G Pay App Exit United States : ప్రస్తుతమున్న ఆన్లైన్ పేమెంట్ యాప్స్లో 'గూగుల్-పే' ముందువరుసలో ఉంటుంది. వినియోగదారులు సులభంగా ఉపయోగించేందుకు వీలుగా చాలా రకాల ఫీచర్లు ఈ యాప్ అందిస్తోంది. ప్రస్తుతం 'గూగుల్-పే' 180 దేశాల్లో కార్యకలాపాలు నిర్వహిస్తోంది. అయితే 'గూగుల్-పే' సేవలను అమెరికాలో 2024 జూన్ 4 నుంచి నిలిపివేసేందుకు గూగుల్ సిద్ధమైంది. గూగుల్ ఈ నిర్ణయం తీసుకోవడానికి కారణాలేంటి? భారత్ సహా ఇతర దేశాల్లో ఈ 'గూగుల్-పే' సేవలు ఉపయోగించుకునే యూజర్ల పరిస్థితేంటి? అని విషయాల గురించి ఇప్పుడు తెలుసుకుందాం.
కారణం అదే!
అమెరికా మార్కెట్లో 'గూగుల్-పే' సేవలు నిలిపివేయడానికి, గూగుల్ సంస్థకు చెందిన 'గూగుల్ వాలెట్' యాప్ కారణం. ఈ వాలెట్ను అమెరికా వాసులు విరివిగా ఉపయోగిస్తున్నారు. ఈ యాప్ ద్వారా పేమెంట్ కార్డులు యాడ్ చేసుకోవచ్చు. షాపింగ్ చేసినప్పుడు 'ట్యాప్ అండ్ పే' పద్ధతిలో సులువుగా పేమెంట్ చేసుకోవచ్చు. అంతేకాకుండా ట్రాన్సిట్ కార్డులు, డ్రైవింగ్ లైసెన్సులు వంటి ఐడీ కార్డులతో సహా తదితర డిజిటల్ డాక్యుమెంట్లను ఈ గూగుల్ వాలెట్లో పొందుపరుచుకోవచ్చు. ఇక ఈ వాలెట్ అమెరికా మార్కెట్లో 'గూగుల్-పే' కన్నా ఐదు రెట్లు ప్రజాదరణ పొందింది. అంతేకాకుండా 'గూగుల్-పే'లో ఉన్న ఫీచర్లన్నీ ఈ వాలెట్లో ఉన్నాయి. ఈ కారణాల వల్ల 'గూగుల్-పే'ను అమెరికాలో 2024 జూన్ 4 నుంచి నిలిపివేస్తున్నట్లు గూగుల్ ఓ ప్రకటనలో తెలిపింది. సేవలు పూర్తిగా నిలిపివేసేవరకు యూజర్లు 'గూగుల్-పే'ను అలాగే వినియోగించుకోవచ్చని తెలిపింది.
2024 జూన్ 4 వరకు యూజర్లు వారి 'గూగుల్-పే' బ్యాలన్స్ను చూసుకోవచ్చని, బ్యాంక్కు ట్రాన్స్ఫర్ చేసుకోవచ్చని వెల్లడించింది. ఇవే సేవలను గడువు తర్వాత గూగుల్ పే వెబ్సైట్ ద్వారా పొందవచ్చని చెప్పింది. 2024 జూన్ 4 నాటికి అమెరికా వెర్షన్ 'గూగుల్-పే' యాప్లో యూజర్లు డబ్బులను సెండ్, రిక్వెస్ట్ / రిసీవ్ చేసుకోలేరని చెప్పింది. దీంతోపాటు వివిధ డీల్స్ను యాక్టివేట్ చేసుకోలేరని తెలిపింది.
భారత్లో 'గూగుల్-పే' సంగతేంటి?
అయితే భారత్, సింగపూర్లో 'గూగుల్-పే' సేవల్లో ఎలాంటి మార్పు ఉండదని పేర్కొంది. ఈ దేశాల్లో 'గూగుల్-పే' ఉపయోగించే లక్షలాది మంది యూజర్ల కోసం, ఆయా దేశాల ప్రత్యేక అవసరాల కోసం యాప్ను మరింత అభివృద్ధి చేస్తామని తెలిపింది.
హ్యుందాయ్ క్రెటా ఎన్ లైన్ లాంఛ్ డేట్ ఫిక్స్డ్ - కియా & టయోటా కార్స్ రీకాల్ - ఎందుకంటే?
సైబర్ నేరగాళ్ల నుంచి రక్షణ కావాలా? అయితే ఆ 'బీమా' తీసుకోవడం తప్పనిసరి!
