ఐపీఎల్​ లవర్స్​కు బిగ్​షాక్​ - ఇకపై మ్యాచ్​లు చూడాలంటే డబ్బు కట్టాల్సిందే!

-డిస్నీ+ హాట్‌స్టార్‌, జియో సినిమా విలీనం -ఫ్రీగా ఐపీఎల్​ మ్యాచ్​లు చూసే అవకాశం లేదు

JioHotstar Streaming Subscriptions Plans: మరికొన్ని రోజుల్లో ఐపీఎల్ -2025 మొదలుకానుంది. ఈ పరిస్థితుల్లో ఐపీఎల్​ లవర్స్కు జియో బిగ్ షాక్ ఇచ్చింది. ఇకపై ఐపీఎల్​ మ్యాచ్​లను ఫ్రీగా చూడలేరని ప్రకటించింది. ఐపీఎల్​తో సహా ఇండియాలోని క్రికెట్ మ్యాచ్‌ల డిజిటల్ హక్కులను జియో సినిమా కలిగి ఉంది. అన్ని ICC టోర్నమెంట్‌ల హక్కులను డిస్నీప్లస్ హాట్ స్టార్ కలిగి ఉంది. ఈ రెండూ ఇటీవల విలీనమైన సంగతి తెలిసిందే. దీంతో ఇకమీదట క్రికెట్​ మ్యాచ్‌లన్నింటినీ జియో హాట్ స్టార్ లో చూడవచ్చు. కానీ అందుకోసం సబ్‌స్క్రిప్షన్‌ను తీసుకోవాల్సిందేనని సంస్థ ప్రకటించింది. ఆ సబ్‌స్క్రిప్షన్‌ ప్లాన్‌ వివరాలు ఉలా ఉన్నాయి.

విలీనంలో భాగంగా రిలయన్స్‌కు చెందిన జియో సినిమా, డిస్నీ+ హాట్‌స్టార్‌ ఒకే వేదికపైకి వచ్చాయి. దీన్ని "జియో హాట్‌స్టార్‌" అని పిలుస్తున్నారు. జియో సినిమా, డిస్నీ+ హాట్‌స్టార్‌లోని కంటెంట్‌ అంతా ఒకేచోట వీక్షించొచ్చు. ఈ స్ట్రీమింగ్‌ ప్లాట్‌ఫామ్‌ సబ్‌స్క్రిప్షన్‌ ప్లాన్స్‌ రూ.149 నుంచి ప్రారంభమవుతున్నాయి.

• మొబైల్‌ ప్లాన్‌ (యాడ్‌- సపోర్టెడ్‌ ప్లాన్‌) ప్రారంభ ధర రూ.149. ఇది 3 నెలల వ్యాలిడిటీతో ఉంటుంది. ఇక ఏడాదికి చూస్తే వ్యాలిడిటీ ప్లాన్‌ ధర రూ.499గా నిర్ణయించారు. ఈ ప్లాన్ల ద్వారా కేవలం ఒక మొబైల్‌లో మాత్రమే కంటెంట్‌ చూసే అవకాశం ఉంటుంది.
• రెండు డివైజ్‌లకు సపోర్ట్‌ చేసేలా రెండు ప్లాన్లను (యాడ్‌- సపోర్టెడ్‌ ప్లాన్‌) జియోహాట్‌స్టార్‌ తీసుకొచ్చింది. మూడు నెలల వ్యాలిడిటీతో అందుబాటులోకి తెచ్చిన ఈ ప్లాన్‌ ధర రూ.299 ఉండగా, ఏడాది వ్యాలిడిటీ ప్లాన్‌ ధర రూ.899గా ఉంది.
• యాడ్స్​ లేకుండా కంటెంట్‌ వీక్షించాలనుకొనేవారి కోసం జియోహాట్‌స్టార్‌ రెండు ప్రీమియం ప్లాన్లను ప్రవేశపెట్టింది. ఈ ప్లాన్‌ నెలకు రూ.299తో ప్రారంభమవుతుంది. మూడు నెలల వ్యాలిడిటీ కలిగిన ప్రీమియం ప్లాన్‌ ధర రూ.499 ఉండగా, ఏడాది వ్యాలిడిటీ ప్లాన్‌ ధర రూ.1499 ఉంది. ఈ ప్రీమియం ప్లాన్లతో నాలుగు డివైజ్‌లలో కంటెంట్‌ను వీక్షించొచ్చు.

ఇక ఇప్పటి వరకు ఐపీఎల్‌ మ్యాచ్‌లను ఉచితంగా వీక్షించిన అభిమానులకు ఆ అవకాశం పూర్తిగా లేనట్లే. హాట్‌స్టార్‌ + జియో కలిసి జియోహాట్‌స్టార్‌ పేరిట విలీనం నేపథ్యంలో ఐపీఎల్‌ మ్యాచ్‌లను ఉచితంగా చూడటం సాధ్యం కాదు. అందుకోసం కనీస ప్లాన్‌ రూ. 149తో సబ్‌స్క్రిప్షన్‌ను తీసుకోవాల్సి ఉంటుంది.

ఒకటే యాప్‌: జియో సినిమా, డిస్నీ+ హాట్‌స్టార్‌ కలిపి జియో హాట్‌స్టార్‌గా అవతరించింది. ప్రస్తుతం హాట్‌స్టార్‌ యాప్‌ను వినియోగిస్తున్న వారు, యాప్‌ అప్‌డేట్ చేసుకుంటే అది జియో హాట్‌స్టార్‌గా మారుతుంది. ఇప్పటికే హాట్‌స్టార్‌ సబ్‌స్క్రిప్షన్‌ తీసుకుని ఉంటే రాబోయే 3 నెలల పాటు వారికి పాత రేట్లే కొనసాగుతాయి. జియో సినిమా యాప్‌నకు వెళితే అక్కడి నుంచి జియో హాట్‌స్టార్‌ యాప్‌కు రీడైరెక్ట్‌ అవుతుంది. ఒకవేళ జియో సినిమా ప్రీమియం సబ్‌స్క్రిప్షన్‌ తీసుకుని ఉంటే వారు ఆటోమేటిక్‌గా జియోహాట్‌స్టార్‌ ప్రీమియం సబ్‌స్క్రిప్షన్‌కు మారుతారు.