మీ NPS అకౌంట్​ డీయాక్టివేట్​ అయ్యిందా? - ఇలా రియాక్టివేట్​ చేసుకోవచ్చు!

How to Reactivate NPS Account: మీకు ఎన్​పీఎస్​ అకౌంట్​ ఉందా? అనుకోని కారణాల వల్ల అకౌంట్​ డీయాక్టివేట్​ అయ్యిందా? అయితే నో టెన్షన్​. కొన్ని స్టెప్స్​ ఫాలో అవ్వడం ద్వారా.. ఈజీగా యాక్టివేట్​ చేసుకోవచ్చు. ఆ వివరాలు ఈ స్టోరీలో చూద్దాం.

How to Reactivate Frozen NPS Account: వేతన జీవులకు రిటైర్​మెంట్ తర్వాత ఆర్థిక భరోసా అందించేందుకు కేంద్ర ప్రభుత్వం తీసుకొచ్చిన పథకమే.. జాతీయ పింఛ‌ను ప‌థ‌కం(National Pension Scheme). సాధారణ పౌరులకు కూడా ఈ స్కీమ్ అందుబాటులో ఉంది. ఇందులో పెట్టుబడి పెట్టడం ద్వారా ట్యాక్స్ ఆదా చేసుకోవచ్చు. దీర్ఘకాలంలో మంచి రాబడిని అందుకోవచ్చు. అయితే.. కొన్ని కారణాల వల్ల NPS అకౌంట్​ డీయాక్టివేట్ కావొచ్చు​. మరి తిరిగి యాక్టివేట్​ ఎలా చేసుకోవాలి అన్నది ఈ స్టోరీలో తెలుసుకుందాం.

ఎన్​పీఎస్​ ఖాతా రెండు రకాలుగా ఉంటుంది. అవి..

ఎన్​పీఎస్​ టయర్​-1: ఇది ప్రాథమిక పదవీ విరమణ ఖాతా. పెట్టుబడులపై సెక్షన్​ 80సీ కింద ట్యాక్స్​ బెనిఫిట్స్​ లభిస్తాయి. సాధారణంగా ఎన్​పీఎస్​ అకౌంట్​ అంటే రూ.లక్షన్నర వరకు బెనిఫిట్స్​ ఉంటాయి. ఈ అకౌంట్ తీసుకుంటే మాత్రం.. అదనంగా మరో రూ. 50వేల వరకు ట్యాక్స్​ బెనిఫిట్​ ఉంటుంది. విత్​డ్రా సమయంలో నిబంధనలు ఉంటాయి.

ఎన్​పీఎస్​ టయర్​- 2 అకౌంట్​:- ఇది ఆప్షనల్​ రిటైర్మెంట్​/ ఇన్​వెస్ట్​మెంట్​ అకౌంట్​. టయర్​ 1 అకౌంట్​ ఉన్న ఎన్​పీఎస్​ సబ్​స్క్రైబర్లకు మాత్రమే ఇది అందుబాటులో ఉంటుంది. ఇందులో.. ఎలాంటి ట్యాక్స్​ బెనిఫిట్సూ​ ఉండవు. విత్​డ్రాకు నిబంధనలూ ఉండవు. స్వచ్ఛందంగా పొదుపు చేయాలనుకునే వ్యక్తులకు టైర్-2 అనువైనది.

ఎన్​పీఎస్​ అకౌంట్​ డీయాక్టివేట్​ కావడానికి కారణాలు:

• వార్షిక ప్రీమియం చెల్లించడంలో విఫలమైతే NPS ఖాతా డీయాక్టివేట్​ అవుతుంది.
• KYC డాక్యుమెంటేషన్​ సరిగా లేకున్నా ఖాతా డీయాక్టివేట్​ అవ్వొచ్చు.
• ఇంకా ఏవైనా నిబంధనలు పాటించకపోతే కూడా ఖాతా డీయాక్టివేట్​ కావొచ్చు

NPS అకౌంట్​ను రీయాక్టివేట్​ చేయడం ఎలా: అకౌంట్​ తిరిగి యాక్టివేట్​ చేయాలంటే.. అసలు డీయాక్టివేట్​ అవ్వడానికి కారణం ఏంటో కచ్చితంగా తెలుసుకోవాలి. అందుకోసం eNPS ద్వారా ఆన్​లైన్​లో లేదా పాయింట్​ ఆఫ్​ ప్రెజెన్స్​(PoP) వద్ద ఆఫ్​లైన్​ ద్వారా తెలుసుకోవచ్చు. ఆ తర్వాత ఖాతాను రీయాక్టివేట్​ చేసుకునేందుకు ప్రయత్నించాలి. ఇందుకోసం..

• అప్లికేషన్: అకౌంట్​ను రీయాక్టివేట్​ చేసుకోవడం కోసం తప్పనిసరిగా UOS-S10-A అప్లికేషన్​ పూర్తి చేయాలి. ఈ ఫారమ్‌ను పోస్టాఫీసు నుంచి లేదంటే మీ అకౌంట్​ ఉన్న బ్యాంకు నుంచి కూడా పొందవచ్చు. ఫారమ్ నింపిన తర్వాత మీకు ఎన్‌పిఎస్ ఖాతా ఉన్న బ్యాంకు లేదా పోస్టాఫీస్​లో ఇవ్వాలి.
• డాక్యుమెంట్స్​: మీరు పోస్టాఫీసు లేదా బ్యాంకుకు సమర్పించబోయే ఫారంతోపాటు PRAN కార్డు కాపీని అటాచ్​ చేయాలి. మీ NPS ఖాతాను రీయాక్టివేట్​ చేయడానికి PRAN కార్డ్ అవసరం. ఎన్‌పిఎస్ ఖాతా డీయాక్టివేట్ అయితే.. ఈ కార్డు కూడా స్తంభించిపోతుంది. రీయాక్టివేట్ తరువాత ఇవి రెండూ యాక్టివేట్ అవుతాయి.
• పెనాల్టీ ఎంత?: ఎన్‌పిఎస్ ఖాతాను యాక్టివేట్ చేయడానికి కొంత మొత్తాన్ని జమ చేయాలి. సాధారణ ఎన్‌పిఎస్ ఖాతాకు కనీస డిపాజిట్ మొత్తాన్ని ఇవ్వాల్సి ఉంటుంది. దీంతో ఖాతా యాక్టివేట్ అవుతుంది. ఖాతా నాలుగేళ్లపాటు ఫ్రీజ్ అయితే అదనంగా రూ.100 చెల్లించాలి.
• ఖాతా రీయాక్టివేట్​ చేసుకోవడానికి దరఖాస్తును బ్యాంక్ లేదా పోస్టాఫీసులో దరఖాస్తు సమర్పించాలి. ఆ తర్వాత NPS అధికారులు మీ ఖాతాను పరిశీలించి.. ప్రాసెస్ చేస్తారు. అనంతరం ఖాతా రీయాక్టివేట్​ అవుతుంది. ఇందుకోసం సుమారు వారం రోజులు పడుతుంది.