుకుని బీమా కంపెనీలు క్లెయిమ్ సమయంలో చెల్లించాల్సిన మొత్తాన్ని నిర్ణయిస్తాయి. అయితే జీరో-డిప్రిసియేషన్ (దీనిని బంపర్-టు-బంపర్ కవర్ లేదా నిల్-డిప్రిసియేషన్ కవర్ అని కూడా పిలుస్తారు) యాడ్-ఆన్ను తీసుకుంటే, వాహనం ప్రస్తుత విలువతో సంబంధం లేకుండా దాని పూర్తి విలువను పొందవచ్చు.
ఉదాహరణకు, ఐదేళ్ల పాత వాహనం విషయంలో, బీమా కంపెనీలు 50 శాతం తరుగుదల రేటును వర్తింపజేస్తాయి. అప్పుడు సగటు క్లెయిమ్ రూ.30,000 - రూ.40,000 వరకు వస్తుందనుకుంటే, ఇన్సూరెన్స్ కంపెనీ ఈ మొత్తంలో సగం మాత్రమే కవర్ చేస్తుంది. మిగిలిన రూ.15,000 - రూ.20,000 నష్టాన్ని పాలసీదారుడే భరించాల్సి ఉంటుంది. అదే అతను జీరో-డిప్రిషియేన్ కవర్ను తీసుకుని ఉంటే, కచ్చితంగా అతనికి పూర్తి పరిహారం లభించేది.
ప్రమాదాలు ఎక్కువగా జరిగే ప్రాంతాల్లో నివాసించే వారికి ఈ యాడ్-ఆన్ ప్రయోజనకరంగా ఉంటుంది. ఇప్పటికే పాలసీ తీసుకున్న చాలా మంది కస్టమర్లు ఆలస్యంగానైనా ఈ కవరేజీని ఎంచుకోవడం మంచిది. అయితే ఈ జీరో-డిప్రిషియేషన్ కవర్ కోసం సాధారణ పాలసీల కంటే కాస్త ఎక్కువ ప్రీమియాన్నే చెల్లించాల్సి ఉంటుంది. అయినప్పటికీ క్లెయిమ్ సెటిల్‌మెంట్‌ సమయంలో ఇది బాగా ఉపయోగపడుతుంది. ఈ యాడ్-ఆన్కు కొన్ని పరిమితులు కూడా ఉన్నాయి. కొన్ని బీమా కంపెనీలు వాహనం కొన్న నిర్దిష్ట కాలం వరకు జీరో-తరుగుదల కవరేజీని అందిస్తాయి. ముఖ్యంగా పాత వాహనాలకు 5-10 సంవత్సరాల వరకు మాత్రమే ఈ యాడ్-ఆన్ కవరేజీ అందిస్తాయి.
కన్స్యూమబల్స్ కవర్
ప్రామాణిక మోటారు బీమా పాలసీలు పాడైపోయిన భాగాలను రిపేర్ చేయడానికి అయ్యే ఖర్చును మాత్రమే కవర్ చేస్తాయి. కానీ వాహనం రిపేర్ చేయడానికి చాలా వస్తువులు అవసరం అవుతాయి. ఆ వస్తువులకు అయ్యే ఖర్చులను కన్స్యూమబల్స్ యాడ్-ఆన్ కవర్ చేస్తుంది. ముఖ్యంగా నట్లు, బోల్ట్‌లు, స్క్రూలు, ఇంజన్ ఆయిల్, లూబ్రికెంట్‌లు తదితర వస్తువులకు సంబంధించిన ఖర్చులను అందిస్తుంది.
రిటర్న్ టు ఇన్ వాయిస్ కవర్
వాహనం దొంగిలించబడినా లేదా పూర్తిగా పాడయిపోయినా ఈ 'రిటర్న్ టు ఇన్ వాయిస్' యాడ్-ఆన్ పాలసీదారునికి పూర్తి పరిహారం అందిస్తుంది. బేసిక్ పాలసీ కింద బీమా డిక్లేర్డ్ విలువ (IDV) వరకు మాత్రమే పరిహారం పొందడానికి వీలుంటుంది. కానీ ఈ యాడ్-ఆన్‌తో వాహనం పూర్తి విలువను పరిహారంగా పొందవచ్చు. కానీ ఇది వాహన కొనుగోలు సమయంలో పాలసీదారు చెల్లించిన రోడ్డు ట్యాక్స్, రిజిస్ట్రేషన్ ఖర్చులకు ఎలాంటి పరిహారం ఇవ్వదు.
ఈ విధంగా మీ మోటారు బీమా పాలసీకి యాడ్-ఆన్లు జత చేసుకోవడం వల్ల కవరేజ్ మొత్తం విలువ గణనీయంగా పెరుగుతుంది. ఊహించని పరిస్థితుల్లో తలెత్తే సమస్యలను, నష్టాలను ఇవి పరిష్కరిస్తాయి.
డ్రైవింగ్ లైసెన్స్ కావాలా? ఆన్లైన్ & ఆఫ్లైన్ విధానాల్లో అప్లై చేసుకోండిలా!
2024లో లాంఛ్ కానున్న టాప్-5 కార్స్ ఇవే! ఫీచర్స్ అదుర్స్ - ధర ఎంతో తెలుసా?
