GST Exemption On Life Insurance : జీవిత బీమా ప్రీమియంపై, సీనియర్ సిటిజన్లు చెల్లించే ఆరోగ్య బీమా ప్రీమియంపై వస్తు, సేవల పన్ను (జీఎస్టీ)ను మినహాయించే అవకాశం ఉందని సమాచారం. శనివారం జరిగిన జీఓఎం సమావేశంలో రూ.5 లక్షలలోపు కవరేజ్ ఉన్న వ్యక్తిగత టర్మ్ లైఫ్ ఇన్సూరెన్స్ పాలసీ ప్రీమియంపై జీఎస్టీ మినహాయించాలని నిర్ణయించారు. అలాగే సీనియర్ సిటిజన్లు చెల్లించే ఆరోగ్య బీమా ప్రీమియంలపై కూడా జీఎస్టీ మినహాయింపు ఇవ్వాలని తీర్మానించారు. అయితే ఈ విషయంలో జీఎస్టీ కౌన్సిల్ తుది నిర్ణయం తీసుకోనుంది.
ఆ పాలసీలకు మినహాయింపు లేదు!
- ఇకపై కూడా రూ.5 లక్షల కంటే ఎక్కువ కవరేజ్ ఉన్న ఆరోగ్య బీమా పాలసీలకు జీఎస్టీ నుంచి ఎలాంటి మినహాయింపు ఉండదు. అంటే రూ.5లక్షల కంటే ఎక్కువ కవరేజ్ ఉన్న పాలసీల కోసం చెల్లించే ప్రీమియంలపై ఎప్పటిలానే 18 శాతం జీఎస్టీ వసూలు చేస్తారు.
- ప్రస్తుతం టర్మ్ లైఫ్ ఇన్సూరెన్స్ పాలసీలు, ఫ్యామిలీ ఫ్లోటర్ పాలసీలపై చెల్లించే ప్రీమియంలపై 18 శాతం జీఎస్టీ విధిస్తున్నారు. కానీ ఇకపై రూ.5 లక్షల లోపు కవరేజ్ ఉన్న పాలసీ ప్రీమియంలపై జీఎస్టీ మినహాయింపు ఇచ్చే అవకాశం ఉంది.
సీనియర్ సిటిజన్ల కోసం
బిహార్ ఉపముఖ్యమంత్రి సామ్రాట్ చౌదరి మాట్లాడుతూ, "GoMలోని ప్రతి సభ్యుడు ప్రజలకు ఉపశమనం కలిగించాలని కోరుకుంటున్నారు. ముఖ్యంగా సీనియర్ సిటిజన్లపై జీఎస్టీ భారం పడకుండా చూడాలని భావిస్తున్నారు. అందుకే సీనియర్ సిటిజన్లు చెల్లించే ఆరోగ్య బీమా ప్రీమియంలపై జీఎస్టీని పూర్తిగా మినహాయించాలని కౌన్సిల్‌కు నివేదిక సమర్పించనున్నాం. అయితే దీనిపై జీఎస్టీ కౌన్సిల్ తుది నిర్ణయం తీసుకుంటుంది" అన్నారు. దీనిని బట్టి కవరేజ్‌తో సంబంధం లేకుండా సీనియర్ సిటిజన్లు చెల్లించే ఆరోగ్య బీమా ప్రీమియంలపై జీఎస్టీని పూర్తిగా మినహాయించే అవకాశం ఉంది.
జీఎస్టీ కౌన్సిల్ గత నెలలో జరిగిన సమావేశంలో ఆరోగ్య, జీవిత బీమా ప్రీమియంలపై పన్నును నిర్ణయించేందుకు 13 మంది సభ్యులతో ఓ జీఓఎంను ఏర్పాటు చేసింది. దీని కన్వీనర్‌గా సామ్రాట్ చౌదరి ఉన్నారు. ఈ ప్యానెల్‌లో యూపీ, రాజస్థాన్‌, బంగాల్‌, కర్ణాటక, కేరళ, ఆంధ్రప్రదేశ్, గోవా, గుజరాత్‌, మేఘాలయ, పంజాబ్‌, తమిళనాడు, తెలంగాణ మంత్రులు ఉన్నారు. అక్టోబర్‌ నెలాఖరులోగా ఈ జీఓఎం తన నివేదికను జీఎస్టీ కౌన్సిల్‌కు సమర్పించాల్సి ఉంటుంది.
